បន្ទាយមានជ័យ ៖ ព្រឹកថ្ងៃទី៦ ខែឧសភា ឆ្នាំ២០១៩នេះ នៅសាលប្រជុំសាលាខេត្តបន្ទាយមានជ័យបានប្រារព្ធពិធីខួបទី១៥៦ ទិវាពិភពលោកកាកបាទក្រហម៨ឧសភា ឆ្នាំ២០១៩ក្រោមប្រធានបទ ខ្ញុំស្រឡាញ់កាកបាទក្រហមកម្ពុជា ដោយមានការចូលរួម លោកជំទាវ ម៉ៅ ម៉ាល័យ កែគឹមយ៉ាន ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ លោក សួន បវរ អភិបាលខេត្តបន្ទាយមានជ័យប្រធានកិត្តិយសសាខាកាកបាទក្រហមខេត្ត លោក លី សារី អភិបាលរងខេត្ត និងជាប្រធានគណៈកម្មាធិការសាខាកាកក្រហមកម្ពុជាខេត្ត និងសប្បុរសជន បានចូលរួមជិត១.០០០នាក់ផងដែរ។
ក្នុងនោះ លោក លី សារី បានមានប្រសាសន៍ថា ការបង្កើតសាខាកាកបាទក្រហមនេះឡើង ក្នុងគោលបំណងកៀរគររកជំនួយពីសប្បុរសឲ្យបានច្រើន ដើម្បីផ្តល់សេវាកម្មមនុស្សធម៌យកទៅជួយជនដែលត្រូវរងគ្រោះមហន្តរាយផ្សេងៗ។
លោក លី សារី បានបញ្ជាក់ឲ្យដឹងទៀតថា ចំណុចខ្លាំងលើលទ្ធភាព នៃការកៀរគរជំនួយសប្បុរសឧបត្ថម្ភដល់កាកបាទក្រហមកម្ពុជានេះ ត្រូវប្រើប្រាស់កម្លាំងសរុប មធ្យោបាយសរុប ហើយផ្សព្វផ្សាយ និងបញ្ជូនលិខិតអញ្ជើញទៅដល់ដៃមុខសញ្ញាជាឥស្សរជន មន្ត្រីរាជការ កម្លាំងប្រដាប់អាវុធ និយោជក ម្ចាស់ក្រុមហ៊ុន សហគ្រាស អាជីវករ អ្នកធ្វើការឲ្យរៃអង្គាសដៃគូអភិវឌ្ឍន៍ ផ្នែកឯកជនផ្សេងទៀត ព្រះសង្ឃ គណៈកម្មការ អាចារ្យ ដើម្បីចូលរួមចំណែកបរិច្ចាគជំនួយសប្បុរស។
លោក លី សារី បន្តថា ក្នុងទិវាកាកបាទក្រហម និងអឌ្ឍចន្ទក្រហមពិភពលោកលើកទី១៥៦ ខេត្តបន្ទាយមានជ័យ នាថ្ងៃទី៦ ខែឧសភា ឆ្នាំ២០១៩នេះ សូមមន្ត្រី អ្នកពាក់ព័ន្ធទាំងឡាយ សូមអនុវត្តអនុសាសន៍ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាឲ្យបានល្អ និងមានប្រសិទ្ធភាព ពោលគឺសូមធ្វើយ៉ាងណា រៀបចំឲ្យបានល្អ ហើយទាក់ទាញជំនួយសប្បុរសឲ្យបានច្រើនពោល គឺ បើមិនបានលើស ក៏ប្រហាក់ប្រហែលឆ្នាំ២០១៨ដែរ។
ក្នុងនោះ លោក សួន បវរ បានមានប្រសាសន៍ដែរថា ជំនួយសប្បុរសធម៌គិតជាចំណូល ចំណាយកាកបាទក្រហមកម្ពុជាខេត្តគិតប៉ុន្មានឆ្នាំនេះ បានកើនឡើងជាលំដាប់ ឧទាហរណ៍ ឆ្នាំ២០១៤ បានចំណូលគិតជាប្រាក់ជាង៤ម៉ឺនដុល្លារ ដល់ឆ្នាំ២០១៨ ចំណូលបានជិត១៥ម៉ឺនដុល្លារ ចំណាយអស់ជិត១០ម៉ឺនដុល្លារ ចំណែកទំហំ និងបរិមាណគ្រោះធម្មជាតិក្នុងខេត្តនេះ បានកើនឡើងជាលំដាប់។
សូមបញ្ជាក់ថា លើ ក្រុង ស្រុក ទាំង៩ គ្រាន់តែក្នុង១ខែមេសា ឆ្នាំ២០១៩ ភ្លៀងធ្លាក់លាយឡំខ្យល់កន្ត្រាក់ផ្ទះ និងសំណង់ចំនួន១.៥០០ខ្នង ក្នុងនោះ មានសាលាឃុំ ២ខ្នងសាលារៀន១៨ខ្នង សាលាបាលី ២ខ្នង កុដិ ៤ខ្នង សាលាឆាន់ ៣ ខ្នង មូលដ្ឋាន រោងដាក់ម៉ាស៊ីន និង សម្ភារៈ ៦ ខ្នង រន្ទះបាញ់ស្លាប់មនុស្ស៦នាក់ របួស៦នាក់ រន្ទះបាញ់ស្លាប់គោ១៥ក្បាល។
ក្រោយពីបញ្ចប់កម្មវិធីសប្បុរសជនជិត១,០០០នាក់ បានចូលក្នុងកម្មវិធីកាកបាទក្រហមខេត្តទាំងអស់សរុបមានចំនួនទឹកប្រាក់រៀល២២០,១៦៥,៧០០រៀល ប្រាក់បាត៦៥,៥០០បាត ប្រាក់ដុល្លារ៧៩,៨២៥ដុល្លារ សរុបគិតជាដុល្លារ១៣៥,៥៣៩ដុល្លារ សម្រាប់យកទៅជួយជនរងគ្រោះដែលមានទុក្ខលំបាកផ្សេងៗ៕
Source: Kampuchea Thmey Daily
0 Comments