កូនស្រីលោកព្រហ្មម៉ាញ ត្រូវប៉ូលិសចរាចរណ៍ឃាត់ វាស់ជាតិអាល់កុសលើសរហូតដល់០.៥៩

ភ្នំពេញ ៖ នាយការិយាល័យនគរបាលចរាចរណ៍ផ្លូវគោក លោក សែម គន្ធា បានឲ្យដឹងថា ដោយមើលឃើញអត្រាគ្រោះថ្នាក់ចរាចរណ៍ នៅតែជាបញ្ហាប្រឈមនោះ ស្នងការនគរបាលរាជធានីភ្នំពេញ លោកឧត្ដមសេនីយ៍ឯក ស ថេត បានចាប់ផ្ដើមដាក់ផែនការ ដោយបញ្ជាមកការិយាល័យជំនាញ សហការជាមួយកម្លាំងនគរបាលទាំង១២ខណ្ឌ បើកយុទ្ធនាការជាបន្តបន្ទាប់ ដោយត្រួតពិនិត្យជាតិអាកុល ទៅលើអ្នកបើកបរ។

ការដាក់គោលដៅពិនិត្យជាតិស្រវឹងនេះ គឺ ដាក់កាលពីយប់ថ្ងៃទី២៣ ខែមេសា ឆ្នាំ២០១៩ ដោយចរាចរណ៍ក្រុងភ្នំពេញ ដឹកនាំកងកម្លាំងសហការជាមួយមូលដ្ឋាន ដែលមានទីតាំងតាមបណ្ដោយផ្លូវជាតិលេខ៦ ក្នុងសង្កាត់ព្រែកលៀបខណ្ឌជ្រោយចង្វារ ក្រុងភ្នំពេញ ពោលគឺដាក់បន្ទាប់ពីចូលឆ្នាំខ្មែររួច តែប៉ុន្មានថ្ងៃ ហើយក៏ខានដាក់ត្រួតពិនិត្យជាយូរហើយដែរ។

បើតាមប្រភពព័ត៌មានពីសមត្ថកិច្ច បានឲ្យដឹងថា ក្នុងកិច្ចប្រតិបត្តិការចុះត្រួតពិនិត្យជាតិស្រវឹងនេះដែរ សមត្ថកិច្ចបានធ្វើការពិនិត្យចំពោះស្ត្រីម្នាក់ ដោយឃើញថា មានកម្រិតជាតិអាកុលរហូតដល់ ០,៥៩ ដែលមានកម្រិតខ្ពស់ មិនអនុញ្ញាតឲ្យបើកទៅមុខទៀតបាន ដែលស្ត្រីរូបនោះត្រូវបានគេស្គាល់ថាជាកូនស្រី លោក ព្រហ្ម ម៉ាញ ដែលជាសិល្បករជើងចាស់ខាងសិល្បៈអាយ៉ៃ។

ប្រភពបន្តថា កត្តាមានជាតិស្រវឹងលើសកម្រិតនេះ ហើយ ដែលអ្នកបើកបរមួយចំនួនបានបង្កឲ្យមានករណីគ្រោះថ្នាក់ចរាចរណ៍ លើសពីនេះ មិនត្រឹមតែមានគ្រោះថ្នាក់ចំពោះខ្លួនឯងនោះទេ ថែមទាំងអាចបង្កគ្រោះថ្នាក់ដល់អ្នកដំណើរដទៃទៀតផង។

ការដាក់គោលដៅត្រួតពិនិត្យជាតិអាល់កុល ដោយនគរបាលចរាចរណ៍ជើងគោក នៃស្នងការក្រុងនោះ ត្រូវបានមជ្ឈដ្ឋានមហាជនអបអរសាទរយ៉ាងខ្លាំង ព្រោះបច្ចុប្បន្នគេសង្កេតឃើញថា គ្រោះថ្នាក់ចរាចរណ៍នៅលើដងផ្លូវ បានកើតឡើងគួរឲ្យព្រួយបារម្ភ ដែលភាគច្រើនគឺផ្តើមចេញពីការសេពគ្រឿងស្រវឹង ហើយបើកបរនោះឯង៕