ផ្ទះ៣ល្វែង ដែលគេទុកចោល ត្រូវជនសង្ស័យប្រើប្រាស់គ្រឿងញៀនម្នាក់ ដុត បង្កឲ្យឆេះយ៉ាងសន្ធោសន្ធៅ

Cambodia News April 23, 2019

ភ្នំពេញ ៖ បុរសម្នាក់ ដែលគេសង្ស័យថា ប្រើប្រាស់ថ្នាំញៀន រហូតបែកថ្នាំ ត្រូវបានប្រជាពលរដ្ឋនាំគ្នាព្រួតវាយ បណ្ដាលឲ្យរងរបួស ខណៈដែលជនសង្ស័យរូបនេះធ្វើសកម្មភាពដុតក្រដាសក្នុងផ្ទះរបស់គេឆេះរាលដាលដល់ផ្ទះប្រជាពលរដ្ឋដែលគេទុកចោលយ៉ាងសន្ធោសន្ធៅអស់៣ល្វែង ហើយក្នុងហេតុការណ៍នេះក៏បានធ្វើឲ្យស្ត្រីម្នាក់ ដួលសន្លប់ផងដែរ។

ហេតុការណ៍នេះបានបង្កការភ្ញាក់ផ្អើលនៅវេលាម៉ោង៨និង១០នាទី ថ្ងៃទី២២ ខែមេសា ឆ្នាំ២០១៩ ស្ថិតនៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ។ ជនសង្ស័យមាន ឈ្មោះ គង់ រតនា ភេទប្រុស អាយុ២៧ឆ្នាំ មុខរបរ និង ស្នាក់នៅមិនពិតប្រាកដ។

ប្រភពព័ត៌មាននៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេបានឃើញផ្សែង និងអណ្ដាតភ្លើង បានចេញពីក្នុងផ្ទះកើតហេតុ ក៏បានរាយការណ៍ទៅសមត្ថកិច្ចចុះអន្តរាគមន៍ មួយសន្ទុះក្រោយមក ស្រាប់តែឃើញជនសង្ស័យខាងលើបានលោតចុះពីលើផ្ទះកើតហេតុ ត្រូវប្រជាពលរដ្ឋចាប់បានវាយម្នាក់មួយដៃមួយជើង ទើបប្រគល់សមត្ថកិច្ច។ ក្នុងករណីនេះដែរ ក៏មានស្ត្រីម្នាក់បានដួលសន្លប់ស្ដូកស្ដឹង ត្រូវបានបញ្ជូនទៅមន្ទីរពេទ្យសង្គ្រោះភ្លាមៗផងដែរ។

បន្ទាប់ពីឃាត់ខ្លួនជនសង្ស័យខាងលើ សមត្ថកិច្ចសួរនាំ ជនសង្ស័យបានសារភាពថា ខ្លួនពិតជាធ្លាប់ប្រើប្រាស់គ្រឿងញៀនពិតប្រាកដមែន ហើយចំពោះករណីអគ្គិភ័យខាងលើនេះ មកពីជនសង្ស័យបានដុតក្រដាស ទើបបង្កឲ្យមានការឆាបឆេះបែបនេះ តែមិនបណ្តាលឲ្យមានការរាលដាលដល់ផ្ទះអ្នកជិតខាងឡើយ។

ចំពោះករណីអគ្គិភ័យខាងលើនេះ សមត្ថកិច្ចបានចេញរថយន្ត១៤រឿង មកអន្តរាគមន៍ និងបានប្រើប្រាស់អស់៤គ្រឿង ទើបរលត់ទៅវិញនៅម៉ោង០៩និង១០យប់ថ្ងៃដដែល៕