ប្រដាល់ ៖ អ្នកប្រដាល់ជើងខ្លាំងស្រករក្រោយរបស់កម្ពុជា២រូប ត្រៀមជួបប្រកួតជាមួយអ្នកប្រដាល់ថៃ នៅក្នុងកម្មវិធីប្រដាល់Wurkz លើសង្វៀនSEATV រសៀលថ្ងៃទី២១ ខែមេសា ឆ្នាំ២០១៩នេះ ។ នោះគឺ អ្នកប្រដាល់វ័យក្មេង ម៉ឺន មេឃា ក្លិបអេភូថងកីឡា ត្រូវបានគេផ្គូឲ្យជួបប្រកួតជាមួយអ្នកប្រដាល់ថៃស៊ុបភើ ពែក (Super Pek) ដោយជួបគ្នាក្នុងទម្ងន់៦០គ.ក្រ។
ស៊ុបភើ ពែក គេធ្លាប់មកប្រកួតនៅសង្វៀនអាស៊ីអាគ្នេយ៍នេះម្តងហើយកន្លងមក។ អ្នកប្រដាល់ថៃស៊ុបភើ ពែកនេះ មានកម្ពស់ទាបជាងមេឃាតែបន្តិចប៉ុណ្ណោះ គឺ១,៦៩ម៉ែត្រ ខណៈមេឃា១,៧០ម៉ែត្រ ប៉ុន្តែមានកំណត់ត្រាប្រកួតច្រើនជាងមេឃា គឺ៥៦លើក ឈ្នះ៤៨លើក ចាញ់០៨លើក មិនដែលស្មើ ។ ទោះជាយ៉ាងនេះក្តី ស៊ុបភើ ពែក មិនប្រាកដថា អាចយកឈ្នះលើម៉ឺន មេឃា បាននោះឡើយ តែយ៉ាងណាមេឃា ក៏មិនអាចមើលស្រាលអ្នកប្រដាល់ថៃនោះបានដែរ។
ម៉ឺន មេឃា ដែលគេស្គាល់ថា ជាកូនប្រុសបង្កើតរបស់អតីតជើងខ្លាំងអេភូថងនោះ គេមានកម្រិតសមត្ថភាពបច្ចេកទេសល្អ កាយសម្បទារឹងមាំ។ គេមានកំណត់ត្រាប្រកួតតែ៣៧លើកទេ ដែលក្នុងចំនួននេះគេវាយឈ្នះ៣៣លើកទៅហើយ ដោយចាញ់តែ០៤លើកប៉ុណ្ណោះ។
ទោះជាយ៉ាងណា ម៉ឺនមេឃា គេប្រហែលជាមិនពិបាកក្នុងការជួបស៊ុបភើ ពែក នោះទេ ព្រោះអ្នកប្រដាល់វ័យក្មេងកម្ពុជារូបនេះ ថ្វីត្បិតតែជាជើងថ្មី និងមិនទាន់មានឈ្មោះបោះសំឡេងនៅឡើយក្តី ក៏អ្នកប្រដាល់វ័យក្មេងរូបនេះ មិនអន់នោះដែរ។ ជាលើកទី៥ របស់មេឃា ដែលជួបប្រកួតជាមួយថៃ។ ដូច្នេះ ចាំមើល តើ ម៉ឺន មេឃា អាចយកឈ្នះ ស៊ុបភើ ពែក បានឬអត់?។
ចំពោះកូយ ឡាយ អ្នកប្រដាល់ជើងខ្លាំងស្រករក្រោយ នៃក្លិបកងពលតូចទ័ពឆ័ត្រយោង៩១១ នឹងជួបសាកកណ្ដាប់ដៃជាមួយអ្នកប្រដាល់ថៃ ចេន សឹក (Chen Sak) ដោយជួបគ្នាក្នុងប្រភេទទម្ងន់៦០គ.ក្រដែរ។
ចេន សឹក គេធ្លាប់មកប្រកួតនៅស្រុកខ្មែរម្តងលើសង្វៀនអាស៊ីអាគ្នេយ៍នេះ (១០មីនា២០១៩)ដោយវាយចាញ់ម៉ឺន មេឃា ក្នុងទឹកទី២។ អ្នកប្រដាល់ថៃ ចេន សឹក នេះ មានកម្ពស់ប្រហាក់ប្រហែលកូយ ឡាយ គឺ១,៦៧ម៉ែត្រ ខណៈដែលកូយឡាយ ១,៦៨ម៉ែត្រ តែកំណត់ត្រាប្រកួតច្រើនជាងកូយឡាយ គឺ៦០លើក ឈ្នះ៤៨លើក ចាញ់១២លើក មិនដែលស្មើ។
ទោះជាយ៉ាងនេះក្តី ចេន សឹក មិនប្រាកដថា អាចយកឈ្នះលើកូយ ឡាយ បាននោះឡើយ តែយ៉ាងណាកូយឡាយ ក៏មិនអាចមើលស្រាលអ្នកប្រដាល់ថៃនោះបានដែរ។
កូយ ឡាយ គេមានស្នៀតប្រដាល់ល្អ និងវាយខ្លាំង ខណៈដែល ចេន សឹក គេមិនជាខ្លាំងប៉ុន្មាននោះទេ កម្លាំងវាយចេញ គឺខ្សោយជាងកូយ ឡាយ ហើយត្រូវបាក់លោងក្រោមទម្ងន់ជើងទាត់របស់មេឃាម្តងហើយនោះ។ ទោះជាបែបនេះក៏ដោយ ក៏កូយ ឡាយ មិនអាចមើលងាយ ចេន សឹក នោះដែរ ។
ចេន សឹក គេមកប្រកួតចុងក្រោយនៅស្រុកខ្មែរ គឺវាយចាញ់ម៉ឺន មេឃា ក្នុងទឹកទី២ កាលពីថ្ងៃទី១០ខែមីនា ឆ្នាំ២០១៩។ ចំណែកការប្រកួតចុងក្រោយរបស់កូយ ឡាយ វិញ គេវាយឈ្នះអ្នកប្រដាល់រួមជាតិសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ដោយពិន្ទុ។
សម្រាប់ការជួបគ្នារវាងកូយ ឡាយ និង ចេន សឹកនេះ មិនដឹងថានរណាជាអ្នកទទួលបានជ័យជម្នះនោះឡើយ?។
ចំពោះការប្រកួតរវាងអ្នកប្រដាល់រួមជាតិវិញ ខាំ សូរិយា អ្នកប្រដាល់ក្លិបរ៉ាហាប់ស្វាយប៉ាក ត្រូវគេផ្គូឲ្យជួបប្រកួតជាមួយកំពែង ខ្មៅ អ្នកប្រដាល់សមាគមកីឡាប្រដាល់ក្រសួងកសិកម្ម ក្នុងប្រភេទទម្ងន់៦០គីឡូក្រាម។ រីឯ លីន វិរៈ អ្នកប្រដាល់ក្លិបបូរីរាជសីហ៍មានរិទ្ធ នឹងជួបប្រកួតជាមួយ ស៊ឹម ប៊ុនឆៃ អ្នកប្រដាល់ក្លិបព្រៃទទឹងខេត្តបាត់ដំបង ក្នុងប្រភេទទម្ងន់៥៧គីឡូក្រាម៕
Source: Kampuchea Thmey Daily
0 Comments