ភ្នំពេញ ៖ លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានថ្លែងប្រាប់អ្នកសារព័ត៌មាន កាលពីព្រឹកថ្ងៃទី០៨ ខែមករា ឆ្នាំ២០១៩ថា កម្ពុជានៅបន្តកិច្ចសន្ទនាជាមួយសហភាពអឺរ៉ុប លើបញ្ហាប្រព័ន្ធអនុគ្រោះពន្ធ (EBA) តែកម្ពុជាបានបញ្ជាក់ច្បាស់ហើយថា នឹងមិនយកអធិបតេយ្យជាតិ ប្ដូរជាមួយជំនួយនោះទេ។
ការបញ្ជាក់របស់អ្នកនាំពាក្យក្រសួងការបរទេសកម្ពុជាបែបនេះ ជាការឆ្លើយតបសំណួររបស់អ្នកសារព័ត៌មាន បន្ទាប់ពីជំនួបរវាងឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជាមួយលោកស្រី Francesca Erdelmann តំណាងថ្មីរបស់កម្មវិធីស្បៀងអាហារពិភពលោក (World Food Program WFP) ដែលបានចូលជួបសម្តែងការគួរសម និងប្រគល់លិខិតសារតាំង កាលពីព្រឹកថ្ងៃទី០៨ ខែមករា ឆ្នាំ២០១៩។
លោក កេត សោផាន់ ថ្លែងថា ឯកឧត្ដមឧបនាយករដ្ឋមន្ត្រី ប្រាក់ សុខុន នឹងអញ្ជើញទៅចូលរួមប្រជុំរដ្ឋមន្ត្រីការបរទេសអាស៊ាន ជាមួយសហភាពអឺរ៉ុប ហើយនៅឯកិច្ចប្រជុំនោះ នឹងមានជំនួបជាមួយឧត្ដមស្នងការពាណិជ្ជកម្មរបស់ EU ដូច្នេះភាគីទាំងពីរនៅតែបន្តកិច្ចសន្ទនាជាមួយគ្នា។
លោកបញ្ជាក់យ៉ាងនេះថា “រឿងប្រព័ន្ធអនុគ្រោះពន្ធ (EBA) នេះខ្ញុំធ្លាប់បានលើកឡើងនៅក្នុងកិច្ចប្រជុំកាលពីថ្ងៃមុនរួចហើយថា ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា នឹងអញ្ជើញទៅចូលរួមប្រជុំរដ្ឋមន្ត្រីការបរទេសអាស៊ាន ជាមួយសហភាពអឺរ៉ុប ហើយនៅក្នុងកិច្ចប្រជុំនោះ នឹងមានជំនួបជាមួយឧត្ដមស្នងការពាណិជ្ជកម្មរបស់ EU ដូច្នេះខ្ញុំមិនមានពាក្យអ្វីច្រើនទេ គ្រាន់តែចង់បញ្ជាក់ថា ភាគីទាំងពីរនៅតែបន្តកិច្ចសន្ទនាជាមួយគ្នា អត់មានអ្វីដែលដក ឬយ៉ាងណានោះទេ គឺកិច្ចសន្ទនានៅតែបន្ត”។
ក្នុងនាមក្រសួងការបរទេស លោក កេត សោផាន់ អះអាងថា “ខ្ញុំសូមបញ្ជាក់ជំហរមួយ គឺនៅតែបន្តកិច្ចសហប្រតិបត្តិការជាមួយសហភាពអឺរ៉ុប លើបញ្ហាប្រព័ន្ធអនុគ្រោះពន្ធ (EBA) នេះ ប៉ុន្តែទោះជាយ៉ាងណាក៏ដោយ ជំហររបស់រាជរដ្ឋាភិបាលច្បាស់ហើយថា មិនប្ដូរជំនួយជាមួយអធិបតេយ្យជាតិនោះទេ ដូចអ្នកសារព័ត៌មាន ក៏ដូចជាប្រជាពលរដ្ឋ និងអន្តរជាតិបានដឹងរួចហើយថា ជំហររាជរដ្ឋាភិបាលច្បាស់លាស់ណាស់លើបញ្ហានេះ យើងមានសុទិដ្ឋិនិយមក្នុងការនិយាយចរចាជាមួយគ្នា យើងមិនមែន មិននិយាយរកគ្នានោះទេ គឺយើងនៅតែបន្តកិច្ចសន្ទនាជាមួយគ្នា”។
