មេដឹកនាំកូរ៉េខាងជើងលោកគីមជុងអ៊ុនត្រូវបានគេរាយការណ៍ថា បានទៅធ្វើទស្សនកិច្ចនៅរោងចក្រផលិតឱសថមួយក្នុងប្រទេសចិន ខណៈដែលគាត់ស្វែងរកការគាំទ្រផ្នែកសេដ្ឋកិច្ចពីសម្ព័ន្ធមិត្តដ៏សំខាន់របស់គាត់រួមជាមួយនឹងការគាំទ្រខាងការទូតមុនពេលកិច្ចប្រជុំកំពូលដែលគេរំពឹងទុកជាមួយលោកដូណាល់ត្រាំ។
លោកគីមបានទៅដល់ទីក្រុងប៉េកាំងកាលពីថ្ងៃអង្គារសម្រាប់ដំណើរទស្សនកិច្ចជាលើកទីបួនទៅកាន់មិត្តភក្តិការទូតដ៏សំខាន់តែមួយគត់របស់ប្រទេសនេះហើយដំណើរទស្សនកិច្ចនេះត្រូវបានគេមើលឃើញថាជាយុទ្ធសាស្ត្រមួយមុនពេលជំនួបលើកទី២ដែលអាចទៅរួចរវាងគាត់ជាមួយប្រធានាធិបតីអាមេរិកស្តីពីកម្មវិធីនុយក្លេអ៊ែររបស់ទីក្រុងព្យុងយ៉ាង។
ការធ្វើដំណើរមិនបានប្រកាសនេះគឺពោរពេញទៅដោយភាពសម្ងាត់។ ក្រៅពីការបញ្ជាក់អំពីវត្តមានរបស់គាត់នៅក្នុងទីក្រុងប៉េកាំង មិនមានព័ត៌មានលម្អិតពីខាងកូរ៉េខាងជើងឬពីភាគីចិនទេស្តីអំពីកាលវិភាគរបស់គាត់។
យោងតាមទីភ្នាក់ងារព័ត៌មាន Yonhap របស់កូរ៉េខាងត្បូងបានឲ្យដឹងថា មេដឹកនាំកូរ៉េខាងជើងបានជួបរយៈពេលមួយម៉ោងជាមួយប្រធានាធិបតីចិនលោកស៊ីជីនពីងកាលពីថ្ងៃអង្គារដែលគេជឿថាជាខួបកំណើតរបស់លោកគីមហើយក្រោយមកមេដឹកនាំទាំងពីរបានទទួលទានអាហារពេលល្ងាចជាមួយភរិយារបស់ពួកគេនៅវិមានមហាសាលប្រជាជនក្នុងទីក្រុងប៉េកាំង។
បើយោងតាម Yonhap បានឲ្យដឹងថា ជំនួបនេះបានផ្តោតលើកិច្ចប្រជុំដែលគេរំពឹងទុករវាងលោកគីមជាមួយនឹងលោកត្រាំ។
ក្បួនម៉ូតូមួយបានចាកចេញពីផ្ទះសំណាក់សម្រាប់ឥស្សរជនបរទេស Diaoyutai របស់ទីក្រុងប៉េកាំងកាលពីព្រឹកថ្ងៃពុធដោយមានវត្តមានរបស់ប៉ូលិសយ៉ាងច្រើនហើយចរាចរត្រូវបានបិទដើម្បីក្បួននេះ។
Yonhap បានរាយការណ៍ថា លោកគីមបានចំណាយពេលប្រហែលកន្លះម៉ោងទៅមើលរោងចក្រមួយដែលប្រតិបត្តិការដោយក្រុមហ៊ុនឱសថ Tongrentang នៅតំបន់សេដ្ឋកិច្ចមួយក្នុងរដ្ឋធានីចិន។
ក្រោយមក ក្បួនម៉ូតូដែលទំនងជាដឹកលោកគីមត្រូវបានគេមើលឃើញចាកចេញពីតំបន់ Zhongnanhai ដែលជាមជ្ឈមណ្ឌលដឹកនាំរបស់ប្រទេសចិននៅជិតទីក្រុង Forbidden City របស់ទីក្រុងប៉េកាំង។
គួរបញ្ជាក់ថា លោកគីមបានបញ្ចប់ដំណើរទស្សនកិច្ចរបស់គាត់នៅថ្ងៃព្រហស្បតិ៍នេះ៕ AFP
Source: Kampuchea Thmey Daily
0 Comments