បាត់ដំបង ៖ ជនសង្ស័យម្នាក់ ដែលមជ្ឈដ្ឋានជាច្រើនស្គាល់យ៉ាងច្បាស់ថាជាមុខសញ្ញាលួចយ៉ាងសកម្ម បានផ្លាស់ប្ដូរមុខរបរទៅជាចោរឆក់វិញម្តង ហើយក៏ត្រូវបានសមត្ថកិច្ច នៃការិយាល័យ ព្រហ្មទណ្ឌកម្រិតធ្ងន់តាមប្រមាញ់ និងឈានដល់ការចាប់ខ្លួន បន្ទាប់ពីជនសង្ស័យរូបនេះ បានធ្វើសកម្មភាពឆក់ទៅលើនារីរងគ្រោះបានសម្រេចរួចមក។
គួរបញ្ជាក់ដែរថា កាលពីថ្ងៃទី៥ ខែមករា ឆ្នាំ២០១៩ វេលាម៉ោងប្រមាណ១០យប់ នៅចំណុចក្បាលស្ពានឧត្តរៈ ស្ថិតក្នុងភូមិដាំស្ពៃ សង្កាត់ស្លាកែត ក្រុងបាត់ដំបង ខេត្តបាត់ដំបង មានករណីឆក់មួយបានកើតឡើង ដែលបង្កដោយជនមិនស្គាល់មុខ បានធ្វើសកម្មភាពឆក់ទៅលើនារីម្នាក់ រួចក៏បានគេចខ្លួនបាត់ស្រមោល។
បន្ទាប់ពីទទួលបានពាក្យបណ្ដឹងពីជនរងគ្រោះ ឈ្មោះ សា រី ភេទស្រី អាយុ៣៦ឆ្នាំ រស់នៅភូមិព្រែកកញ្ចែង ឃុំព្រែកហ្លួង ស្រុកឯកភ្នំ ដែលសាច់ញាតិនាងបានបញ្ជាក់ថា នាងបានដួលសន្លប់ប្រមាណ ៤ម៉ោង ដោយសារមានការប៉ះទង្គិចត្រង់ក្បាល ដោយបាត់ទូរស័ព្ទដៃចំនួន២គ្រឿង និងប្រាក់ដុល្លារ ២០០ដុល្លារផងនោះ សមត្ថកិច្ច នៃការិយាល័យព្រហ្មទណ្ឌកម្រិតធ្ងន់ បានសិក្សា និងស្រាវជ្រាវ ដើម្បីតាមរកមុខសញ្ញាយកមកផ្ដន្ទាទោស។
លុះនៅថ្ងៃទី៧ ខែមករា ឆ្នាំ២០១៩ វេលាម៉ោង៨និង១០នាទីព្រឹក កម្លាំងបានឃាត់ខ្លួនជនសង្ស័យដែលជាមុខសញ្ញាធ្វើសកម្មភាពឆក់កាបូប នាពេលកន្លងមក ដែលជនសង្ស័យនោះ ឈ្មោះ ធុច វិន ភេទប្រុស អាយុ២៧ឆ្នាំ រស់នៅភូមិ/ឃុំខាងលើ ព្រមទាំងបានដកហូតវត្ថុតាង គឺទូរស័ព្ទដៃចំនួន២គ្រឿង ប្រាក់ដុល្លារចំនួន៥៣ដុល្លារ និងម៉ូតូធ្វើសកម្មភាព១គ្រឿង។
បើតាមប្រភពមួយចំនួន គឺមុខសញ្ញារូបនេះធ្លាប់ធ្វើសកម្មភាពចូលលួចសម្ភារៈជាច្រើននៅក្នុងអាហារដ្ឋាន បុប្ផាជ្រៃកោងជាច្រើនលើកច្រើនសាផងដែរ ព្រោះម្ចាស់ហាងបានពិនិត្យមើលតាមកាមេរ៉ាសុវត្ថិភាព។ បច្ចុប្បន្ន ករណីនេះ គឺជនសង្ស័យ និងវត្ថុតាងកំពុងរៀបចំសំណុំរឿងបញ្ជូនទៅសាលាដំបូងហើយ ស្របពេលដែលកម្លាំងអធិការក្រុងដេកលក់អស់ គ្មានកម្លាំងណាម្នាក់ចេញប្រតិបត្តិការឡើយ ដោយទុកភារៈទៅឲ្យកម្លាំងស្នងការទាំងស្រុង ដោយគេមិនដឹងថា បច្ចុប្បន្នកម្លាំងរបស់អធិការក្រុងនៅសល់ប៉ុន្មាននាក់នោះទេ៕
Source: Kampuchea Thmey Daily
0 Comments