ភ្នំពេញ ៖ ក្នុងរយៈពេល២ឆ្នាំចុងក្រោយនេះ វត្តមានជនជាតិចិន បានហូរចូលមកប្រទេសកម្ពុជាកាន់តែច្រើន នាំឲ្យមានការវិភាគពីលំហូរជនជាតិចិន បានក្លាយជាប្រធានបទក្តៅ និងមានការព្រួយបារម្ភផ្សេងៗពីសំណាក់ប្រជាពលរដ្ឋមួយចំនួនតាមរបៀបផ្សេងគ្នា ជាពិសេសតាមបណ្តាញសង្គម។
ប្រធានរាជបណ្ឌិត្យសភាកម្ពុជា លោកបណ្ឌិតសភាចារ្យ សុខ ទូច បានពន្យល់ដល់អ្នកវិភាគមួយចំនួនដែលតែងរិះគន់ និងបង្ហាញការព្រួយបារម្ភផ្សេងៗចំពោះវត្តមានរបស់ជនជាតិចិន និងការវិនិយោគរបស់ចិននៅក្នុងប្រទេសកម្ពុជាថា ជនជាតិចិនចូលមក កម្ពុជានាពេលនេះ មិនដូចចិនដែលមកកាន់កម្ពុជា កាលពីទសវត្សរ៍ទី៦០ នោះទេ។ ចិនពីអតីតកាលមកកម្ពុជា ដោយហែលទឹក ហើយចិនជំនាន់ឆ្នាំ១៩៧៩ បានយកមនោគមន៍វិជ្ជាមកសាបព្រួសនៅកម្ពុជា ប៉ុន្តែចិនសម័យនេះ យកវិនិយោគ និងគម្រោងសាងសង់អគារខ្ពស់ៗ មកកម្ពុជា ហើយ លំហូរចិន នៅមានកម្រិតតិចតួចនៅឡើយ បើប្រៀបធៀបនឹងប្រទេសជិតខាង ដូចជា ថៃ ជាដើម ដែលបច្ចុប្បន្ន លំហូរចិនចូលស្រុកថៃ មានមិនតិចជាង១០លាននាក់នោះទេ។
លោកបណ្ឌិតសភាចារ្យ សុខ ទូច ផ្គាំទៅអ្នកវិភាគទាំងអស់ សូមឲ្យវិភាគពិចារណាឡើងវិញ ថាតើមានជនជាតិប៉ុន្មាននាក់ដែលកាន់ប៉ាសស្ព័រខ្មែរ និងកាន់អត្តសញ្ញាណប័ណ្ណខ្មែរ។ គ្រប់ជនបរទេស មិនថា បារាំង ឬចិន មិនមានសិទ្ធិទិញ និងកាន់កាប់ដីធ្លីនៅកម្ពុជាទេ កម្ពុជា បានផ្តល់សិទ្ធិដល់ជនបរទេសឲ្យមានសិទ្ធិទិញ ចាប់ពីជាន់ទី១ឡើងប៉ុណ្ណោះ។
ទន្ទឹមនឹងនេះ លោកបណ្ឌិតប្រធានបានប្រកាសគាំទ្រប្រសាសន៍ សម្ដេចតេជោ នាយករដ្ឋមន្ត្រី ហ៊ុន សែន ក្នុងការអនុវត្តច្បាប់ចំពោះជនបរទេសទាំងឡាយ ទាំងជនជាតិចិន និងជនជាតិផ្សេងៗទៀត ដែលធ្វើខុសច្បាប់នៅកម្ពុជា។ ត្រង់ចំណុចនេះ លោកបណ្ឌិតសភាចារ្យសង្ឃឹមថា សម្តីរបស់ សម្តេចតេជោនាយករដ្ឋមន្ត្រី នឹងជំរុញការអនុវត្តច្បាប់ឲ្យកាន់តែមានប្រសិទ្ធភាព។
គួរបញ្ជាក់ថា លោកបណ្ឌិតសភាចារ្យ សុខ ទូច បានលើកឡើងបែបនេះនៅក្នុងពិធីធ្វើបាឋកថា ស្តីពី «រដ្ឋាភិបាលដើមស្រល់” កាលពីថ្ងៃទី៥ ខែមករា ឆ្នាំ២០១៩ នៅរាជបណ្ឌិត្យសភាកម្ពុជា៕
Source: Kampuchea Thmey Daily
0 Comments