ទាក់ទងបញ្ហានេះ លោក George Edgar ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជាធ្លាប់បានបញ្ជាក់កាលពីថ្មីៗនេះថា បញ្ហាប្រព័ន្ធអនុគ្រោះពន្ធ (EBA) នេះ រាជរដ្ឋាភិបាលកម្ពុជា និងសហភាពអឺរ៉ុប កំពុងធ្វើការប្រជុំគ្នា និងទំនាក់ទំនងគ្នាជាប្រចាំផងដែរ។ លោកបញ្ជាក់ថា “អីចឹង ខ្ញុំមិនចង់ព្យាករណ៍ថា តើអ្វីទៅជាលទ្ធផល នៃការប្រាស្រ័យទាក់ទងគ្នារវាងរាជរដ្ឋាភិបាល និងសហភាពអឺរ៉ុបនោះទេ...ដំណើរការនេះ ជាដំណើរការមួយដ៏ស្មុគស្មាញ ដើម្បីធ្វើការពន្យល់ឲ្យបានក្បោះក្បាយនោះ ហើយបច្ចុប្បន្ននៅទីក្រុងព្រុចសែល ខាងគណៈកម្មការកំពុងតែដំណើរការ ក្នុងការដកយកមកវិញជាផ្លូវ នូវប្រព័ន្ធអនុគ្រោះពន្ធ (EBA)”។
តាម លោក George Edgar ដំណើរការក្នុងចរចាគ្នាអំពីការដកប្រព័ន្ធអនុគ្រោះពន្ធនេះ ជាដំណើរការដ៏ស្មុគស្មាញមួយ ហើយដំណើរការជាលក្ខណៈផ្លូវការនេះ វាត្រូវការពេលវេលាច្រើន ជាពិសេសក្នុងរយៈ៦ខែដំបូងនេះ វាត្រូវការពិភាក្សាគ្នា ចរចាគ្នារវាងសហភាពអឺរ៉ុប និងរាជរដ្ឋាភិបាលកម្ពុជា ហើយបន្ទាប់មកទៀត បញ្ហាដទៃទៀត នឹងអាចដោះស្រាយបាន បន្ទាប់ពីកិច្ចពិភាក្សារយៈពេល៦ខែ ទៅលើបញ្ហា ដែលមាននេះ។
លោកឯកអគ្គរដ្ឋទូតសហភាពអឺរ៉ុបបញ្ជាក់ថា ក្រោយពីដំណើរការមួយឆ្នាំ ទាក់ទងទៅនឹងប្រព័ន្ធអនុគ្រោះពន្ធ EBA នេះ ទើបមានការសម្រេចចិត្តថា នឹងត្រូវព្យួរទៅលើប្រព័ន្ធអនុគ្រោះពន្ធនេះ ឬក៏អត់ គឺត្រូវការរយៈពេលមួយឆ្នាំ។
ដូច្នេះបច្ចុប្បន្ននេះ យើងកំពុងស្ថិតនៅក្នុងដំណាក់កាលកំពុងរៀបចំនៅឡើយ ហើយដំណាក់កាលជាផ្លូវការនោះ មិនទាន់ចាប់ផ្ដើមនៅឡើយទេ។
គណៈកម្មការអឺរ៉ុប កាលពីថ្មីៗនេះ បានប្រកាសអំពីដំណើរការដកប្រព័ន្ធអនុគ្រោះពន្ធ EBA ចេញពីប្រទេសកម្ពុជា និងប្រទេសមីយ៉ាន់ម៉ា ក្នុងករណីដែលមិនមានការកែសម្រួលអ្វីមួយតាមការចង់បានរបស់ខ្លួន ប៉ុន្តែគម្រោងនេះ ត្រូវបានសភាពាណិជ្ជកម្មអន្តរជាតិសំខាន់ៗ ៥ស្ថាប័នរបស់អឺរ៉ុប ដែលជាតំណាងឲ្យប្រទេសធំៗចំនួន៩ប្រទេសនៅអឺរ៉ុប បានសរសេរលិខិតពិសេសមួយច្បាប់ផ្ញើជូនលោកស្រី Cecilia Malmstrom ស្នងការទទួលបន្ទុកពាណិជ្ជកម្ម គណៈកម្មការអឺរ៉ុប ដោយប្រឆាំងចំពោះការកំណត់ដកប្រព័ន្ធអនុគ្រោះពន្ធ (EBAs) ចេញពីប្រទេសកម្ពុជានេះ ហើយតំណាងក្រុមប្រឹក្សាធុរកិច្ចអាស៊ាន សហភាពអឺរ៉ុប ប្រចាំអាស៊ីអាគ្នេយ៍ បានថ្លែងថា ប្រសិនបើមានការដកពន្ធអនុគ្រោះ EBA ពីកម្ពុជាមែននោះ ក្រុមហ៊ុនអឺរ៉ុបប្រមាណ៤០០ក្រុមហ៊ុន នឹងចាត់ទុកថា គណៈកម្មការអឺរ៉ុប អនុវត្ត EBA នេះ ជាឧបករណ៍នយោបាយបរទេសរបស់ខ្លួនសម្រាប់កម្ពុជា៕
Source: Kampuchea Thmey Daily
0 Comments