ឧត្តរមានជ័យ ៖ កាលពីថ្ងៃទី០៧ ខែមករា ឆ្នាំ២០១៩ វេលាម៉ោង៣និង១១នាទី រំលងអធ្រាត្រ នៅចំណុចទីស្នាក់ការនគរបាលអន្តោប្រវេសន៍ថៃ (ក្បែរច្រកទ្វារព្រំដែនអន្តរជាតិអូរស្មាច់) ស្ថិតក្នុងភូមិដាន ឃុំដាន ស្រុកកាប់ជើង ខេត្តសុរិន្ទ ប្រទេសថៃ មានករណីលួចមួយដែលបង្កឡើង ដោយជនសង្ស័យជាជនជាតិខ្មែរចំនួន២នាក់ មិនស្គាល់អត្តសញ្ញាណ។ បន្ទាប់ពីធ្វើសកម្មភាពលួចរួច ជនសង្ស័យខាងលើ បានគេចខ្លួនចូលមកក្នុងទឹកដីកម្ពុជាវិញ។ ករណីនេះបាត់បង់សម្ភារៈអស់ ៖ ធុងហ្គាស៍ចំនួន២ និងចង្ក្រានហ្គាស៍ចំនួន១។
លុះព្រឹកឡើង វេលាម៉ោង៨និង៣០នាទី ថ្ងៃទី៨ ខែមករា ឆ្នាំ២០១៩ កម្លាំងប៉ុស្តិ៍នគរបាលរដ្ឋបាលអូស្មាច់ បានទទួលបណ្ដឹងផ្ទាល់ពីខាងអាជ្ញាធរថៃ ថាមានរឿងហេតុដូចករណីខាងលើ និង ដោយមានបញ្ជាពីលោកអធិការនគរបាលក្រុង កម្លាំងប៉ុស្តិ៍ ក៏បានធ្វើការស្រាវជ្រាវក្នុងមូលដ្ឋានរបស់ខ្លួន ហើយឈានដល់ការកំណត់មុខសញ្ញា និងបានធ្វើការឃាត់ខ្លួនជនសង្ស័យដែលបានធ្វើសកម្មភាពលួចសម្ភារៈខាងលើបានចំនួន២នាក់ មានឈ្មោះ ៖ ទី១.ឈ្មោះ ប្រុស រតនា ហៅអាតួ ភេទប្រុស អាយុ២៤ឆ្នាំ រស់នៅភូមិដើមជ្រៃ សង្កាត់អូរស្មាច់ មុខរបរមិនពិតប្រាកដ និងជាមុខសញ្ញាទើបចេញពីពន្ធនាគារ។ ដកហូតប្រភេទថ្នាំយ៉ាម៉ាចំនួន១គ្រាប់ ទី២.ឈ្មោះ នី ម៉ៅ ភេទប្រុស អាយុ៣៤ឆ្នាំ រស់នៅភូមិអូរស្មាច់ សង្កាត់អូរស្មាច់ មុខរបរមិនពិតប្រាកដ និង ជាមុខសញ្ញាទើបចេញពីពន្ធនាគារ។ រីឯវត្ថុតាងបាន ៖ ធុងហ្គាស៍ចំនួន២ និង ចង្ក្រានហ្គាស៍ចំនួន១។
បច្ចុប្បន្ន ជនសង្ស័យទាំងពីរខាងលើ កំពុងសាកសួរនៅប៉ុស្តិ៍ រួចហើយបញ្ជូនមកអធិការដ្ឋានក្រុង ដើម្បីកសាងសំណុំរឿងនីតិវិធីបន្ត៕
Source: Kampuchea Thmey Daily
0 Comments