ម៉ិ​ក​ស៊ិ​ក​ស្ដីបន្ទោស​នៅ​ពេល​សហរដ្ឋអាមេរិក​ពង្រីក​គោលនយោបាយ​បញ្ជូន​អ្នក​ស្វែងរក​សិទ្ធិ​ជ្រកកោន​ទៅវិញ

សហរដ្ឋអាមេរិក​មាន​ផែនការ​ពង្រីក​គោលនយោបាយ​បញ្ជូន​ជនអន្តោប្រវេសន៍​ដែល​ស្វែងរក​ការសុំ​សិ​ទិ្ធ​ជ្រកកោន​ឲ្យ​ត្រលប់​ទៅ​ព្រំដែន​ភាគខាងត្បូង​វិញ​ដើម្បី​រង់ចាំ​ការពិនិត្យ​របស់​តុលា​ការដែល​ជាហេតុ​បង្ក​ឲ្យ​មានប្រតិកម្ម​ពី​ប្រទេស​ម៉ិ​ក​ស៊ិ​ក​ជុំវិញ “​វិធានការ​ឯកតោភាគី​” នេះ​។​
​ក្រសួងការបរទេស​ម៉ិ​ក​ស៊ិ​កបាន​និយាយ​កាលពី​ថ្ងៃ​អង្គា​រថា គោលនយោបាយ​ដែលជា​ការប៉ុនប៉ង​ចុងក្រោយ​បំផុត​របស់​ប្រធានាធិបតី​អាមេរិក​លោក Donald Trump ដើម្បី​រារាំង​ជនអន្តោប្រវេសន៍​គ្មាន​ឯកសារ​មួយ​នេះ​នឹងត្រូវ​អនុវត្ត​នៅ​ច្រកព្រំដែន​ទី​ពីរ​ពោលគឺ​នៅ​ចន្លោះ​ទីក្រុង Calexico នៃ​រដ្ឋ California និង​ទីក្រុង Mexicali នៃ​ប្រទេស​ម៉ិ​ក​ស៊ិ​ក។

វិធានការ​មួយ​នេះ​ដែល​ត្រូវបាន​រិះគន់​ដោយ​ក្រុម​សិទ្ធិមនុស្ស​គឺ​ត្រូវបាន​អនុវត្ត​ជា​លើកដំបូង​កាលពី​ខែមករា​នៅឯ​ច្រកព្រំដែន​ចន្លោះ​ទីក្រុង Tijuana និង​ទីក្រុង San Ysidro នៃ​រដ្ឋ California ។​
​ក្រសួងការបរទេស​ម៉ិ​ក​ស៊ិ​កបាន​និយាយ​នៅក្នុង​សេចក្តីថ្លែងការណ៍​មួយ​ថា “​រដ្ឋាភិបាល​ម៉ិ​ក​ស៊ិ​ក​បានបញ្ជាក់​ជាថ្មី​ថា ខ្លួន​មិន​យល់ព្រម​ជាមួយ​វិធានការ​ជា​ឯកតោភាគី​ដែល​អនុវត្ត​ដោយ​អាជ្ញាធរ​អាមេរិក​នេះ​ទេ​”។

គោលនយោបាយ​ដែល​គេ​ស្គាល់​ថា Migrant Protection Protocols នេះ​គឺ​អនុវត្ត​ចំពោះ​ជនអន្តោប្រវេសន៍​មិនមែនជា​ជនជាតិ​ម៉ិ​ក​ស៊ិ​ក។

លោក Trump ដែល​កាលពី​ដើមឡើយ​បានដាក់​ឈ្មោះ​គោលនយោបាយ​នេះ​ថា “Remain in Mexico” បានបង្ហាញ​នូវ​គំនិត​នេះ​កាលពី​ឆ្នាំមុន​ខណៈដែល​ក្បួន​ជា​បន្តបន្ទាប់​នៃ​ជនអន្តោប្រវេសន៍​អាមេរិក​កណ្តាល​រាប់ពាន់នាក់​បានធ្វើ​ដំណើ​រ​តាមផ្លូវ​ឆ្ពោះទៅ​ព្រំដែន​អាមេរិក​-​ម៉ិ​ក​ស៊ិ​ក។

ប្រទេស​ម៉ិ​ក​ស៊ិ​កបាន​និយាយថា ខ្លួន​កំពុង​ទាក់ទង​ជាមួយ​អាជ្ញាធរ​អាមេរិក​អំពី​ជន​ចំណាកស្រុក​ដែល​នឹង​ត្រូវបាន​បញ្ជូន​ត្រលប់​មកវិញ​ប៉ុន្តែ​សម្រាប់តែ “​ហេតុផល​មនុស្សធម៌​” ប៉ុណ្ណោះ​។​

ក្រុម​សិ​ទិ្ធ​មនុស្ស​អន្តរជាតិ​និង​មេធាវី​អន្តោប្រវេសន៍​អាមេរិក​បាន​ចោទប្រកាន់​រដ្ឋបាល​រប​ស់លោក Trump ថា​បាន​រំលោភច្បាប់​អន្តរជាតិ​ដោយ​ការបញ្ជូន​អ្នក​ដែល​កំពុង​ភៀសខ្លួន​ឲ្យ​វិល​ត្រលប់​ទៅ​ប្រទេសមួយ​ដែលជា​កន្លែង​ពួកគេ​អាច​ប្រឈម​នឹង​គ្រោះថ្នាក់​បន្ថែមទៀត៕ AFP

​

Source: Kampuchea Thmey Daily