ប្រដាល់ ៖ ចាន់ ប៊ុនហឿន អ្នកប្រដាល់ក្លិបនិរោធមានជ័យ និង រិទ្ធ ភូលូ អ្នកប្រដាល់ក្លិបអាណាចក្រគុនខ្មែរ ពួកគេទាំងពីរនាក់នេះ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នាយប់ថ្ងៃសុក្រ ទី២៦ ខែមេសា ឆ្នាំ២០១៩នេះ។
ចាន់ ប៊ុនហឿន អ្នកប្រដាល់ជើងខ្លាំងស្រករ នឹងត្រូវគេផ្គូឲ្យជួបជាមួយអ្នកប្រដាល់ជើងខ្លាំងមកពីប្រទេសថៃឈ្មោះហ្វានិមិត្ត វីរីយ៉ាកហ្វាម (Fanimit Viriyakfarm) ដោយជួបគ្នាក្នុងទម្ងន់៦៣,៥០០គីឡូក្រាម។ ចាន់ ប៊ុនហឿន ជើងខ្លាំងរបស់កម្ពុជានេះ គេទើបតែវាយស្មើជាមួយអ្នកប្រដាល់ថៃឈ្មោះ ផេត ផូស្រ៊ី កាលពីថ្ងៃទី០១ ខែមីនា ឆ្នាំ២០១៩កន្លងទៅ។
ចាន់ ប៊ុនហឿន ជាលើកទី៤០ របស់គេហើយ ដែលជួបប្រកួតជាមួយថៃនេះ។ ប៊ុនហឿន ប្រកួតជាមួយថៃ៣៩លើកកន្លងមកនេះ គឺឈ្នះ២៨លើក ចាញ់០៨លើក និងស្មើ០៣លើក។ ហ្វានិមិត្ត គេជាអ្នកប្រដាល់ដែលធ្លាប់មកប្រកួតនៅកម្ពុជាយើងច្រើនលើកហើយនាពេលកន្លងមក។ យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ។ ព្រោះបើតាមអ្នកដឹកនាំកីឡាករថៃមកប្រកួតឲ្យដឹងនោះថា ហ្វានិមិត្ត គេល្អ និងខ្លាំង ដែលមិនអាចមើលស្រាលបានឡើយ។
ហ្វា នីមិត្ត គេជាអ្នកប្រដាល់ថៃជើងចាស់ ហើយអ្នកប្រដាល់រូបនេះ ក៏វាយខ្លាំងមិនចាញ់ចាន់ ប៊ុនហឿន ប៉ុន្មានដែរ។ អ្នកប្រដាល់រូបនេះ ក៏វាយសម្រុកមិនចេះខ្លាចគូប្រកួតដែរ។ ហ្វានិមិត្ត គេមានកំណត់ត្រាប្រកួតចំនួន៨០លើក ឈ្នះ៥៦លើក ចាញ់២២លើក និងស្មើ០២លើក ហើយធ្លាប់ផ្ដួលដៃគូឲ្យសន្លប់ជាច្រើនលើក។ ហ្វានិមិត្ត កាលពីថ្ងៃទី៣០ ខែមីនា ឆ្នាំ២០១៩កន្លងទៅនេះ បានផ្ដួលអ្នកប្រដាល់ជើងថ្មីកម្ពុជា សឿន ឆ្នើម ឲ្យបោះបង់ការប្រកួតក្នុងទឹកទី១។
ចាន់ ប៊ុនហឿន គេមានប្រវត្តិប្រកួតចំនួន៨៩លើក ឈ្នះ៧១លើក និងចាញ់១៤លើក និងស្មើ០៤
លើក ។ ប៊ុនហឿន គេមានថ្វីកែងនិងជង្គង់ល្អណាស់ តែយ៉ាងណាការឈ្នះចាញ់រវាង ចាន់ ប៊ុនហឿន និង ហ្វា នីមិត្ត នេះ ពុំមាននរណាហ៊ានទាយមុនថាអ្នកណាឈ្នះនោះទេ?។
ចំពោះ អ្នកប្រដាល់ជើងខ្លាំងស្រករក្រោយ រិទ្ធ ភូលូ ក្លិបអាណាចក្រគុនខ្មែរ នឹងត្រូវជួបសាកកណ្ដាប់ដៃជាមួយអ្នកប្រដាល់ថៃជើងខ្លាំងឈ្មោះប្រាកាយផេត និតអ៊ីសាមួយ (Prakaypetch Nithisa muy)។ ពួកគេទាំងពីរ ប្រកួតគ្នាក្នុងទម្ងន់៦៣,៥០០គីឡូក្រាមដែរ។
