ប្រធានាធិបតីអាមេរិកលោក Donald Trump បានយកសុន្ទរកថាផ្សាយតាមកញ្ចក់ទូរទស្សន៍កាលពីថ្ងៃអង្គារ ដើម្បីទាមទារប្រាក់ចំនួន៥.៧ពាន់លានដុល្លារសម្រាប់ជញ្ជាំងដែកនៅតាមបណ្តោយព្រំដែនម៉ិកស៊ិក ដែលលោកបាននិយាយថា នឹងបញ្ឈប់ជនអន្តោប្រវេសន៍ខុសច្បាប់។
សុន្ទរកថារយៈពេលប្រាំបួននាទីចេញពីការិយាល័យពងក្រពើក្នុងសេតវិមានគឺមិនមានសម្បទានចំពោះគណបក្សប្រជាធិបតេយ្យដែលបានបដិសេធផ្តល់មូលនិធិដល់ការសាងសង់ជញ្ជាំងឡើយ។
សុន្ទរកថានេះក៏មិនបានផ្តល់ក្តីសង្ឃឹមសម្រាប់ការបញ្ចប់យ៉ាងឆាប់រហ័សនូវការបិទផ្នែកខ្លះរបស់រដ្ឋាភិបាលដែលបង្កឡើងដោយជម្លោះដែលបានធ្វើឲ្យនិយោជិកសហព័ន្ធ៨០០,០០០នាក់គ្មានប្រាក់ខែផងដែរ។
ទោះបីជាយ៉ាងណាក៏ដោយ លោក Trump បានចៀសវាងពីការព្យាករណ៍ពីមុនដែលថា គាត់អាចនឹងប្រកាសពីគ្រាអាសន្នថ្នាក់ជាតិមួយដែលនឹងផ្តល់អំណាចដល់គាត់ក្នុងការអនុញ្ញាតដល់គម្រោងជញ្ជាំងដោយមិនចាំបាច់មានការអនុម័តពីសភាដែលទំនងជាបង្កឲ្យមានវិបត្តិនយោបាយកាន់តែជ្រៅ។
លោក Trump ក៏បាននិយាយផងដែរថា គាត់ចង់ផ្សះផ្សាការបែកបាក់ខាងនយោបាយនៅក្នុងអ្វីដែលអាចជាការតស៊ូអំណាចសម្រាប់តំណែងជាប្រធានាធិបតីដ៏ច្របូកច្របល់របស់គាត់។
លោកបាននិយាយថា “ខ្ញុំបានអញ្ជើញមេដឹកនាំសភាទៅកាន់សេតវិមាននៅថ្ងៃស្អែកដើម្បីធ្វើរឿងនេះ។ សង្ឃឹមថា យើងអាចនឹងផ្សះផ្សារលើគណបក្សនយោបាយដើម្បីគាំទ្រដល់សន្តិសុខជាតិ។ ស្ថានភាពនេះអាចត្រូវបានដោះស្រាយនៅក្នុងកិច្ចប្រជុំរយៈពេល៤៥នាទី”។
បើទោះបីជាមានសំឡេងទន់ភ្លន់ក៏ដោយ ក៏លោក Trump បានចំណាយពេលជាច្រើននៃសុន្ទរកថានេះដើម្បីលើកឡើងពីសារដ៏ចម្រូងចម្រាសថា ការធ្វើអន្តោប្រវេសន៍ខុសច្បាប់នៅព្រំដែនអាមេរិក - ម៉ិកស៊ិកគឺជាការគំរាមកំហែងដល់អាយុជីវិតជនជាតិអាមេរិក។
គាត់បានរៀបរាប់អំពីឧក្រិដ្ឋកម្មដែលប្រព្រឹត្តដោយជនអន្តោប្រវេសន៍ខុសច្បាប់រួមមាន “ការកាត់ក្បាលនិងការកាត់សាកសពជាបំណែក” ហើយបាននិយាយថា គាត់មិនភ្លេចការឈឺចាប់របស់អ្នករស់រានមានជីវិតដែលគាត់បានជួបទេ។
ហើយសុន្ទរកថានេះមិនបានផ្តល់ក្តីសង្ឃឹមដល់ដំណោះស្រាយចំពោះការបិទរដ្ឋាភិបាលដែលបានចាប់ផ្ដើមកាលពី១៨ថ្ងៃមុនទេ៕ AFP
Source: Kampuchea Thmey Daily
0 Comments