ភ្នំពេញ ៖ រដ្ឋមន្ត្រីក្រសួងមហាផ្ទៃ បានបញ្ជាដល់ភាគីពាក់ព័ន្ធទាំងអស់ស្វែងរកចាប់ខ្លួនមេខ្លោងជួញដូរមនុស្សឲ្យបាន ខណៈករណីជួញដូរមនុស្ស និងអាជីវកម្មផ្លូវភេទនៅតែបន្តកើតមាន។
ក្នុងកិច្ចប្រជុំផ្សព្វផ្សាយរបាយការណ៍ជាតិ ស្តីពីការងារប្រយុទ្ធប្រឆាំងអំពើជួញដូរមនុស្សឆ្នាំ២០១៨ និងទិសដៅ២០១៩ នាព្រឹកថ្ងៃទី២៣ ខែមេសា ឆ្នាំ២០១៩ នៅទីស្តីការក្រសួងមហាផ្ទៃ សម្តេចក្រឡាហោម ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ មានប្រសាសន៍ថា ភាគីពាក់ព័ន្ធទាំងអស់ត្រូវបន្តសហការគ្នា និងពង្រឹងការទប់ស្កាត់ករណីជួញដូរមនុស្ស និងផ្លូវភេទគ្រប់រូបភាពទាំងអស់អោយកាន់តែមានប្រសិទ្ធភាព។
សម្តេចក្រឡាហោម ស ខេង មានប្រសាសន៍ថា ករណីជួញដូរមនុស្សនេះ នៅតែបន្តកើតមាន បើទោះបីជាឆ្នាំ២០១៨ មានការធ្លាក់ចុះយ៉ាងណាក្តី ប៉ុន្តែទោះជាយ៉ាង ណាក៏ដោយត្រូវតែស្វែងរកចាប់ខ្លួនមេខ្លោងទាំងក្នុងប្រទេស និងក្រៅប្រទេសឲ្យបានទើបបញ្ហានេះមិនកើតមានបន្តទៀត។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធាន គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានប្ដេជ្ញាបន្តសហការគ្នាជាមួយគ្រប់ភាគីពាក់ព័ន្ធ ដើម្បីធ្វើការទប់ស្កាត់ករណីជួញដូរមនុស្ស និងផ្លូវភេទឲ្យកាន់តែមានប្រសិទ្ធភាព។
យោងតាមរបាយការណ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានឲ្យដឹងថា ការបង្ក្រាបបទល្មើសអំពើជួញដូរមនុស្ស និងអំពើធ្វើអាជីវកម្មផ្លូវភេទ ក្នុងឆ្នាំ២០១៨សរុបចំនួន ១៣/១៥៩ករណីបើប្រៀបធៀបនឹងឆ្នាំ២០១៧ មានការថយចុះចំនួន ២ករណី ស្មើនឹង ១៤,៧២%៕
Source: Kampuchea Thmey Daily
0 Comments