អ្នកប្រដាល់ជើងខ្លាំងកម្ពុជាមកពីក្លិបមោងឬស្សីមរតកគុនខ្មែរ ត្រូវគេផ្តល់ឱកាសឲ្យឡើងសងសឹកជួសយុគ យក្សគីល ក្លិបកងចក្ររាជសីហ៍មានរិទ្ធ ជាមួយអ្នកប្រដាល់អ៊ីរ៉ង់ នៅក្នុងកម្មវិធីប្រដាល់Boostrong Fighter On Fire លើសង្វៀនSEATV នាព្រឹកថ្ងៃទី១៣ ខែមករា ឆ្នាំ២០១៩នេះ។
នោះគឺ សរ រាជសីហ៍ អ្នកប្រដាល់ក្លិបមោងឬស្សីមរតកគុនខ្មែរខេត្តបាត់ដំបង ត្រូវជួបប្រកួតជាមួយអ្នកប្រដាល់អ៊ីរ៉ង់ឈ្មោះMasoud Moghimian។ ពួកគេប្រកួតគ្នា ក្នុងប្រភេទទម្ងន់៧៥គីឡូក្រាម។
នេះជាការជំនួបដ៏តឹងតែងបំផុត រវាងសរ រាជសីហ៍ និង Masoud ព្រោះថាអ្នកប្រដាល់អ៊ីរ៉ង់រូបនេះ មិនធម្មតានោះឡើយ។ កាលពីថ្ងៃទី០១ ខែធ្នូ ឆ្នាំ២០១៨កន្លងទៅនេះ Masoud បានផ្ដួល យុគ យក្សគីល ក្លិបកងចក្ររាជសីហ៍មានរិទ្ធឲ្យបោះបង់ចោលការប្រកួតក្នុងទឹកទី៤។
សរ រាជសីហ៍ គេធ្លាប់ប៉ះប្រកួតជាមួយអ្នកប្រដាល់ស្បែកសប៉ុន្មាននាក់ហើយ តែពុំ ដែលប៉ះជាមួយ Masoud នេះឡើយ។ តែយ៉ាងណា កណ្ដាប់ដៃ កែង និងជើងទាត់របស់រាជសីហ៍ វាយចេញខ្លាំង និងមានទម្ងន់ធ្ងន់គួរសមដែរ ដូច្នេះការជួបជាមួយ Masoud ប្រហែលជាមិនមានបញ្ហាចោទអ្វីឡើយ។
ជាអ្នកប្រដាល់ដែលមិនចេះវាយបន្ធូរដៃនោះទេ ឲ្យតែគេយល់ថាដៃគូអាចបង្ក្រាបបាន គឺសរ រាជសីហ៍ គេមិនប្រោះទុកយូរទេ គេផ្ដួលយកឈ្នះតែម្តង។ និយាយពីបច្ចេកទេស និង កលល្បិចនោះ គេនៅស្ទើរនៅឡើយ តែកម្លាំងកាយសម្បទារឹងមាំល្អ។
សរ រាជសីហ៍ ធ្លាប់ឡើងប្រកួតចំនួន៦៩លើក ឈ្នះ៥៧លើក ចាញ់១២លើក និងមិនដែលស្មើ។ ចាំមើល រវាង Masoud និង សរ រាជសីហ៍ តើនរណាជាអ្នកឈ្នះ សម្រាប់ជំនួបលើកដំបូងនេះ? ហើយតើសរ រាជសីហ៍ អាចសងសឹកឲ្យយុគ យក្សគីល បានសម្រេចឬអត់?។
គួរបញ្ជាក់ឲ្យដឹងដែរថា សរ រាជសីហ៍ កាលពីថ្ងៃទី០៨ ខែធ្នូ ឆ្នាំ២០១៨កន្លងទៅ បានផ្តួលអ្នកប្រដាល់អ៊ីរ៉ង់ឈ្មោះAboozar អោយបោះបង់ការប្រកួតក្នុងទឹកទី៣ នៅលើសង្វៀនSEA-TVនេះ។
តាមលោកញាណ សុធី អ្នកចាត់ចែងកម្មវិធីប្រដាល់ប្រចាំSEATV អោយដឹងថា Masoud នេះ គេមកប្រកួតនៅសង្វៀនរបស់លោកជាលើកទី២ហើយ ។ Masoud គេជាអ្នកប្រដាល់ជើងថ្មី ដែលហ្វឹកហាត់នៅស្រុកថៃ។ គេមានស្នៀតកណ្តាប់ដៃ កែងល្អ ខ្លាំង និងរហ័ស ហើយចេះស្នៀតជង្គង់ថែមទៀត។
អ្នកប្រដាល់រូបនេះ មានកំណត់ត្រាប្រកួតចំនួន៤៨លើក ដោយឈ្នះ៣៧លើក និង ចាញ់១០លើក មិនដែលស្មើ។
ចំពោះ លន់ សៀកឡេង អ្នកប្រដាល់ចំណូលថ្មី ក្លិបថ្នល់ទទឹងគុនខ្មែរត្រូវគេផ្គូឲ្យជួបប្រកួតជាមួយអ្នកប្រដាល់ ចាន់ វ៉ារិទ្ធ ក្លិបអាណាចក្រគុនខ្មែរ។ ពួកគេទាំងពីរជួបប្រកួតគ្នាក្នុងទម្ងន់៦០គីឡូក្រាម ។
គូនេះ ក៏ជាគូដែលមានការចាប់អារម្មណ៍និងជក់ចិត្តដែរ។ ចាន់ វ៉ារិទ្ធ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយព្រោះគេធ្លាប់ត្រូវគេផ្គូឲ្យ ជួបប្រកួតជាមួយអ្នកប្រដាល់បរទេសម្តងហើយកន្លងមក ហើយពេលនេះផ្គូមកជួបជាមួយ លន់ សៀកឡេង អ្នកប្រដាល់ចំណូលថ្មី ប្រហែលជាមិនពិបាកប៉ុន្មាននោះទេ។
យ៉ាងណា លន់ សៀកឡេង ថ្វីត្បិតតែជាអ្នកចំណូលថ្មី ប៉ុន្តែគេវាយល្អ និងខ្លាំង មិនចាញ់ចាន់ វ៉ារិទ្ធនោះឡើយ។ ដោយសារតែយ៉ាងនេះហើយ ទើបគេផ្គូឲ្យជួបចាន់ វ៉ារិទ្ធនេះ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថាលន់ សៀកឡេង អាចយកឈ្នះ ចាន់ វ៉ារិទ្ធ បានដែរឬអត់នោះទេ?។
ចំពោះពុទ្ធ ភារិន្ទ អ្នកប្រដាល់ក្លិបពុទ្ធសេរីវង្សកីឡា ត្រូវគេផ្គូឲ្យជួបប្រកួតជាមួយអ្នកប្រដាល់ឡូញ វ៉ាន់ឌី ក្លិបពន្លឺវិបុលមានរិទ្ធ ដោយជួបប្រកួតក្នុងទម្ងន់៥៧គីឡូក្រាម ហើយអ៊ុល សំណាង អ្នកប្រដាល់ក្លិបយុវវាលស្បូវ ត្រូវជួបប្រកួតជាមួយ ស៊ឹង សំណាង អ្នកប្រដាល់ក្លិបរាជសីហ៍ខេត្តរតនគិរី ក្នុងប្រភេទទម្ងន់៥៧គីឡូក្រាមដែរ៕
Source: Kampuchea Thmey Daily
0 Comments