ការប្រណាំងរថយន្តឆ្លងកាត់ដែនជម្រកសត្វព្រៃ’ព្រៃឡង់’ ក្រោមប្រធានបទ ’រួមគ្នាថែរក្សាបរិស្ថាន និង ធនធានធម្មជាតិ’

សហព័ន្ធកីឡាយានយន្តកម្ពុជា សហការជាមួយក្រសួងបរិស្ថាន ក្រោមការឧបត្ថម្ភពីប្រេងតូតាល់ បានរៀបចំការប្រណាំងរថយន្តឆ្លងកាត់ឧបសគ្គតំបន់ដែនជម្រកសត្វព្រៃ’ព្រៃឡង់’ Khmer Rally Raid 2019 ក្រោមប្រធានបទ’រួមគ្នាថែរក្សាបរិស្ថាន និង ធនធានធម្មជាតិ។

ការប្រណាំងរថយន្តឆ្លងកាត់តំបន់អភិរក្ស រ៉ាលីរ៉េដ ២០១៩ នឹងចាប់ផ្តើមពីថ្ងៃទី១៧ឧសភានេះ ហើយនឹងបញ្ចប់នៅថ្ងៃទី២០ ខែឧសភា ឆ្នាំ២០១៩។

ក្នុងសន្និសីទកាសែតនាល្ងាចថ្ងៃទី៦ឧសភា លោកពៅ តិចឡេងដែលជានាយកក្រុមហ៊ុនKa ra ដែលជាក្រុមហ៊ុន ទទួលរៀបចំព្រឹត្តិការណ៍ប្រណាំងយានយន្ដនោះបានបញ្ជាក់ថាព្រឹត្តិការណ៍ប្រណាំងយានយន្ដឆ្លងកាត់ឧបសគ្គនេះគឺឆ្លងកាត់ដែនជម្រកសត្វព្រៃ’ព្រៃឡង់’ក្រោមប្រធានបទ’រួមគ្នាថែរក្សាបរិស្ថាន និង ធនធានធម្មជាតិ’។

នេះជាលើកទី៤ហើយដេលKaraទទួលរៀបចំនូវព្រឹត្តិការណ៍នេះ។ ការប្រណាំងចាប់ផ្ដើមពីថ្ងៃទី១៧ដល់ ២០ឧសភា ដោយឆ្លងកាត់ភ្នំ វាលភក់ វាលស្រែ និងស្ថានភាពផ្លូវលំបាកៗជាច្រើនទៀត។

ការប្រណាំងនៅថ្ងៃទី១ គឺថ្ងៃទី១៧ឧសភា គឺប្រជុំបច្ចេកទេសថ្ងៃទី១៨ ដែលជាថ្ងៃទី២ ក្បួនប្រណាំងនឹងចេញដំណើរពីរាជធានីភ្នំពេញឆ្ពោះទៅ ខេត្តកំពង់ធំ លើចម្ងាយផ្លូវជា២០៣គីឡូម៉ែត្រ។ នៅថ្ងៃទី៣ក្បួនប្រណាំងចេញដំណើរពីខេត្តកំពង់ធំ ឆ្ពោះទៅខេត្តព្រះវិហារលើ ចម្ងាយផ្លូវជាង២៧គីឡូម៉ែត្រ និងថ្ងៃទី៤ ចេញដំណើរពីខេត្តព្រះវិហារលើចម្ងាយផ្លូវ១៩៣គីឡូម៉ែត្រ។

ការប្រណាំងនេះមានប្រទេសចំនួន៨ចូលរួម ដោយមានរថយន្តចូលរួមប្រណាំងចំនួន១៥គ្រឿង និងម៉ូតូចំនួន២០គ្រឿង មានកីឡាការិនីចំនួន៣រូបចូលរួមក្នុងព្រឹត្តិការណ៍ប្រណាំងនេះដែរ។

