ភ្នំពេញ ៖ ក្រសួងអប់រំ បានរៀបចំផែនការយុទ្ធសាស្ត្រវិស័យអប់រំរយៈពេល៥ឆ្នាំ ដើម្បីធានាបាននូវការអប់រំប្រកបដោយគុណភាព សមធម៌ បរិយាប័ន្ន និងលើកកម្ពស់ឱកាសសិក្សាពេញមួយជីវិតសម្រាប់ទាំងអស់គ្នា។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍កាលពីព្រឹកថ្ងៃទី០៨ ខែមករា ឆ្នាំ២០១៩ ថា ផែនការយុទ្ធសាស្ត្រវិស័យអប់រំរយៈពេល៥ឆ្នាំ ២០១៩ ដល់២០២៣នេះ គឺផ្តោតសំខាន់ទៅលើគុណភាពគ្រូបង្រៀន ការពង្រីកវិសាលភាពសាលារៀនគ្រប់កម្រិត ការពង្រឹងអធិការកិច្ចគ្រប់ជ្រុងជ្រោយតាមសាលារៀន ការជំរុញការអប់រំបច្ចេកទេសនៅមធ្យមសិក្សាទុតិយភូមិ ការអប់រំបំណិនស្របតាមទីផ្សារការងារ ការអភិវឌ្ឍន៍កម្មវិធីសិក្សា និងសៀវភៅសិក្សាគោលគ្រប់ជ្រុងជ្រោយ។
លោក រស់ សុវាចា បានបន្តថា ផែនការយុទ្ធសាស្ត្រនេះ នឹងជួយកសាង និងអភិវឌ្ឍន៍ធនធានមនុស្សប្រកបដោយគុណភាព និងគុណធម៌ប្រសើរបំផុត លើគ្រប់ផ្នែក ដើម្បីកសាងសង្គមកម្ពុជាឲ្យក្លាយជាសង្គមរីកចម្រើនផ្នែកលើចំណេះដឹង និងចំណេះធ្វើជាមូលដ្ឋាន។
លោក បានឲ្យដឹងទៀតថា ផែនការនេះ នឹងធ្វើឲ្យសិស្សនិស្សិតមានចំណេះដឹង ស្របតាមស្តង់ដារមួយសមស្រប និងអាចប្រកួតប្រជែងនៅលើការងារក្នុងតំបន់ និងលើសកលលោក និងអាចជាកម្លាំងស្នួលសម្រាប់ជំរុញការអភិវឌ្ឍន៍សង្គមសេដ្ឋកិច្ចរបស់ប្រទេសជាតិ។
ជាមួយគ្នានេះដែរ អ្នកនាំពាក្យក្រសួងអប់រំបានបញ្ជាក់ទៀតថា ក្រសួងក៏បានរៀបចំគោលនយោបាយគ្រូបង្រៀនដោយបានរៀបចំកំណែទម្រង់ធំៗរួមមាន កំណែទម្រង់ការគ្រប់គ្រងការសិក្សាកំណែទម្រង់ការគ្រប់គ្រងរដ្ឋបាល កំណែទម្រង់ការគ្រប់គ្រងហិរញ្ញវត្ថុ និងកំណែទម្រង់ ការគ្រប់គ្រងធនធានមនុស្សសម្រាប់រយៈពេល៥ឆ្នាំទៅមុខទៀត។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីសន្តិភាព និងអភិវឌ្ឍន៍បានថ្លែងប្រាប់កាលពីព្រឹកថ្ងៃទី០៨ ខែមករា ឆ្នាំ២០១៩ ដោយបង្ហាញនូវការគាំទ្រចំពោះផែនការយុទ្ធសាស្ត្រវិស័យអប់រំ៥ឆ្នាំនេះ ព្រោះនឹងជួយពង្រឹងគុណភាពវិស័យអប់រំកាន់តែប្រសើរឡើងថែមទៀត។
យ៉ាងណាក៏ដោយ លោក បានស្នើឲ្យក្រសួងអប់រំ គួរតែធ្វើទំនើបកម្មទៅលើកម្មវិធីសិក្សា និងពង្រឹងគុណភាពគ្រូបង្រៀនឲ្យមានសមត្ថភាពខ្ពស់ ឲ្យមានលក្ខណៈប្រហាក់ប្រហែលនឹងកម្មវិធីសិក្សានៅតាមបណ្តាប្រទេសជិតខាង។
លោកបានឲ្យដឹងទៀតថា ជាងនេះទៅទៀត ត្រូវអភិវឌ្ឍន៍រោងជាងនៅតាមសាលាមួយចំនួនឲ្យទៅជាកន្លែងជួសជុលកុំព្យូទ័រ ឬអេឡិចត្រូនិកវិញ ដើម្បីឲ្យសិស្សមានជំនាញថ្មីៗមុនពេលបញ្ចប់ការសិក្សានៅកម្រិតវិទ្យាល័យ ឈានទៅបន្តការសិក្សានៅកម្រិតឧត្តមសិក្សា និងរៀបចំសោភ័ណភាព ឬបរិស្ថាន នៅតាមសាលាឲ្យបានស្អាត ដើម្បីធ្វើយ៉ាងណាឲ្យសិស្សចូលចិត្តសាលា និងចង់រៀន។
គួរបញ្ជាក់ថា ផែនការយុទ្ធសាស្ត្រវិស័យអប់រំរយៈពេល៥ឆ្នាំនេះ គ្រោងនឹងបញ្ចប់ជាផ្លូវការនៅដើមឆ្នាំ២០១៩នេះហើយ បន្ទាប់ពីទទួលបានការអនុម័តខ្លឹមសារពីប្រមុខរដ្ឋាភិបាលកម្ពុជា សម្ដេចតេជោហ៊ុន សែន កាលពីថ្ងៃទី១ ខែវិច្ឆិកា ឆ្នាំ២០១៨ កន្លងទៅនេះ៕
Source: Kampuchea Thmey Daily
0 Comments