ជាលើកទី១៨ សម្រាប់រិទ្ធ ភូលូ ហើយ ដែលបានជួបប្រកួតជាមួយអ្នកប្រដាល់ថៃនេះ។ ក្នុង១៦លើកកន្លងមក ភូលូ វាយឈ្នះថៃ១៤លើក និងចាញ់៣លើក។ ការជួបថៃលើកចុងក្រោយនេះ (៣១មីនា២០១៩) ភូលូ វាយចាញ់ថៃ Rithiara ដោយពិន្ទុ។
រិទ្ធ ភូលូ ទោះជាគេទើបបានផ្គូផ្គងឲ្យជួបបរទេសក៏ដោយ តែដោយសារមានចិត្តប្រដាល់ធំ គេឡើងប្រកួតដោយគ្មានខ្លាចញញើតទេ។ គេទើបឡើងប្រកួតបានចំនួន៦៣លើកប៉ុណ្ណោះ ក្នុងនោះ វាយឈ្នះ៤៥លើក ចាញ់១៤លើក និងស្មើ០៤លើក ហើយធ្លាប់ផ្ដួលដៃគូឲ្យសន្លប់បានចំនួន១៨លើក។
ប្រាកាយផេត គេជាអ្នកប្រដាល់ថៃជើងចាស់ ធ្លាប់មកប្រកួតនៅកម្ពុជាយើងម្តងពីរដងហើយ កន្លងមក ។ យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ។ ព្រោះបើតាមប្រវត្តិ ប្រាកាយផេត ល្អនិងខ្លាំង ដែលមិនអាចមើលស្រាលបានឡើយ។ អ្នកប្រដាល់ថៃនេះ ជាជើងខ្លាំងទម្ងន់៦៣,៥០០គីឡូក្រាមប្រចាំនៅស្រុកថៃ។ គេមានប្រវត្តិប្រកួតតែចំនួន៧៣លើក ក្នុងនោះវាយឈ្នះ៥៨លើក ចាញ់១២លើក និងស្មើ០៣លើក។
អ្នកប្រដាល់ថៃរូបនេះ មានផ្លែមុតស្រួចល្អ ទាំងកណ្ដាប់ដៃ ទាត់ និង ជង្គង់ ហើយថែមទាំងមិនចេញខ្លាចទៀតផង។ បើប្រៀបជាមួយរិទ្ធ ភូលូ គឺមិនដឹងថា យ៉ាងណានោះទេ ព្រោះថា រិទ្ធ ភូលូ គេក៏វាយមិនចេះខ្លាចដែរនោះ។
យ៉ាងណា ប៉ះជាមួយរិទ្ធ ភូលូ ប្រាកាយផេតក៏មិនជាស្រួលប៉ុន្មានដែរ ព្រោះថា ភូលូ គេវាយបុកខ្លាំង កណ្ដាប់ដៃខ្លាំង ទម្ងន់ជើងក៏ធ្ងន់ដែរ។ តែយ៉ាងណា រិទ្ធ ភូលូ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើ រិទ្ធ ភូលូ អាចយកឈ្នះប្រាកាយផេត បានឬអត់ ក្នុងការជួបគ្នាលើកដំបូងនេះ?។
ដោយឡែក អ្នកប្រដាល់រឿន សុខលី ក្លិបការិយាល័យទី៥ កងទ័ពជើងគោក ត្រូវគេផ្គូឲ្យជួបប្រកួតជាមួយ យ៉ន ពិសី អ្នកប្រដាល់ក្លិបសាលវ័ន្តកីឡា។ ពីរនាក់នេះ ប្រកួតគ្នាក្នុងទម្ងន់៥៤គីឡូក្រាម។
ចំណែកម៉ិល សារុន អ្នកប្រដាល់ក្លិបអាណាចក្រគុនខ្មែរ នឹងត្រូវជួបប្រកួតជាមួយ ឡុង សំណាង អ្នកប្រដាល់ក្លិបពន្លឺវិបុលមានរិទ្ធ ដោយជួបប្រកួតគ្នាក្នុងប្រភេទទម្ងន់៦០គីឡូក្រាម៕
Source: Kampuchea Thmey Daily
0 Comments