លោក Conor Nestor គ្រូបង្វឹករបស់ក្រុមព្រះខ័នរាជស្វាយរៀង បានដឹកនាំក្រុមឡើងឈរកំពូលតារាងលីគកំពូលកម្ពុជា ត្រឹមសប្ដាហ៍ទី៤នេះ ពោលគឺក្រោយបន្តយកឈ្នះលើក្រុមភ្នំពេញក្រោន ដោយលទ្ធផល ៥ទល់១ កាលពីចុងសប្ដាហ៍ថ្មីៗនេះលើទឹកដីរបស់ខ្លួន ខណៈគ្រូបង្វឹករូបនេះបានសម្លឹងឃើញពីចំណុចវិជ្ជាមានជាច្រើនចំពោះកូនក្រុម។
ក្រោយចប់ការប្រកួតលោក Conor Nestor បានលើក ឡើងថា «ខ្ញុំគិតថា៣ពិន្ទុដ៏សំខាន់នេះយើងធ្វើបានល្អនៅ៧០នាទីដំបូង ប៉ុន្តែ២០នាទីចុងក្រោយយើងពុំអាចធ្វើអ្វីបានទាំងអស់។ ដូច្នេះយើងត្រូវរៀនសូត្របន្ថែមទៀតដូចរយៈពេល៧០នាទីដំបូងខ្ញុំជឿជាក់ថាយើងនឹងអាចឈ្នះការប្រកួតច្រើនផ្សេងទៀត។ កីឡាករគួរបានកោតសរសើរដោយផ្តោតអារម្មណ៍ខ្លាំងលើការប្រកួត។ ដោយទាំងអស់នេះកើតចេញពីកីឡាករទាំងអស់គ្នាដោយធ្វើការខ្លាំង និងផ្តោតលើការងាររបស់ខ្លួនរៀងរាល់ថ្ងៃ។ ខ្ញុំគិតថាកីឡាករល្អជាងគេក្នុងការប្រកួត ( Man of the match ) គឺក្រុមទាំងមូល។ នេះជាអ្វីយើងត្រូវរៀនសូត្រនាពេលគ្រប់គ្នាធ្វើការជាក្រុម ផ្តោតអារម្មណ៍លើការងារដោយ និងកីឡាករផ្សេងទៀតអាចយកឈ្នះការប្រកួត។»។
លោកបានបញ្ជាក់ជុំវិញគ្រាប់បាល់១គ្រាប់របស់ភ្នំពេញក្រោន បំប៉ោងសំណាញ់ទីក្រុមរបស់ខ្លួនដែលជាការរបូតគ្រាប់បាល់ដំបូងប្រចាំរដូវកាលដោយអាជ្ញាកណ្ដាលសម្រេចពិន័យបាល់១១ម៉ែត្រថា «ខ្ញុំមិនច្បាស់នោះទេ ដោយត្រូវការមើលវីដេអូឡើងវិញ ប៉ុន្តែខ្ញុំគិតថាស្ថានការណ៍ពេកនោះយើងគួរតែការពារឲ្យបានល្អជាងនេះ។ ហើយយើងត្រូវតែច្បាស់ថាបាល់មិនអាចនៅក្រោយខ្សែការពារបែបនេះ។ ដូច្នេះយើងត្រូវគ្រប់គ្រងស្ថានការណ៍ដោយខ្លួនឯងមិនមែនជាមួយអាជ្ញាកណ្តាលនោះទេ យើងត្រូវតែផ្លាស់ប្តូរវា»។
លោកគ្រូបង្វឹកកំពុងកាន់អាជ្ញាប័ណ្ណUEFA A license ខាងលើបានដឹកនាំក្រុមព្រះខ័នរាជស្វាយរៀង ឈរកំពូងតារាងបណ្តោះអាសន្នក្រោមប្រកួតបាន៤លើកឈ្នះទាំង៤លើកពោលគឺឈ្នះអគ្គស្នងការដ្ឋាននគរបាលជាតិ ២ទល់០ បន្តឈ្នះសូលទីឡូអង្គរ ១ទល់០ ឈ្នះគីរីវង់សុខសែនជ័យ ២ទល់០ និងឈ្នះភ្នំពេញក្រោន ៥ទល់១។ សម្រាប់ប្រកួតបន្តក្រុមព្រះខ័នរាជស្វាយរៀង ត្រូវក្រុមម្ចាស់ផ្ទះអគ្គីសនីកម្ពុជា នៅវេលាម៉ោង៣:៣០នាទីរសៀលថ្ងៃសៅរ៍ ទី២៧ ខែមេសា ឆ្នាំ២០១៩លើទីលានអគ្គីសនីកម្ពុជា ក្នុងសប្ដាហ៍ទី៥នៃលីគកំពូលកម្ពុជាឆ្នាំ២០១៩៕
Source: Kampuchea Thmey Daily
0 Comments