អាកាសយានដ្ឋាន Heathrow របស់ទីក្រុងឡុងដ៍ដែលជាមជ្ឈមណ្ឌលដ៏មមាញឹកបំផុតរបស់អឺរ៉ុបបានពន្យារពេលការហោះហើរចាកចេញទាំងអស់របស់ខ្លួនសម្រាប់រយៈពេលប្រហែលមួយម៉ោងកាលពីថ្ងៃអង្គារបន្ទាប់ពីការមើលឃើញយន្តហោះដ្រូនមួយគ្រឿងដែលរឿងនេះបានកើតឡើងក្នុងរយៈពេលត្រឹមតែបីសប្តាហ៍ប៉ុណ្ណោះបន្ទាប់ពីឧបទ្ទវហេតុស្រដៀងគ្នាមួយនៅអាកាសយានដ្ឋាន Gatwick បានបង្កឲ្យមានភាពចលាចល។
អ្នកនាំពាក្យម្នាក់បានប្រាប់ AFP ថា ការហោះហើរនៅអាកាសយានដ្ឋានដែលដឹកអ្នកដំណើរ ២១៣,៦៦៨នាក់ក្នុងមួយថ្ងៃមួយនេះបានបន្តឡើងវិញបន្ទាប់ពីមានការរំខាន។
សេចក្តីថ្លែងការណ៍មួយនៅលើគណនី Twitter របស់ព្រលានយន្តហោះបាននិយាយថា “យើងកំពុងឆ្លើយតបទៅនឹងការមើលឃើញយន្តហោះដ្រូននៅឯអាកាសយានដ្ឋាន Heathrow ហើយកំពុងធ្វើការយ៉ាងជិតស្និទ្ធជាមួយប៉ូលិសក្រុងដើម្បីការពារការគំរាមកំហែងណាមួយដល់សុវត្ថិភាពប្រតិបត្តិការ។ ក្នុងនាមជាវិធានការប្រុងប្រយ័ត្នជាមុន យើងបានបញ្ឈប់ការចេញដំណើរខណៈយើងធ្វើការស៊ើបអង្កេត។ យើងសូមទោសដល់អ្នកដំណើរចំពោះការរអាក់រអួលនេះ”។
ទោះបីជាយ៉ាងណាក៏ដោយ យន្តហោះដែលមកដល់បានបន្តចុះចតនៅ Heathrow ។
ស្របពេលជាមួយគ្នានោះ លោក Chris Grayling រដ្ឋលេខាធិការក្រសួងដឹកជញ្ជូនបាននិយាយថា “កងយោធាកំពុងរៀបចំឧបករណ៍ដែលប្រើនៅអាកាសយានដ្ឋាន Gatwick មកដាក់ពង្រាយនៅអាកាសយានដ្ឋាន Heathrow យ៉ាងឆាប់រហ័សប្រសិនបើវាបញ្ជាក់ថាមានការចាំបាច់”។
គួរបញ្ជាក់ថា ក្រុមហ៊ុនអាកាសចរណ៍ប្រមាណ៨១កំពុងបម្រើដល់ប្រតិបត្តិការគោលដៅចំនួន២០៤នៅឯអាកាសយានដ្ឋាន Gatwick ដែលស្ថិតនៅភាគខាងលិចទីក្រុងឡុងដ៍។
នៅចន្លោះថ្ងៃទី១៩ដល់២១ខែធ្នូ ការមើលឃើញយន្តហោះដ្រូននៅអាកាសយានដ្ឋាន Gatwick ដែលជាមជ្ឈមណ្ឌលធំលំដាប់ទី២របស់ចក្រភពអង់គ្លេសបានបង្កឲ្យមានការរំខានដល់ការធ្វើដំណើរសម្រាប់មនុស្សរាប់ម៉ឺននាក់បន្ទាប់ពីជើងហោះហើរត្រូវបានផ្អាក។
ការរំខាននោះបានកើតឡើងចំពេលដ៏រវល់ជាពិសេសមុនពិធីបុណ្យណូអែល៕ AFP
Source: Kampuchea Thmey Daily
0 Comments