កំពង់ឆ្នាំង ៖ ដោយពិនិត្យឃើញនូវការលំបាក និងការខ្វះខាតរបស់ប្រជាពលរដ្ឋ អណ្ដូងស្នប់ចំនួន៣ និងអណ្ដូងចំនួន 100 អណ្ដូង ដែលជាព្រះរាជអំណោយដ៏ថ្លៃថ្លារបស់ ព្រះបាទសម្តេច នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រូវបានសម្ដេចជហ្វាវាំង គង់ សំអុល ប្រធានក្រុមការងារថ្នាក់ជាតិចុះជួយខេត្តកំពង់ឆ្នាំង ជួយឧបត្ថម្ភដល់ប្រជាពលរដ្ឋរស់នៅក្នុង ឃុំឆ្នុកទ្រូ ស្រុកបរិបូណ៌ ខណៈដែលពួកគាត់បានបម្លាស់ទីផ្ទះទឹកពីក្នុងទន្លេ ឡើងមករស់នៅលើគោក។
លោក សាំង គឹមស៊ន មេឃុំឆ្នុកទ្រូ នៅព្រឹកថ្ងៃទី22 ខែមេសា ឆ្នាំ2019 បាននិយាយឲ្យដឹងថា ដោយពិនិត្យឃើញការលំបាក និងសេចក្តីត្រូវការដ៏ចាំបាច់របស់ប្រជាពលរដ្ឋនៅក្នុងឃុំឆ្នុកទ្រូ ដែលកំពុងជួបការលំបាកខ្វះខាតទឹកប្រើប្រាស់ប្រចាំថ្ងៃ ក្នុងពេលពួកគាត់បន្លាស់ផ្ទះបណ្ដែតទឹកពីក្នុងទន្លេឡើងមករស់នៅលើគោក សម្ដេច ជហ្វាវាំង គង់ សំអុល ប្រធានក្រុមការងារថ្នាក់ជាតិចុះជួយខេត្តកំពង់ឆ្នាំង បាននាំយកព្រះរាជអំណោយរបស់ ព្រះបាទសម្ដេចនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នូវអណ្ដូងលូចំនួន100 និងអណ្ដូងស្នប់ចំនួន 3 អណ្ដូង ឧបត្ថម្ភដល់ប្រជាពលរដ្ឋរស់នៅក្នុងឃុំឆ្នុកទ្រូ។
លោក សាំង គឹមស៊ន បានបញ្ជាក់ឲ្យដឹងថា អំណោយដ៏ថ្លៃថ្លាខាងលើនេះ គឺបានបែងចែកជូន ប្រជាពលរដ្ឋចំនួន៣ភូមិ គឺភូមិសេះស្លាប់ទទួលបានអណ្តូងលូចំនួន 26 អណ្ដូង ដែលបាននិងកំពុងកសាងជិតរួចរាល់ហើយ និងអណ្ដូងស្នប់ចំនួន៣អណ្តូង ក្នុងនោះអណ្ដូងស្នប់០១គ្រឿង ជាអំណោយរបស់ ឯកឧត្ដម សូ ស៊ីនួន ប្រធានក្រុមការងារថ្នាក់កណ្ដាលចុះជួយឃុំឆ្នុកទ្រូ។ ចំណែកប្រជាពលរដ្ឋរស់នៅភូមិកំពង់ព្រះ ទទួលបានអណ្ដូងលូចំនួន 24 ផងដែរ ដែលមកដល់ពេលនេះកសាងបាន 10 អណ្ដូងរួចហើយ។ ដោយឡែកប្រជាពលរដ្ឋ នៅក្នុងភូមិឆ្នុកទ្រូ និង ទទួលបានអណ្តូងលូចំនួន 50 ដែលនឹងត្រូវកសាងជាបន្តបន្ទាប់ក្នុងពេលខាងមុខនេះ។
ប្រជាពលរដ្ឋរស់នៅក្នុងភូមិសេះស្លាប់បានឲ្យដឹងថា ក្រោយពេលបន្លាស់ទីផ្ទះបណ្តែតទឹកពីក្នុងទន្លេឡើងមករស់នៅលើគោកវិញនោះ ពួកគាត់ពិតជាជួបការលំបាកយ៉ាងខ្លាំងចំពោះបញ្ហាទឹកស្អាតសម្រាប់ប្រើប្រាស់ប្រចាំថ្ងៃ ដោយកន្លងមកពួកគាត់បានដឹកទឹកពីទន្លេ ឬទិញទឹកពីកន្លែងនានាមកប្រើប្រាស់។ ចំពោះអំណោយអណ្ដូងទាំងអស់ខាងលើនេះ ពួកគាត់សូមថ្លែងអំណរគុណយ៉ាងជ្រាលជ្រៅ ដល់ សម្ដេចជវាហ្វាវាំង គង់ សំអុល ដែលបាននាំយកអំណោយដ៏ថ្លៃថ្លារបស់ ព្រះបាទសម្ដេចនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា មកឧបត្ថម្ភជូនប្រជាពលរដ្ឋក្រីក្រកំពុងជួបការលំបាក ដោយពួកគាត់សូមគោរពជូនពរដល់ ព្រះមហាក្សត្រ នៃព្រះរាជាណាចក្រកម្ពុជា និង សម្តេច គង់ សំអុល សូមឲ្យមានព្រះរាជសុខភាព និង សុខភាពល្អបរិបូរណ៍ បញ្ញាវាងវៃ ជួបប្រទះតែនឹងសេចក្តីសុខគ្រប់ប្រការ ដើម្បីដឹកនាំព្រះរាជាណាចក្រកម្ពុជា ប្រកបដោយសុខសន្តិភាព និងមានការអភិវឌ្ឍន៍លើគ្រប់វិស័យរហូតតទៅ៕
Source: Kampuchea Thmey Daily
0 Comments