កំពង់ឆ្នាំង ៖ កុមារីជាសិស្សសាលាម្នាក់ ត្រូវបានរន្ទះបាញ់ស្លាប់ កាលពីវេលាម៉ោង៤និង២៥នាទី ល្ងាចថ្ងៃទី០៦ ខែឧសភា ឆ្នាំ២០១៩ នៅចំណុចភូមិខ្សាច់ស ឃុំក្រាំងល្វា ស្រុកសាមគ្គីមានជ័យ។
សមត្ថកិច្ចនគរបាលមូលដ្ឋានបានឲ្យដឹងថា កុមារីរងគ្រោះមាន ឈ្មោះ ព្រុំ រស្មី អាយុ១២ឆ្នាំ ជា សិស្សសាលា រស់នៅភូមិស្រែសារ ឃុំត្បែងខ្ពស់ ស្រុកសាមគ្គីមានជ័យ។ មុនពេលកើតហេតុ គឺមេឃកំពុងភ្លៀង លាយឡំនឹងខ្យល់កន្ត្រាក់ ពេលនោះកុមារីរងគ្រោះកំពុងជិះកង់ចេញពីសាលារៀនមកផ្ទះ បានចម្ងាយប្រមាណ៣០០ម៉ែត្រ ពីសាលា ក៏ត្រូវរន្ទះបាញ់ចំបណ្តាលឲ្យនាងដួលកង់ស្លាប់តែម្តង នៅចំណុចភូមិខ្សាច់ស ឃុំក្រាំងល្វា ស្រុកសាមគ្គីមានជ័យ។
ក្រោយពេលកើតហេតុ សមត្ថកិច្ច បានចុះពិនិត្យសពកុមារីរងគ្រោះ ហើយបានប្រគល់សពជូនអាណាព្យាបាល យកមកធ្វើបុណ្យតាមប្រពៃណី នៅក្នុងមូលដ្ឋាន៕
Source: Kampuchea Thmey Daily
0 Comments