ភ្នំពេញ ៖ កំពង់ផែស្វ័យតភ្នំពេញ បានរៀបចំមហាសន្និបាតភាគហ៊ុនិកលើកទី៤កាលពីព្រឹកថ្ងៃទី២៣ ខែមេសា ឆ្នាំ២០១៩ ក្រោមវត្តមានអញ្ជើញចូលរួមពីសំណាក់ឯកឧត្តម ហ៊ឺ បាវី ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វ័យតភ្នំពេញ និងជាប្រធានមហាសន្និបាត ឯកឧត្តម ងី តាយី តំណាងក្រសួងសេដ្ឋកិច្ច និងហិរញ្ញវត្ថុ ឯកឧត្តម សួន រចនា តំណាងក្រសួងសាធារណការ និងដឹកជញ្ជូន រួមនិងភ្ញៀវកិត្តិយសជាច្រើនទៀត។
មានប្រសាសន៍ក្នុងឱកាសនោះឯកឧត្តម ហ៊ឺ បាវី បានលើកឡើងថា កំពង់ផែស្វ័យតភ្នំពេញគឺជាសហគ្រាសសាធារណៈដែលមានភារកិច្ចធ្វើអាជីវកម្មផែ ហើយមានការទទួលស្គាល់ និងតែងតែឈានមុខគេជានិច្ចក្នុងវិស័យដឹកជញ្ជូនតាមផ្លូវទឹកដូចជាការបង្កើតចំណតផែកុងតឺន័រ LM១៧ ជាដើម។
ឯកឧត្តម ហ៊ឺ បាវី ថ្លែងទៀតថា យើងបានអភិវឌ្ឍខ្លួនរីកចម្រើនមកដល់បច្ចុប្បន្ននេះដោយសារមានការសាមគ្គីគ្នាជម្នះរាល់ឧបសគ្គហើយបង្កើតឱកាសកសាងស្ថាបនាអង្គភាពឲ្យល្អប្រសើជាបន្តបន្ទាប់។ ក្នុងនោះយើងបានបន្តដំណើរមួយជំហានទៀតគឺបោះផ្សារលក់ភាគហ៊ុននៅផ្សារមូលបត្រកម្ពុជា ដែលជាគម្រោងវិនិយោគមួយដែលមានលក្ខណៈសេដ្ឋកិច្ច ហើយក៏បានជំរុញឲ្យកំពង់ផែបានស្គាល់ការអភិវឌ្ឍគួរជាទីកត់សម្គាល់ដែលក្នុងនោះរួមមានទាំងរចនាសម្ព័ន្ធគ្រប់គ្រង និងគោលការគ្រប់គ្រង ពោលគឺកំពង់ផែត្រូវសម្របខ្លួនទៅតាមគោលការណ៍ និងបច្ចេកទេសថ្មីៗដែលបានកំណត់ដោយវិធានការច្បាប់ស្តីពីការបោះផ្សាយលក់មូលបត្រនិងអភិបាលកិច្ចសាជីវកម្ម។
ឯកឧត្តមបានមានប្រសាសន៍ទៀតថា ការរៀបចំមហាសន្និបាតលើកទី៤នេះក៏មានការរៀបចំការបោះឆ្នោតជ្រើសរើសអភិបាលឯករាជ្យ និងអភិបាលមិនប្រតិបត្តិតំណាងភាគហ៊ុនិកឯកជនលើកនេះគឺជាឧទាហរណ៍បញ្ជាក់ស្រាប់។ ម្យ៉ាងទៀតការចូលផ្សារមូលបត្រគឺមានផលចំណេញសម្រាប់កំពង់ផែ ហើយក្នុងនាមជាសហគ្រាសាធារណៈរបស់រដ្ឋកំពង់ផែ តែងតែចូលរួមគាំទ្រគោលនយោបាយរបស់រាជរដ្ឋាភិបាល ដែលបានដាក់ចេញជាក់ស្តែង ហើយកំពង់ផែស្វ័យតភ្នំពេញជាសហគ្រារដ្ឋដែលមានគុណសម្បត្តិគ្រប់គ្រាន់សម្រាប់ចុះបញ្ជីបោះផ្សាយលក់មូលបត្រនៅទីផ្សារមូលបត្រកម្ពុជា។
ឯកឧត្តម ហ៊ឺ បាវី បានសង្កត់ធ្ងន់ថា ទីផ្សារមូលបត្រក៏ជាមធ្យោបាយបង្កើនមូលធនសម្រាប់ការអភិវឌ្ឍអង្គភាពផែដើម្បីពង្រីកអាជីវកម្ម ពង្រីកហេដ្ឋារចនាសម្ព័ន្ធទីលាន ដើម្បីតភ្ជាប់ទំនាក់ទំនងការដឹកជញ្ជូនតាមផ្លូវទឹក ទទួលនាវាអន្តរជាតិពីក្នុងតំបន់ និងអន្តរជាតិ។ ក្រោយចូលផ្សារមូលបត្រកំពង់ផែស្វ័យតភ្នំពេញ បានពង្រីកការគ្រប់គ្រងអង្គភាព ក្នុងគោលដៅផ្តល់ទំនុកចិត្ត និងការទទួលស្គាល់ពីសាធារណជន ជាតិ និងអន្តរជាតិដូចជាការផ្តល់ព័ត៌មានអាជីវកម្មជាដើម។
បន្ថែមពីលើនេះឯកឧត្តម ហ៊ឺ បាវី បានលើកឡើងថា គិតមកទល់ពេលនេះការចូលផ្សារមូលបត្រកម្ពុជារបស់កំពង់ផែស្វ័យតភ្នំពេញ មានរយៈពេល៤ឆ្នាំហើយ មិនតែប៉ុណ្ណោះក៏មានកិត្តិយស និងមានមោទនភាពចំពោះស្នាដៃ និងលទ្ធផលដែលសម្រេចបាននេះ។ ទោះជាយ៉ាងណាយើងនៅមានការទទួលខុសត្រូវច្រើនបន្តទៀតដែលក្នុងនោះត្រូវបន្តអនុវត្តផែនការសកម្មភាព អភិវឌ្ឍកំពង់ផែតាមរយៈការពង្រឹងការគ្រប់គ្រងអង្គភាព ការពង្រឹងធនធានមនុស្ស និងការពង្រឹងប្រតិបត្តិការអាជីវកម្ម៕
Source: Kampuchea Thmey Daily
0 Comments