ប្រដាល់ ៖ អ្នកប្រដាល់ម្ចាស់មេដាយសំរឹទ្ធស៊ីហ្គេមឆ្នាំ២០១៧របស់កម្ពុជា វ៉ាន់ វឿន ក្លិបឃ្លាំងមឿងកីឡា និង ម៉ន សាម៉េត អ្នកប្រដាល់ក្លិបកងចក្ររាជសីហ៍មានរិទ្ធ នឹងត្រូវឡើងប្រកួតបើកឆាក នៅក្នុងការចាប់ផ្តើមលើកដំបូង នៃព្រឹត្តិការណ៍ប្រដាល់ដណ្តើមខ្សែក្រវាត់ខារ៉ាបាវ រដូវកាលទី៨ ទម្ងន់ ៥៧ គីឡូក្រាម នៅរសៀលថ្ងៃសៅរ៍ ទី១២ ខែមករា ឆ្នាំ២០១៩នេះ នៅសង្វៀនSEATV។
សម្រាប់ការប្រកួតជម្រុះជុំដំបូងនេះ វ៉ាន់ វឿន ត្រូវជួបជាមួយ Deuk Ken។ នេះជាការប្រកួតលើកទី១ របស់វ៉ាន់ វឿន ក្នុងការបើកឆាកនេះ។ Deuk Ken នេះ គេមិនដែលមកប្រកួតនៅសង្វៀនភ្នំពេញនោះទេកន្លងមក។ ទោះជាយ៉ាងណា សម្រាប់ជំនួបក្នុងការប្រកួតជម្រុះដណ្តើមខ្សែក្រវាត់ខារ៉ាបាវលើកនេះ វ៉ាន់ វឿន មិនអាចមើលស្រាល ឬ ធ្វេសប្រហែសនោះទេ ព្រោះអ្នកប្រដាល់ថៃ Deuk Kenនេះ ក៏មានស្នៀតប្រដាល់និងបច្ចេកទេសមិនជាអន់នោះឡើយ។
វ៉ាន់ វឿន គេមានកំណត់ត្រាប្រកួតចំនួន៦៩លើក ឈ្នះ៥៥លើក និងចាញ់១២លើក ពុំដែលស្មើ ហើយអ្នកប្រដាល់ថៃ Deuk Kenវិញ គេមានកំណត់ត្រាប្រកួតចំនួន៥៩លើក ឈ្នះ៤៨លើក និងចាញ់១១លើក មិនដែលស្មើដូចគ្នា។
ចំពោះ ម៉ន សាម៉េត វិញ គេត្រូវជួបប្រកួតជាមួយ Yorth Vandy ។ អ្នកប្រដាល់ថៃ Yorth Van dy នេះ ក៏ធ្លាប់មកប្រកួតសាកសមត្ថភាពអ្នកប្រដាល់ខ្មែរយើងម្តងហើយ នៅលើសង្វៀនSEATVនេះ។
ហេតុនេះ ម៉ន សាម៉េត ត្រូវតែប្រយ័ត្នទើបបាន។ ទោះជាយ៉ាងណា ក្រុមអ្នកវិភាគប្រដាល់ក្នុងស្រុកគេមានជំនឿទុកចិត្តលើកណ្តាប់ដៃរបស់សាម៉េត ដែលអាចបង្ក្រាបអ្នកប្រដាល់ថៃនេះបាន សម្រាប់ជំនួបលើកដំបូង នៃព្រឹត្តិការណ៍ជម្រុះដណ្តើមខ្សែក្រវាត់ខារ៉ាបាវរដូវកាលទី៨ ទម្ងន់៥៧គីឡូក្រាមនេះ។
ព្រឹត្តិការណ៍ប្រដាល់ដណ្តើមខ្សែក្រវាត់ខារ៉ាបាវ រដូវកាលទី៨ នេះ មានអ្នកប្រដាល់ជើងខ្លាំងកម្ពុជា៤រូបនិង អ្នកប្រដាល់ជើងខ្លាំងថៃ៤រូប ដើម្បីវាយដណ្តើមយកខ្សែក្រវាត់របស់ភេសជ្ជៈខារ៉ាបាវ២០១៩ ដែលមានទឹកប្រាក់រង្វាន់សរុបចំនួន៨.០០០ដុល្លារអាមេរិក សម្រាប់អ្នកជាប់ចំណាត់ថ្នាក់លេខ១ និង លេខ២។
អ្នកប្រដាល់ជើងខ្លាំងទាំង៤រូបរបស់កម្ពុជានោះ គឺ ម៉ន សាម៉េត ក្លិបកងចក្ររាជសីហ៍មានរិទ្ធ, វ៉ាន់ វឿន ក្លិបឃ្លាំងមឿងកីឡា , លាភ រដ្ឋា ក្លិបដីឡូត៍មានរិទ្ធខេត្តបន្ទាយមានជ័យ និងតាញ់ មករា សមាគមកីឡាប្រដាល់ក្រសួងការពារជាតិ។ ឯ អ្នកប្រដាល់ថៃ៤នាក់វិញ មាន Deuk Ken , Yorth Vandy , Dek Doeur និង Banda Sak។
ដោយឡែក សម្រាប់ការប្រកួតគូពិសេសខ្មែរ និងខ្មែរវិញ ជី ឆៃលី អ្នកប្រដាល់សមាគមកីឡាប្រដាល់ក្រសួងការពារជាតិ នឹងជួបប្រកួតជាមួយរិទ្ធ ប្រាក់ប៊ិន អ្នកប្រដាល់ក្លិបកងពលតូចលេខ៧០ ។ ពួកគេទាំងពីរ ប្រកួតគ្នាក្នុងទម្ងន់៥៤គីឡូក្រាម។ ជី ឆៃលី និង រិទ្ធ ប្រាក់ប៊ិន នេះ មិនធ្លាប់ប៉ះគ្នាទេកន្លងមក។ ចាំមើល លើកនេះតើនរណាឈ្នះ?។
អ៊ុង កំសត់ អ្នកប្រដាល់ក្លិបព្រៃទទឹងខេត្តបាត់ដំបង នឹងជួបប្រកួតជាមួយនួន រ៉ាថេប ក្លិបតាឯកដំបងដែកមានរិទ្ធខេត្តព្រៃវែង ក្នុងប្រភេទទម្ងន់៦៣,៥០០គីឡូក្រាម។ ចំណែក អេលីត ប៊ុនសិទ្ធ ក្លិបឆ្មាសសែនសុខគុនខ្មែរ ត្រូវគេផ្គូឲ្យជួបជាមួយ រឿន សុខលី ក្លិបការិយាល័យទី៥ កងទ័ពជើងគោក ដោយជយបគ្នាក្នុងទម្ងន់៥៤គីឡូក្រាម។ ចាំមើល អេលីត ប៊ុនសិទ្ធ អាចយកឈ្នះរឿន សុខលី បានឬអត់? ៕
Source: Kampuchea Thmey Daily
0 Comments