ភ្នំពេញ ៖ ការបញ្ជាក់បែបនេះបានធ្វើឡើង ខណៈលោកស្រី Francesca Erdelmann តំណាងថ្មីរបស់កម្មវិធីស្បៀងអាហារពិភពលោក (World Food Program WFP) បានចូលជួបសម្ដែងការគួរសម និងប្រគល់លិខិតសារតាំងជាមួយឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា កាលពីព្រឹកថ្ងៃទី០៨ ខែមករា ឆ្នាំ២០១៩ នៅទីស្តីការក្រសួង។
លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបានថ្លែងប្រាប់អ្នកសារព័ត៌មានក្រោយជំនួបនោះថា នៅក្នុងជំនួបនោះ ឯកឧត្ដមឧបនាយករដ្ឋមន្ត្រីប្រាក់សុខុន បានអបអរសាទរ និងជូនពរលោកស្រី Francesca Erdelmann ឲ្យទទួលបានជោគជ័យនៅក្នុងបេសកកម្មនៅប្រទេសកម្ពុជា ហើយឯកឧត្ដមក៏បានត្រៀមខ្លួន ដើម្បីគាំទ្រឲ្យបេសកកម្មរបស់លោកស្រីទទួលបានជោគជ័យផងដែរ។
ជាការឆ្លើយតប លោកស្រីបានថ្លែងអំណរគុណ ឯកឧត្ដមឧបនាយករដ្ឋមន្ត្រី ប្រាក់ សុខុន ក៏ដូចជារាជរដ្ឋាភិបាលកម្ពុជា ដែលបានគាំទ្រលោកស្រី ជានាយកកម្មវិធីស្បៀងអាហារពិភពលោក (World Food Program) ប្រចាំប្រទេសកម្ពុជា ហើយលោកស្រីបានរំឭកថា សកម្មភាពរបស់អង្គការ World Food Program ដែលបានជួយប្រទេសកម្ពុជានេះ មានរយៈពេល៤០ឆ្នាំហើយ ដូចទិវាជ័យជម្នះ ៧មករា ដែលប្រជាពលរដ្ឋខ្មែរបាននាំគ្នាអបអរសាទរយ៉ាងគគ្រឹកគគ្រេងកាលពីថ្មីៗនេះដែរ។
ជាមួយគ្នានោះ លោកស្រីបានជម្រាបជូនឯកឧត្ដមឧបនាយករដ្ឋមន្ត្រី ប្រាក់ សុខុន ថា អង្គការ World Food Program បានរៀបចំផែនការ និងយុទ្ធសាស្ត្រសម្រាប់ប្រទេសកម្ពុជារួចហើយ ដែលកម្មវិធីនេះ នឹងអនុម័តនៅពេលឆាប់ឆាប់គ្រប់មុខ។
ជាមួយគ្នានោះ លោកស្រី បានសម្ដែងក្តីរីករាយថា បើទោះបីជាផែនការយុទ្ធសាស្ត្ររបស់កម្មវិធីស្បៀងអាហារពិភពលោក មិនទាន់ត្រូវបានអនុម័តក៏ដោយ ប៉ុន្តែបើប្រៀបធៀបជាមួយផែនការយុទ្ធសាស្ត្រចតុកោណរបស់រាជរដ្ឋាភិបាលកម្ពុជា គឺមានសុគតភាពជាមួយគ្នាយ៉ាងច្រើន។
ជាមួយគ្នានោះ ឯកឧត្ដមឧបនាយករដ្ឋមន្ត្រីបានថ្លែងអំណរគុណដល់កម្មវិធីស្បៀងអាហារពិភពលោក (World Food Program) ដែលបានជួយដល់ប្រជាជនកម្ពុជា ក្នុងគ្រាលំបាក គឺតាំងពីឆ្នាំ១៩៧៩ ខណៈដែលកម្ពុជាមានការលំបាកផ្នែកស្បៀងអាហារ ហើយនៅពេលនោះ កម្មវិធីស្បៀងអាហារពិភពលោកបានផ្លាស់ប្ដូរនូវតួនាទីរបស់ខ្លួនពីការផ្ដល់ស្បៀងសម្រាប់ប្រជាជនរស់ ទៅជាដៃគូរបស់រាជរដ្ឋាភិបាលមួយយ៉ាងល្អ និងរឹងមាំក្នុងការជួយអភិវឌ្ឍន៍ប្រទេសកម្ពុជា។
តាម លោក កេត សោផាន់ នៅក្នុងជំនួបនោះ ឯកឧត្ដមឧបនាយករដ្ឋមន្ត្រី ប្រាក់ សុខុន បានសម្ដែងនូវក្តីរីករាយ នៅពេលទទួលព័ត៌មានថា ផែនការយុទ្ធសាស្ត្រប្រចាំប្រទេសរបស់អង្គការ World Food Program មានសុគតភាពជាមួយផែនការយុទ្ធសាស្ត្រចតុកោណរបស់រាជរដ្ឋាភិបាលកម្ពុជា។
មន្ត្រីអ្នកនាំពាក្យក្រសួងការបរទេសបានពន្យល់ដែរថា កម្មវិធីស្បៀងអាហារពិភពលោក ធ្វើការជាមួយរាជរដ្ឋាភិបាលកម្ពុជា និងស្ថាប័នពាក់ព័ន្ធមួយចំនួនដូចជា គណៈកម្មាធិការជាតិគ្រប់គ្រងគ្រោះមហន្តរាយ ក្រុមប្រឹក្សាអភិវឌ្ឍន៍កសិកម្ម ជាពិសេសក្រសួងអប់រំ គឺធ្វើការទៅតាមគោលដៅអភិវឌ្ឍន៍សហស្សវត្សរបស់អង្គការសហប្រជាជាតិ ដែលផ្ដោតសំខាន់ទៅលើគោលដៅទី២ និងគោលដៅទី១៧ គឺទី២ មិនអោយប្រជាពលរដ្ឋមានភាពអត់ឃ្លាន, ទី១៧ ភាពជាដៃគូដ៏រឹងមាំជាងមុន ជាមួយស្ថាប័នរាជរដ្ឋាភិបាលកម្ពុជា៕
Source: Kampuchea Thmey Daily
0 Comments