ភ្នំពេញ ៖ ក្រសួងកសិកម្មរុក្ខាប្រមាញ់ និងនេសាទ សហការជាមួយសង្គមស៊ីវិលគ្រោងអភិវឌ្ឍន៍តំបន់សហគមន៍នេសាទផាត់សណ្តាយ ខេត្តកំពង់ធំ ឲ្យទៅជាតំបន់អេកូទេសចរណ៍ ដើម្បីការពារថែរក្សាធនធានជីវចម្រុះនៅតំបន់នេះឲ្យធានា បាននិរន្តរភាព និងលើកកម្ពស់សេដ្ឋកិច្ច សហគមន៍ឲ្យកាន់តែប្រសើរឡើងថែមទៀត។
ថ្លែងក្នុងកម្មវិធីសម្ពោធ គម្រោងបង្កើនជីវភាពរស់នៅរបស់ប្រជានេសាទតាមរយៈការការពារគ្រប់គ្រងធនធានធម្មជាតិ នៅតំបន់ដីសើមក្នុងបឹងទន្លេសាប កាលពីកាលពីព្រឹកថ្ងៃទី២៣ ខែមេសា ឆ្នាំ២០១៩ នៅភោជនីយដ្ឋានទន្លេបាសាក់២ លោក ឱម សាវ៉ាត នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផល បានឲ្យដឹងថា គម្រោងប្រែក្លាយសហគមន៍នេសាទផាត់សណ្តាយជាសហគមន៍ទេសចរណ៍នេះ គឺជាផ្នែកមួយក្នុងគម្រោងបង្កើនជីវភាពរស់នៅរបស់ប្រជានេសាទតាមរយៈការការពារគ្រប់គ្រងធនធានធម្មជាតិនៅតំបន់ដីសើមក្នុងបឹងទន្លេសាបដើម្បីកសាង សមត្ថភាពរបស់សហគមន៍ បង្កើនការគ្រប់គ្រងធនធានជលផល និងបង្កើនប្រភពមុខរបរ ចម្រុះនៅក្នុងសហគមន៍។
លោកបានមានប្រសាសន៍ទៀតថា ក្រុមប្រជាសហគមន៍នេសាទផាត់សណ្តាយបានឯកភាពគ្នារួចហើយត្រៀមកែច្នៃតំបន់មួយចំនួនឲ្យក្លាយជា តំបន់អេកូទេសចរណ៍តាមរូបភាពរក្សាព្រៃលិចទឹក ការពារជម្រកសត្វស្លាប និង បង្កើតទូកដឹកជញ្ជូនភ្ញៀវទស្សនាព្រៃលិច ដើម្បីទាញយកប្រភពចំណូលបន្ថែមក្រៅពីមុខរបរនេសាទ។
លោកបានបន្តទៀតថា ការអភិវឌ្ឍសហគមន៍នេះ នឹងបង្កើតផ្ទះស្នាក់នៅបណ្តែតទឹកសម្រាប់ភ្ញៀវស្នាក់នៅ រួមទាំងសេវាកម្មបម្រើម្ហូបអាហារគ្មានគីមីពិសេសត្រីដែលរកបាននៅក្នុងសហគមន៍នេះ។
លោកបានបញ្ជាក់ថា នៅពេលប្រជាសហគមន៍ទទួលបានប្រភពចំណូលពីតំបន់នេះ នឹងធ្វើឲ្យពួកគេកាន់តែបង្កើនកិច្ច អភិរក្សដើរល្បាត និង ទប់ស្កាត់ការនេសាទខុសច្បាប់យ៉ាងមានប្រសិទ្ធភាព ខណៈដែលវិស័យទេសចរណ៍ផ្តល់ប្រភពបានច្រើន។
ចំណែក លោក អ៊ុត សំអន អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទបាន ឲ្យដឹងថា រាជរដ្ឋាភិបាលបានគាំទ្រយ៉ាងខ្លាំងចំពោះគម្រោងប្រែក្លាយតំបន់ផាត់សណ្តាយឲ្យ ទៅជាតំបន់អេកូទេសចរណ៍ ព្រោះវាបានជួយឲ្យតំបន់នោះកាន់តែមានកិច្ចគាំពារកម្រិត ខ្ពស់លើវិស័យធនធានជលផលព្រៃលិចទឹក និងសត្វស្លាបជាដើម។
ឯកឧត្ដមបានអះអាងថា ការការពារបានតំបន់ សហគមន៍នេសាទផាត់សណ្តាយនេះវានឹងក្លាយជាគំរូសម្រាប់យកទៅគ្រប់គ្រងនៅសហគមន៍ នេសាទជាច្រើនទៀតក្នុងប្រទេសកម្ពុជា។
សូមបញ្ជាក់ថា សហគមន៍នេសាទផាត់សណ្តាយ ស្ថិតនៅក្នុងឃុំផាត់សណ្តាយ ស្រុកកំពង់ស្វាយខេត្តកំពង់ធំ ដែលមានប្រជាពលរដ្ឋរស់លើផ្ទះបណ្តែតទឹកប្រមាណជាង៤.៥០០នាក់ ដែលភ្ញៀវទេសចរអាចធ្វើដំណើរទៅលេងសហគមន៍នេះតាមខេត្តកំពង់ធំ និង ខេត្តកំពង់ឆ្នាំង ដោយធ្វើដំណើរតាមទូក៕
Source: Kampuchea Thmey Daily
0 Comments