ក្រុមអ្នកជួយសង្គ្រោះហ្វីលីពីនកំពុងព្យាយាមស្វែងរកមនុស្សជាង២០នាក់ដែលត្រូវបានគេបារម្ភថាកប់នៅក្រោមអគារមួយក្បែរទីក្រុងម៉ានីលដែលបានដួលរលំកាលពីថ្ងៃច័ន្ទនៅក្នុងការរញ្ជួយដីដ៏ខ្លាំងមួយខណៈការរញ្ជួយថ្មីដ៏ខ្លាំងក្លាបានវាយប្រហារប្រទេសនេះ។
ក្រុមស្ទាបស្ទង់ភូមិសាស្ត្ររបស់សហរដ្ឋអាមេរិកបានកំណត់ថា ការរញ្ជួយដីថ្មីនៅលើកោះ Samar គឺមានកម្រិត៦,៣រ៉ិចទ័រពោលគឺវាមានកម្លាំងខ្លាំងជាងការ រញ្ជួយមួយដែលវាយប្រហារជិតរដ្ឋធានីនៅភាគខាងជើងកាលពីថ្ងៃចន្ទ។អាជ្ញាធរកំពុងធ្វើការវាយតម្លៃអំពីការខូចខាតពីការរញ្ជួយដីចុងក្រោយបង្អស់ដែលបានវាយប្រហារនៅជម្រៅ៧០គីឡូម៉ែត្រ។
មន្ត្រីគ្រោះមហន្តរាយបាននិយាយថា ការខូចខាតដ៏អាក្រក់បំផុតពីហេតុការណ៍ថ្ងៃចន្ទគឺនៅក្នុងខេត្ត Pampanga ដែលនៅទីនោះមានអ្នកស្លាប់ចំនួន១១នាក់។ យោងតាមប៉ូលិសបានឲ្យដឹងថា មនុស្សជាង១០០នាក់ទៀតបានរងរបួសដោយការធ្លាក់កម្ទេចកម្ទីលើដោយរួមទាំងនៅក្នុងទីក្រុងម៉ានីលផងដែរ។
ចំនួនអ្នកស្លាប់អាចកើនឡើងជាបន្តទៀតខណៈដែលក្រុមការងារត្រូវបានដាក់ពង្រាយនៅតាមតំបន់ជនបទភាគច្រើនដើម្បីវាយតម្លៃការខូចខាតនៅកន្លែងដាច់ស្រយាលដែលដាច់ចរន្តអគ្គិសនីនិងការទំនាក់ទំនង។អ្នកជំនាញខាងរញ្ជួយដីហ្វីលីពីនបាននិយាយថា មានការរញ្ជួយតូចៗជាង៤០០លើកចាប់តាំងពីការរញ្ជួយដីលើកដំបូង។
ក្រុមអ្នកជួយសង្គ្រោះជាច្រើននាក់នៅក្នុងទីក្រុង Porac បានប្រើម៉ាស៊ីនស្ទូចនិងឧបករណ៍បុកថ្មដើម្បីទាញយកបំណែកថ្មនៃអគារផ្សារទំនើបកម្ពស់បួនជាន់មួយដែលនៅទីនោះកាកបាទក្រហមបាននិយាយថា មនុស្សចំនួន២៤នាក់កំពុងបាត់ខ្លួន។
អភិបាលខេត្ត Pampanga ឈ្មោះ Lilia Pineda បានប្រាប់ក្រុមអ្នកសារព័ត៌មានថា អ្នកជួយសង្គ្រោះនៅតែអាចឮសំឡេងមនុស្សយ៉ាងតិចម្នាក់ដែលជាប់នៅក្រោមបំណែកថ្មប៉ុន្តែការជីកមានការប្រុងប្រយ័ត្នដើម្បីជៀសវាងការសង្កត់ថ្មជនរងគ្រោះដោយចៃដន្យ។
ការរញ្ជួយដីនេះក៏បានធ្វើឲ្យខូចខាតដល់ព្រះវិហារដែលមានអាយុកាលរាប់សតវត្សរ៍ជាច្រើនផងដែរ។អ្នកដំណើររាប់ពាន់នាក់ត្រូវជាប់គាំងបន្ទាប់ពីអាជ្ញាធរអាកាសចរណ៍បានបិទព្រលានយន្តហោះ Clark។គួរបញ្ជាក់ថា ប្រទេសហ្វីលីពីនគឺជាផ្នែកមួយនៃ “Ring of Fire” ប៉ាស៊ីហ្វិកដែលជាទីតាំងមានសកម្មភាពរញ្ជួយដីដ៏ខ្លាំងក្លាដែលលាតសន្ធឹងពីប្រទេសជប៉ុនតាមអាស៊ីអាគ្នេយ៍និងឆ្លងកាត់តំបន់ប៉ាស៊ីហ្វិក៕ AFP
Source: Kampuchea Thmey Daily
0 Comments