កណ្តាល ៖ បុរសម្នាក់ ដែលជាមុខសញ្ញាប្រើប្រាស់ថ្នាំញៀនបានត្រូវសមត្ថកិច្ចនគរបាលស្រុកល្វាឯម ធ្វើការឃាត់ខ្លួនបន្ទាប់ពីមានអំពើឃាតកម្មនៅក្នុងផ្ទះ(ច្របាច់កប្រពន្ធ)។
ក្រោយការចាប់ខ្លួនជនសង្ស័យសារភាពថា ខ្លួនជាអ្នកប្រព្រឹត្តសម្លាប់ប្រពន្ធ ព្រោះប្រច័ណ្ឌរឿងមានប្រុស។
ហេតុការណ៍នេះ បានកើតឡើងនៅថ្ងៃច័ន្ទ ៣កើត ខែពិសាខ ឆ្នាំកុរ ឯកស័ក ព-ស ២៥៦២ ត្រូវនិងថ្ងៃទី០៦ ខែឧសភា ឆ្នាំ២០១៩ នៅចំណុចផ្ទះឪពុកជនរងគ្រោះ ឈ្មោះ ផូ កុសល្យ ភូមិកោះរះលើ ឃុំកោះរះ ស្រុកល្វាឯម ខេត្តកណ្ដាល។
ជនរងគ្រោះឈ្មោះ សល្យ យ៉ាដា ភេទស្រី អាយុ២៧ឆ្នាំ ជនជាតិខ្មែរ មុខរបរលក់ដូរ មានទីលំនៅភូមិ កោះរះលើ ឃុំកោះរះ ស្រុកល្វាឯម ខេត្តកណ្ដាល។
ជនសង្ស័យមានឈ្មោះ ហ៊ន ប៊ន ភេទប្រុស អាយុ២៧ឆ្នាំ មានទីលំនៅភូមិ កោះរះលើ ឃុំកោះរះ ស្រុកល្វាឯម ខេត្តកណ្ដាល។
នគរបាលស្រុកល្វាឯមបានឲ្យដឹងថា មុនពេលកើតហេតុជនរងគ្រោះឈ្មោះ សល្យ យ៉ាដា និងប្តី(ជនសង្ស័យ)ឈ្មោះ ហ៊ន ប៊ន បានដេកជាមួយគ្នានិងកូនស្រីម្នាក់ទៀត អាយុ៤ឆ្នាំនៅក្នុងបន្ទប់លើផ្ទះដល់ថ្ងៃទី០៦ ខែឧសភា ឆ្នាំ២០១៩ វេលាម៉ោង៤និង៣០នាទី ជនសង្ស័យជាប្តីបានងើបពីដេក ឈឺនោមដាក់កន្ថោរ នៅក្នុងបន្ទប់ ក្រោយពេលនោមហើយបានឡើងទៅលើគ្រែវិញ ដោយក្នុងចិត្តមានការខឹង ប្រចណ្ឌប្រពន្ធ ចោទប្រពន្ធថា មានប្រុស ក៏ស្ទុះ ច្របាច់.ក ប្រពន្ធរហូតដល់ប្រពន្ធឈប់រើបម្រះ ទើបលែង ហើយចុះមកដី យកម៉ូតូជិះចេញពីផ្ទះ។
តាមចម្លើយសារភាពជនសង្ស័យធ្លាប់ប្រើប្រាស់គ្រឿងញៀនខុសច្បាប់។ ហើយខ្លួនបានសម្លាប់ប្រពន្ធប្រាកដមែន៕
Source: Kampuchea Thmey Daily
0 Comments