ភ្នំពេញ ៖ រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍនា បានសម្រេចផ្អាកមុខងារជាបណ្ដោះអាសន្នរបស់ លោក ជា សុវណ្ណថេត ព្រះរាជអាជ្ញារង នៃអយ្យការអមសាលាដំបូងខេត្តកំពង់ធំ ដោយសំអាងថា ព្រះរាជអាជ្ញារងរូបនេះ មានជាប់ទាក់ទងទៅនឹងការផ្ដើមគំនិតក្នុងអំពើកាប់ឆ្ការ ឈូសឆាយព្រៃលិចទឹក និងព្រៃកោងកាង និងហ៊ុមព័ទ្ធកាន់កាប់ព្រៃលិចទឹក ព្រៃកោងកាង នៅចំណុច
ភូមិនាងសាវ ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ នេះបើតាមលិខិតដែលកម្ពុជាថ្មី ទើបទទួលបាននៅថ្ងៃទី២៣ ខែមេសា ឆ្នាំ២០១៩។
តាមលិខិតដែលចុះហត្ថលេខាដោយ លោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ ដែលផ្ញើជូនព្រះរាជអាជ្ញា នៃអយ្យការអមសាលាដំបូងខេត្តកំពង់ធំ ស្ដីពីការផ្អាកមុខងារជាបណ្ដោះអាសន្នរបស់លោក ជា សុវណ្ណថេត ព្រះរាជអាជ្ញារង នៃអយ្យការអមសាលាដំបូងខេត្តកំពង់ធំបានបញ្ជាក់ថា ក្រសួងយុត្តិធម៌បានទទួលនូវលិខិតលេខ០៩/១៩ ចុះថ្ងៃទី១៨ ខែមេសា ឆ្នាំ២០១៩ និងដីកាសន្និដ្ឋានបញ្ជូនរឿងឲ្យស៊ើបសួរលេខ១០៦២/១៩ ចុះថ្ងៃទី១៩ ខែមេសា ឆ្នាំ២០១៩ និងលិខិតលេខ១១.អកចុះថ្ងៃទី១៩ ខែមេសា ឆ្នាំ២០១៩ របស់អយ្យការអមសាលាដំបូងខេត្តកំពង់ធំ ដែលបានជូនដំណឹងស្ដីពីការចោទប្រកាន់លើ ឈ្មោះ ជា សុវណ្ណថេត ព្រះរាជអាជ្ញារង ពីបទផ្ដើមគំនិតក្នុងការកាប់ឆ្ការគាស់ ឈូសឆាយព្រៃលិចទឹក និងព្រៃកោងកាង ឬកាន់កាប់ព្រៃឈើលិចទឹក និងព្រៃកោងកាងប្រព្រឹត្តនៅចំណុចបឹងអត្រាព្រួល ស្ថិតនៅភូមិទួលនាងសាវ ឃុំផាត់សណ្ដាយ ស្រុកកំពង់ស្វាយខេត្តកំពង់ធំ កាលពីថ្ងៃទី១៣ ដល់ថ្ងៃទី១៧ ខែមេសា ឆ្នាំ២០១៩ ដែលជាបទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមបញ្ញត្តិមាត្រា២៨ នៃក្រមព្រហ្មទណ្ឌ និងមាត្រា៩៨ នៃច្បាប់ស្ដីពីជលផល។
តាមលិខិតចុះថ្ងៃទី២២ ខែមេសា ឆ្នាំ២០១៩ ដដែលបញ្ជាក់ថា តាមមាត្រា៥៨ និងមាត្រា១០០ នៃច្បាប់ ស្ដីពីលក្ខន្តិកៈ នៃចៅក្រម និងព្រះរាជអាជ្ញា ក្រសួងស្នើឲ្យលោកព្រះរាជអាជ្ញាធ្វើការផ្អាកមុខងាររបស់ លោក ជា សុវណ្ណថេត ព្រះរាជអាជ្ញារង ជាបណ្ដោះអាសន្នរហូតដល់មានសេចក្ដី សម្រេចរបស់តុលាការអំពីទោសជាស្ថាពរ។
ទាក់ទងបញ្ហានេះ លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងប្រាប់កម្ពុជាថ្មីកាលពីព្រឹកថ្ងៃទី២៣ ខែមេសា ឆ្នាំ២០១៩ ថា នេះជាបែបបទរដ្ឋបាល កាលណាមន្ត្រីណាមួយជាប់បណ្តឹងអាជ្ញាឬស្ថិតក្នុងដំណើរនីតិវិធីតុលាការ ច្បាប់តម្រូវឲ្យផ្អាកការងារសិន ដើម្បីជាប្រយោជន៍ នៃការស៊ើបអង្កេត៕
Source: Kampuchea Thmey Daily
0 Comments