ប្រព័ន្ធផ្សព្វផ្សាយរដ្ឋបាននិយាយកាលពីថ្ងៃពុធថា បណ្ដាញសង្គមFacebook បានរំលោភលើច្បាប់អ៊ីនធឺណិតថ្មីរបស់ប្រទេសវៀតណាមដោយអនុញ្ញាតឲ្យអ្នកប្រើប្រាស់បង្ហោះបញ្ចេញមតិប្រឆាំងរដ្ឋាភិបាលនៅលើវេទិកា នេះ បន្ទាប់ពីមានច្បាប់ចម្រូងចម្រាសចូលជាធរមាននៅក្នុងប្រទេសដែលគ្រប់គ្រងដោយបក្សកុម្មុយនិស្ត។
ទោះបីជាកំណែទម្រង់សេដ្ឋកិច្ច និងបង្កើនភាពបើកចំហចំពោះការផ្លាស់ប្តូរសង្គមក៏ដោយក៏បក្សកុម្មុយនិស្តរបស់វៀតណាមនៅតែរក្សាការត្រួតពិនិត្យប្រព័ន្ធផ្សព្វផ្សាយតឹងរ៉ឹងនិងមិនអត់ឱនឲ្យពួកប្រឆាំងឡើយ ។
ទីភ្នាក់ងារព័ត៌មានផ្លូវការវៀតណាមបាននិយាយដោយលើកឡើងពីក្រសួងព័ត៌មាននិងទំនាក់ទំនងថា "Facebook បានរាយការណ៍ថាមិនបានឆ្លើយតបនឹងសំណើសុំដើម្បីលុបចោលនូវទំព័របណ្តាញរបស់អ្នកគាំទ្រដែលប្រឆាំងនឹងរដ្ឋនោះទេ" ។
នៅក្នុងសេចក្តីថ្លែងការណ៍មួយអ្នកនាំពាក្យរបស់ Facebook បាននិយាយថា "យើងមានដំណើរការច្បាស់លាស់សម្រាប់រដ្ឋាភិបាលរាយការណ៍ពីមាតិកាខុសច្បាប់ទៅយើងហើយយើងពិនិត្យមើលសំណើទាំងអស់នេះប្រឆាំងនឹងលក្ខខណ្ឌសេវាកម្មនិងច្បាប់ក្នុងស្រុក" ។
ក្រសួងនេះបានឲ្យដឹងFacebook ក៏បានអនុញ្ញាតឲ្យគណនីផ្ទាល់ខ្លួនដាក់បញ្ចូលការបង្ហោះដែលមានមាតិកាបង្កាច់បង្ខូចការប្រឆាំងនឹងរដ្ឋាភិបាលនិងការបរិហារកេរ្តិ៍របស់បុគ្គលនិងអង្គការ ។
វាបានដកស្រង់សម្តីរបស់ក្រសួងនេះថា មាតិកានេះត្រូវបានគេរកឃើញថារំលោភយ៉ាងធ្ងន់ធ្ងរលើច្បាប់ស្តីពីសន្តិសុខអ៊ីនធឺណិតរបស់វៀតណាម និងបទបញ្ជារបស់រដ្ឋាភិបាលលើការគ្រប់គ្រងការផ្តល់និងការប្រើប្រាស់សេវាកម្មអ៊ីនធឺណិត ។
ក្រុមហ៊ុនបច្ចេកវិទ្យាសកលនិងក្រុមសិទ្ធិមនុស្សបាននិយាយកាលពីពេលមុនថាច្បាប់ស្តីពីសន្តិសុខអ៊ីនធឺណិតដែលបានចូលជាធរមានកាលពីថ្ងៃទី ១ ខែមករាហើយរួមមានតម្រូវការសម្រាប់ក្រុមហ៊ុនបច្ចេកវិទ្យាក្នុងការបង្កើតការិយាល័យក្នុងស្រុកនិងរក្សាទុកទិន្នន័យនៅក្នុងមូលដ្ឋានអាចធ្វើឲ្យអន្តរាយដល់ការអភិវឌ្ឍនិងការច្នៃប្រឌិតនៅប្រទេសវៀតណាម ។
មន្ត្រីក្រុមហ៊ុនបានសម្តែងការព្រួយបារម្ភដោយឯកជនថាច្បាប់ថ្មីនេះអាចធ្វើឲ្យមានភាពងាយស្រួលសម្រាប់អាជ្ញាធរក្នុងការរឹបអូសទិន្នន័យរបស់អតិថិជននិងដាក់ឲ្យបុគ្គលិកក្នុងស្រុកធ្វើការចាប់ខ្លួន ។
ទីភ្នាក់ងារនេះបាននិយាយនៅក្នុងរបាយការណ៍កាលពីថ្ងៃពុធថាFacebook បានបដិសេធមិនផ្តល់ព័ត៌មានស្តីពី "គណនីក្លែងបន្លំ" ដល់ភ្នាក់ងារសន្តិសុខវៀតណាមនោះទេ ។
ក្រសួងព័ត៌មានក៏កំពុងពិចារណាផងដែរអំពីការបង់ពន្ធFacebook សម្រាប់ប្រាក់ចំណូលពីការផ្សាយពាណិជ្ជកម្មពីវេទិកានេះ ។
នៅក្នុងខែវិច្ឆិកាប្រទេសវៀតណាមបាននិយាយថាខ្លួនចង់បានពាក់កណ្ដាលនៃអ្នកប្រើប្រព័ន្ធផ្សព្វផ្សាយសង្គមនៅលើបណ្តាញសង្គមក្នុងស្រុកត្រឹមឆ្នាំ ២០២០ ហើយគ្រោងនឹងការពារ "ព័ត៌មានបំពុល" នៅលើ Facebook និង Google ៕REUTERS
Source: Kampuchea Thmey Daily
0 Comments