ភ្នំពេញ ៖ បុរសម្នាក់ បានស្លាប់ភ្លាមៗនៅនឹងកន្លែងកើតហេតុ ខណៈជិះម៉ូតូម្នាក់ឯង ត្រូវបានរថយន្តកុងតឺន័រ បើកកៀរ រួចកិនពីក្រោយ អូសជាង១០ម៉ែត្រ ស្លាប់យ៉ាងអាណោចអាធ័ម កាលពីវេលាម៉ោង៩និង៣០នាទីយប់ ថ្ងៃទី១៩ ខែមេសា ឆ្នាំ២០១៩ ចំណុចមុខក្រុមហ៊ុនក្រេនស្តារ តាមបណ្ដោយផ្លូវទំនប់កប់ស្រូវ ( ផ្លូវវិមានឈ្នះឈ្នះ) ស្ថិតក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ។
សពជនរងគ្រោះមាន ឈ្មោះ ល័ក្ខ អាយុប្រហែល២៦ឆ្នាំ ជិះម៉ូតូម៉ាកSUZUKI ស្មាក់រ៉េវ៉ូ ពណ៌ខ្មៅ ពាក់ស្លាកលេខ ភ្នំពេញ1AR -2216 មុខរបរកម្មករសិប្បកម្មឈើ មានស្រុកកំណើតនៅភូមិ៣២ ឃុំបុលខ្នុរ ស្រុកចំការលើ ខេត្តកំពង់ចាម មានប្រពន្ធ និង កូនស្រី២នាក់ ក្នុងបន្ទុកផងដែរ។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញជនរងគ្រោះ ជិះម៉ូតូធ្វើដំណើរតែម្នាក់ឯង តាមបណ្ដោយផ្លូវទំនប់កប់ស្រូវ ទិសដៅពីជើងទៅត្បូង ក្នុងល្បឿនល្មមៗ ខណៈមកដល់ចំណុចកើតហេតុ ស្រាប់តែមានរថយន្តកុងតឺន័របង្កហេតុ មិនចាំស្លាកលេខ បានបើកមកពីក្រោយ ហើយកៀរជនរងគ្រោះឲ្យដួល អូសទាំងម៉ូតូ និង ម្ចាស់ ប្រហែល១០ម៉ែត្រ និង កិនជនរងគ្រោះ ចំពាក់កណ្ដាលខ្លួនបណ្ដាលឲ្យស្លាប់ភ្លាមៗនៅនឹងកន្លែងកើតហេតុ រួចរថយន្តបន្តល្បឿន ចូលទៅក្រុមហ៊ុនបាត់ស្រមោលតែម្ដង។
បើតាមសម្ដីមេជាងរបស់ជនរងគ្រោះបានប្រាប់ឲ្យដឹងថា នៅថ្ងៃកើតហេតុ ជនរងគ្រោះទើបតែត្រឡប់មកពីលេងស្រុកកំណើត នៅឯខេត្តកំពង់ចាម ហើយតេទៅប្រាប់ប្រពន្ធកូនថា រូបគេមកដល់ភ្នំពេញហើយ សូមកុំឲ្យមានការព្រួយបារម្ភ។ បន្តិចក្រោយមក ជនរងគ្រោះ ក៏ខ្ចីលុយគាត់ជាមេជាងចំនួន៥$ រួចជិះម៉ូតូចេញក្រៅបាត់ មិនទាន់បានប៉ុន្មាននាទីផង ស្រាប់តែមានគេតេមកប្រាប់ ថា ម្ចាស់ទូរស័ព្ទត្រូវរថយន្តកិនស្លាប់ហើយ។
ក្រោយមក សមត្ថកិច្ចមូលដ្ឋាន បានចុះមកដល់ទីតាំងកើតហេតុ និងបានធ្វើការស្រាវជ្រាវក្រែងអាច រករថយន្តបង្ក និងតៃកុង មកទទួលខុសត្រូវ ចំពោះមុខច្បាប់បាន។ ចំណែកសព ត្រូវសាច់ញាតិដឹកយកទៅធ្វើបុណ្យតាមប្រពៃណីនៅឯស្រុកកំណើត៕
Source: Kampuchea Thmey Daily
0 Comments