ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្ដីណែនាំ ស្ដីពីការបង្កើនវិធានការបង្ការ ទប់ស្កាត់ និងបង្ក្រាបបទឧក្រិដ្ឋឆ្លងដែន។ នេះបើតាមសេចក្ដីណែនាំ ដែលកម្ពុជាថ្មីទទួលបាន កាលពីព្រឹកថ្ងៃទី២៣ ខែមេសា ឆ្នាំ២០១៩នេះ។
សម្ដេចក្រឡាហោម ស ខេង បានណែនាំដល់កងកម្លាំងនគរបាលជាតិ និងសមត្ថកិច្ច ដែលមានការពាក់ព័ន្ធ ត្រូវលើកកម្ពស់ស្មារតីទទួលខុសត្រូវ ឲ្យបានជាប់ជាប្រចាំ និងចាត់វិធានការប្រកបដោយប្រសិទ្ធភាព ក្នុងការប្រយុទ្ធប្រឆាំងឧក្រិដ្ឋកម្មឆ្លងដែនគ្រប់ប្រភេទ មានជាអាទិ៍អំពើភេរវកម្ម ការចរាចរជួញដូរគ្រឿងញៀនខុសច្បាប់ បទល្មើសសម្អាតប្រាក់ ការជួញដូររត់ពន្ធមនុស្ស ការជួញដូរអាវុធខុសច្បាប់ និងបទល្មើសបច្ចេកវិទ្យា។
នៅក្នុងសេចក្ដីណែនាំបានលើកឡើងថា ក្រសួងមហាផ្ទៃ សូមសំដែងនូវការកោតសរសើរ និងវាយតម្លៃខ្ពស់ចំពោះកងកម្លាំងនគរបាលជាតិដែលបានខិតខំតស៊ូ និងសហការជាមួយនឹងសមត្ថកិច្ចពាក់ព័ន្ធ ដើម្បីប្រឆាំងបទល្មើសគ្រប់ប្រភេទប្រកបដោយឆន្ទៈមោះមុត និងស្មារតីទទួលខុសត្រូវខ្ពស់សម្រេចបានលទ្ធផលដ៏ធំធេងក្នុងការរក្សាសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គមជាពិសេសការតស៊ូប្រឆាំងនឹងឧក្រិដ្ឋកម្មឆ្លងដែនដែលខិតខំទប់ស្កាត់នូវហានិភ័យដែលអាចបង្កអសន្តិសុខភាពវឹកវរ ចលាចល និងមហន្តរាយធ្ងន់ធ្ងរចំពោះសង្គមទាំងមូលកិត្តិយស និងកិត្យានុភាពជាតិ។ ប៉ុន្តែនាពេលថ្មីៗនេះ ក្រសួង បានទទួលព័ត៌មាន និងធ្វើការកត់សម្គាល់នូវសញ្ញាណ ទាក់ទងដល់ការប៉ុនប៉ងលួចលាក់ធ្វើសកម្មភាពឧក្រិដ្ឋកម្មឆ្លងដែននៅភូមិសាស្ត្រមួយចំនួន មានការធ្វេសប្រហែសខ្វះការប្រុងប្រយ័ត្ន។
សេចក្ដីណែនាំរបស់សម្ដេចក្រឡាហោម ស ខេង បានសង្កត់ធ្ងន់ទៀតថា ដើម្បីបន្តថែរក្សាពង្រឹងនូវសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម ដោយមិនទុកឲ្យមានភាពចន្លោះប្រហោងសម្រាប់ពួកឧក្រិដ្ឋជនធ្វើសកម្មភាពបំផ្លិចបំផ្លាញសង្គមជាតិបាន ក្រសួងមហាផ្ទៃ សូមធ្វើការណែនាំដល់កងកម្លាំងនគរបាលជាតិ និងសមត្ថកិច្ច ក្រោមឱវាទដែលមានការពាក់ព័ន្ធត្រូវលើកកម្ពស់ស្មារតីទទួលខុសត្រូវឲ្យបាននៅជាប់ជាប្រចាំនឹងបាត់ចាត់វិធានការប្រកបដោយប្រសិទ្ធភាពក្នុងការប្រយុទ្ធប្រឆាំងឧក្រិដ្ឋកម្មឆ្លងដែនគ្រប់ប្រភេទមានជាអាទិ៍អំពើភេរវកម្ម ការចរាចរជួញដូរគ្រឿងញៀនខុសច្បាប់ បទល្មើសសំអាតប្រាក់ ការជួញដូររត់ពន្ធមនុស្ស ការជួញដូរអាវុធខុសច្បាប់ និងបទល្មើសបច្ចេកវិទ្យា.. ។ល។
ដោយឡែក ពាក់ព័ន្ធនឹងបទល្មើសជួញដូរគ្រឿងញៀន និងការសំអាតប្រាក់ ទន្ទឹមនឹងការយកចិត្តទុកដាក់ចំពោះវិធានការទាំងឡាយដែលបានដាក់ចេញដោយគណៈកម្មាធិការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងគណៈកម្មាធិការសម្របសម្រួលថ្នាក់ជាតិប្រឆាំងការសំអាតប្រាក់និងហិរញ្ញប្បទានភេរវកម្ម (គ ស ហ ) ក្រសួងមហាផ្ទៃ សូមដាក់ចេញនូវបទបញ្ជាដល់អគ្គស្នងការដ្ឋាននគរបាលជាតិ និងអគ្គនាយកដ្ឋានអន្តោប្រវេសន៍ ត្រូវបង្កើនវិធានការក្នុងការសហការស្រាវជ្រាវបង្ការទប់ស្កាត់ និងបង្ក្រាបឲ្យបានយ៉ាងម៉ឺងម៉ាត់នៅតាមច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វេភាគី ច្រកទ្វារតំបន់ព្រំដែនកំពង់ផែសមុទ្រ និងតាមខ្សែបន្ទាត់ព្រំដែនហើយត្រូវរាយការណ៍ស្នើសុំគោលការណ៍ចង្អុលដឹកនាំបន្ទាន់ពីក្រសួងមហាផ្ទៃ ក្នុងករណីមានបទល្មើសកើតឡើង។
នៅក្នុងសេចក្ដីណែនាំរបស់សម្ដេចក្រឡាហោម ស ខេង ក៏បានបញ្ជាក់ផងដែរថា អគ្គលេខាធិការដ្ឋានក្រសួងមហាផ្ទៃ អគ្គអគ្គស្នងការនគរបាលជាតិ អគ្គនាយកដ្ឋានអន្តោប្រវេសន៍អគ្គនាយកដ្ឋានរដ្ឋបាល និងអង្គភាពក្រោមឱវាទ ដែលមានការពាក់ព័ន្ធ ត្រូវចាត់ចែងអនុវត្តសេចក្ដីណែនាំនេះឲ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខានេះតទៅ៕
Source: Kampuchea Thmey Daily
0 Comments