តាកែវ ៖ ជនសង្ស័យជាប់ពាក់ព័ន្ធនឹងករណីប្រព្រឹត្តអំពើចោរកម្ម២នាក់ ត្រូវសមត្ថកិច្ចចាប់ខ្លួនបានតាមអំណាចដីកាតុលាការ បន្ទាប់ពីរត់គេចខ្លួនបានជិត២ឆ្នាំ។
ហេតុការណ៍ចាប់ខ្លួនជនសង្ស័យករណីលួចនេះ ធ្វើឡើងនៅថ្ងៃទី២២ ខែមេសា ឆ្នាំ២០១៩ វេលាម៉ោង០៧និង៣០នាទីព្រឹក ដោយកម្លាំងជំនាញនៃអធិការនគរបាលស្រុកសំរោង នៅនឹងផ្ទះជនសង្ស័យតែម្តង។
ក្រោយចាប់ខ្លួនប៉ូលីសស្រុកសំរោងបានប្រាប់ថា ជនសង្ស័យទាំង២នាក់មានឈ្មោះ រឿន ដារ៉ា ភេទប្រុស អាយុ៤២ឆ្នាំ និងឈ្មោះ ហៃ ប្រុសពេជ្រ ភេទប្រុស អាយុ១៩ឆ្នាំ ទាំងពីរនាក់រស់នៅភូមិថ្មី ឃុំរវៀង ស្រុកសំរោង ខេត្តតាកែវ។ ប៉ូលិសស្រុកសំរោងបានបញ្ជាក់ថា ជនសង្ស័យខាងលើ បានធ្វើសកម្មភាពលួចកាលពីថ្ងៃទី២៧ ខែធ្នូ ឆ្នាំ២០១៧ នៅចំណុចភូមិចារ ឃុំរវៀង ស្រុកសំរោង ខេត្តតាកែវ។ ក្រោយពីធ្វើសកម្មភាពរួចពួកគេបានរត់គេចខ្លួនបាត់ស្រមោល ទើបតែពេលនេះវិលចូលស្រុកវិញក៏ត្រូវសមត្ថកិច្ចចាប់ខ្លួនបានតែម្តងទៅ។
បច្ចុប្បន្នជនសង្ស័យទាំង២នាក់ដែលសមត្ថកិច្ចចាប់ខ្លួននេះ ត្រូវបានរៀបចំសំណុំរឿងបញ្ជូនខ្លួនទៅសាលាដំបូងខេត្តតាកែវចាត់ការតាមនីតិវិធី៕
Source: Kampuchea Thmey Daily
0 Comments