ប្រមុខក្រុមឧទ្ទាមយេមែនបានព្រមានកាលពីថ្ងៃចន្ទថាក្រុមឧទ្ទាមអាចនឹងបើកការវាយប្រហារប្រឆាំងនឹងគោលដៅក្នុងប្រទេសអារ៉ាប៊ីសាអ៊ូឌីតនិងអារ៉ាប់រួមដែលដឹកនាំក្រុមចម្រុះយោធាប្រឆាំងនឹងពួកគេ។លោក Abdulmalik al-Huthi បាននិយាយថាក្រុមឧទ្ទាមបានត្រៀមខ្លួនបន្តប្រយុទ្ធប្រឆាំងនឹងក្រុមចម្រុះនៅក្នុងសង្គ្រាមរយៈពេលបួនឆ្នាំមួយដែលបានរុញច្រានឲ្យប្រទេសនេះធ្លាក់ចូលក្នុងគ្រោះទុរ្ភិក្ស។
លោកបាននិយាយនៅក្នុងបទសម្ភាសន៍ទូរទស្សន៍ដ៏កម្រមួយដែលផ្សាយដោយទូរទស្សន៍ Al-Masirah ដែលគ្រប់គ្រងដោយក្រុម Huthi ថា “យើងត្រៀមខ្លួនរួចរាល់ហើយនៅលើដីនិងនៅសមរភូមិជួរមុខ”។លោក Huthi បាននិយាយថា ក្រុមឧទ្ទាមមានសមត្ថភាពឈានដល់គោលដៅសំខាន់និងជាយុទ្ធសាស្ត្រនៅក្នុងប្រទេសអារ៉ាប៊ីសាអ៊ូឌីតនិងអារ៉ាប់រួមប្រសិនបើមានការកើនឡើងនៃការប្រយុទ្ធគ្នានៅក្នុងទីក្រុងកំពង់ផែ Hodeida។
លោកបាននិយាយថា “មីស៊ីលអាចទៅដល់គោលដៅទីក្រុងរីយ៉ាដអាប៊ូដាប៊ីនិងឌូបៃនិងគោលដៅសំខាន់”។ពួកឧទ្ទាម Huthi ដែលមានទំនាក់ទំនងជាមួយប្រទេសអ៊ីរ៉ង់បានតម្រង់គោលដៅលើទីក្រុងព្រំដែនអារ៉ាប៊ីសាអ៊ូឌីតនិងរដ្ឋធានីរីយ៉ាដដោយមីស៊ីលផ្លោងហើយក៏បានអះអាងចំពោះការវាយប្រហារដោយយន្តហោះគ្មានមនុស្សបើកលើព្រលានយន្តហោះក្រុងអាប៊ូដាប៊ីនិងឌូបៃផងដែរអំឡុងពេលជម្លោះ។
ប្រទេសអារ៉ាប៊ីសាអ៊ូឌីតបាននិយាយថាមីស៊ីលទាំងអស់ត្រូវបានស្ទាក់ចាប់ដោយកងកម្លាំងអាកាសរបស់ខ្លួនខណៈជនស៊ីវិលម្នាក់ត្រូវបានគេរាយការណ៍ថាត្រូវបានសម្លាប់ដោយការធ្លាក់អំបែងគ្រាប់សង្កត់លើស្របពេលដែលប្រទេសអារ៉ាប់រួមបានបដិសេធការចោទប្រកាន់អំពីការវាយប្រហារដោយយន្តហោះគ្មានមនុស្សបើក។
ប្រទេសអារ៉ាប៊ីសាអ៊ូឌីតនិងសម្ព័ន្ធមិត្តយោធារបស់ខ្លួនបានចូលរួមក្នុងសង្គ្រាមរបស់ប្រទេសយេមែនប្រឆាំងនឹងក្រុម Huthi ក្នុងខែមីនាឆ្នាំ២០១៥ដែលបង្កឲ្យមាននូវអ្វីដែលអង្គការសហប្រជាជាតិហៅថាជាវិបត្តិមនុស្សធម៌ដ៏អាក្រក់បំផុតរបស់ពិភពលោក។ភាគីទាំងសងខាងនៅក្នុងជម្លោះនេះត្រូវរងការចោទប្រកាន់សម្រាប់សកម្មភាពដែលអាចបង្កទៅជាឧក្រិដ្ឋកម្មសង្គ្រាម។
អង្គការសុខភាពពិភពលោកបានប៉ាន់ប្រមាណថា មនុស្សជិត១ម៉ឺននាក់ត្រូវបានសម្លាប់នៅក្នុងប្រទេសយេមែនចាប់តាំងពីខែមីនាឆ្នាំ២០១៥មកខណៈដែលក្រុមសិទ្ធិមនុស្សផ្សេងទៀតបានប៉ាន់ស្មានថា ចំនួនអ្នកស្លាប់អាចខ្ពស់ជាងនេះ៕ AFP
Source: Kampuchea Thmey Daily
0 Comments