លោកហូរ សិទ្ធីគុណ អនុប្រធានសហព័ន្ធកីឡាប្រណាំងយានយន្តកម្ពុជាបានបញ្ជាក់ឲ្យដឹងដែរថា សហព័ន្ធនេះ កម្ពុជាបង្កើតឡើងនៅឆ្នាំ២០១៣ ហើយពីពេលនោះមកទល់ពេលនេះ កម្ពុជាបានរៀបចំព្រឹត្តិការណ៍ជាច្រើនដោយរួមមានទាំងការប្រណាំងជាលក្ខណៈអន្តរជាតិឆ្លងកាត់ប្រទេសទៀតផង។

លោកបន្តថា សហព័ន្ធកីឡាយានយន្តកម្ពុជាបានការទទួលស្គាល់ពីសហព័ន្ធកីឡាប្រណាំងម៉ូតូអន្តរជាតិ(FIM) និងសហព័ន្ធកីឡាប្រណាំងរថយន្តអន្តរជាតិ(FIA)។ ការប្រណាំងត្រូវគិតទៅលើថិរវេលា និងបច្ចេកទេស និងច្បាប់ ព្រោះការប្រណាំងនៅតាមទីប្រជុំជនសហព័ន្ធត្រូវកំណត់ល្បឿនឲ្យបើកបរគឺមិនអនុញ្ញាតឲ្យបើកលឿនឡើយ ព្រោះវាអាចបង្កគ្រោះថ្នាក់ដល់ប្រជាជន។

លោកអនុប្រធានសហព័ន្ធបន្តថា កាប្រណាំងនេះ គឺមានការចូលរួមពីអាជ្ញាធរ ភ្នាក់ងារមានសមត្ថកិច្ចគ្រប់ទីកន្លែងដែលការប្រណាំងឆ្លងកាត់។

លោក នេត្រ ភក្ត្រា រដ្ឋលេខាធិការក្រសួងបរិស្ថាន បានបញ្ជាក់នៅក្នុងសន្និសីទសារព័ត៌មានថា ជាលើកទី២ហើយ ដែលក្រសួងបរិស្ថាន បានសហការជាមួយនឹងសហព័ន្ធកីឡាយានយន្តកម្ពុជា រៀបចំការប្រណាំងរថយន្តនេះ។ សម្រាប់ឆ្នាំនេះ ការប្រណាំងឆ្លងកាត់៣ខេត្តដែរ គឺខេត្តកំពង់ធំ ព្រះវិហារ និងសៀមរាប ពិសេសក្បួនបានឆ្លងកាត់មួយផ្នែក នៃដែនជម្រកសត្វព្រៃឡង់។

លោកអះអាងថា ដែនជម្រកសត្វព្រៃឡង់មានទំហំជាង៤៣ម៉ឺនហិកតា ដែលលាតសន្ធឹងលើខេត្តចំនួន៤ គឺខេត្តកំពង់ធំ ព្រះវិហារ ក្រចេះ និង ខេត្តស្ទឹងត្រែង។ ក្បួនប្រណាំងនេះ នឹងជួយអប់រំប្រជាជនឲ្យបោះបង់ចោលការចូលព្រៃបរបាញ់សត្វ និងកាប់ព្រៃដោយណែនាំពួកគាត់ឲ្យងាកមកចាប់អាជីពដែលទាក់ទងនឹងទេសចរណ៍ដើម្បីចិញ្ចឹម ជីវិតដូចជាលក់ម្ហូបអាហារ ឬ ធ្វើជាមគ្គុទ្ទេសក៍ទេសចរណ៍វិញ។

សូមបញ្ចាក់ថា ជាមួយនឹងការធ្វើសន្និសីទកាសែតនេះ ក្រុមហ៊ុនតូតាល់ និង ក្រុមហ៊ុនKaraក៏បានចុះMOUស្ដី ពីការបន្តសហការគ្នារៀបចំព្រឹត្តិការណ៍ប្រណាំងយានយន្តបន្តទៀត។

កាលពីឆ្នាំ២០១៨ ព្រឹត្តិការណ៍ប្រណាំងរថយន្តឆ្លងកាត់ឧបសគ្គនេះ បានឆ្លងកាត់៣ខេត្ត គឺខេត្តកំពង់ស្ពឺ ខេត្តកំពត និង ខេត្តព្រះសីហនុ៕