ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានៅព្រឹកថ្ងៃទី៦ ខែ ឧសភា ឆ្នាំ២០១៩នេះ បានអនុញ្ញាតឲ្យគណៈប្រតិភូនៃក្រុមភ្នាក់ងារអង្គការសហប្រជាជាតិប្រចាំនៅកម្ពុជាដឹក នាំដោយលោកស្រី ប៉ូលីន ថាមេស៊ីស (Pauline Tamesis) អ្នកសម្របសម្រួលអង្គការសហប្រជាជាតិប្រចាំកម្ពុជាចូលជួបពិភាក្សាការងារនៅវិមានសន្តិភាព ដែលនៅក្នុងជំនួបនោះភាគីទាំងពីរបានពិភាក្សាផ្តោតលើចំណុចសំខាន់ៗចំនួន៣ ដែលពាក់ព័ន្ធកិច្ចគាំពារសង្គម ,ទិន្នន័យនៃការអភិវឌ្ឍប្រកបដោយចីរភាព និងការចូលរួមពិនិត្យរបាយការណ៍ថ្នាក់ជាតិលើការអនុវត្តគោលដៅអភិវឌ្ឍន៍ដោយចីរភាព។
លោក អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានប្រាប់អ្នកសារព័ត៌មានបន្ទាប់ ពីជំនួបនោះថា លោកស្រី ប៉ូលីន ថាមេស៊ីសអ្នកសម្របសម្រួលអង្គការសហប្រជាជាតិប្រចាំកម្ពុជាបានជម្រាបជូនសម្ដេចតេជោ ហ៊ុន សែន ថា៖ អង្គការសហប្រជាជាតិសូមសំដែងការអបអរសាទរចំពោះការងារដែលបានអនុវត្តនាឆ្នាំកន្លងរវាងភ្នាក់ងារអង្គការសហប្រជាជាតិនិងស្ថាប័នរាជរដ្ឋាភិបាលកម្ពុជា។
លោក អ៊ាង សុផល្លែត បានឲ្យដឹងទៀតថា នៅកិច្ចប្រជុំនោះក្រុមភ្នាក់ងារអង្គការសហប្រជាជាតិបានលើកឡើងនូវ ៣ចំណុច។ ចំណុចទី១-ពាក់ព័ន្ធទៅនឹងកិច្ចគាំពារសង្គមប្រព័ន្ធអង្គការសហប្រជាជាតិបានលើកឡើងនូវ៣ចំណុចទី១.គឺការសម្របសម្រួលរវាងស្ថាប័នរដ្ឋនិងហេដ្ឋារចនាសម្ព័ន្ធក្នុងការកសាងសមត្ថភាព, ទី២-កិច្ចការគាំពារសង្គមនិងហិរញ្ញវត្ថុនិងទី៣-ការគាំពារសង្គមជាមួយនឹងការអនុវត្តប្រកបដោយសមភាព។
ទាក់ទងបញ្ហានេះសម្ដេចតេជោ ហ៊ុន សែន បានអនុញ្ញាតដោយក្រសួងចំនួន ៧ ធ្វើការបកស្រាយជូនក្រុមភ្នាក់ងារអង្គការសហប្រជាជាតិក្នុងនោះមានក្រសួងសេដ្ឋកិច្ចនិងហិរញ្ញវត្ថុ,ក្រសួងការងារនិងបណ្ដុះបណ្ដាលវិជ្ជាជីវៈ,ក្រសួងសុខាភិបាល,ក្រសួងផែនការ,ក្រសួងកិច្ចការនារី ក្រសួងសង្គមកិច្ច និងក្រសួងអប់រំ។
ពាក់ព័ន្ធបញ្ហានេះផងដែរសម្តេចតេជោ ហ៊ុន សែន នាយករដ្ឋន្ត្រីកម្ពុជាក៏បានជម្រាបជូនភ្ញៀវថា៖ កម្ពុជា ការដើមឡើយមានភាពក្រីក្ររហូតដល់ ១00% ហើយក៏មានការចាប់ផ្ដើមឡើងនិងមានការគាំពារ សង្គមដល់ស្ត្រីមានផ្ទៃពោះជាមន្ត្រីរាជការ,រហូតដល់មានការគាំពារស្ត្រីមានផ្ទៃពោះដែលជាកម្មការិនីនៅតាមរោងចក្រ និងចុងក្រោយមានការគាំពារដល់ស្ត្រីមានផ្ទៃពោះដែលមានភាពក្រីក្រនិងក៏បានធ្វើការងារមួយចំនួនថែមទៀតរួមទាំងកាត់បន្ថយការកាត់បន្ថយតម្លៃអគ្គិសនី ការកាត់បន្ថយថ្លៃទឹកការកសាងហេដ្ឋារចនាសម្ព័ន្ធ,ការជីកអណ្តូងទឹក ស្រះទឹកជាដើមនោះគឺសុទ្ធតែជាកិច្ចគាំពារសង្គមតែម្ដង។
លោក អ៊ាង សុផល្លែត បានឲ្យដឹងទៀតថាចំណុចទី២ ដែលក្រុមអង្គការសហប្រជាជាតិបានលើក ឡើងក្នុងកិច្ចប្រជុំនោះ គឺពាក់ព័ន្ធទៅទិន្នន័យនៃការអភិវឌ្ឍប្រកបដោយចីរភាព។
ចំណុចទី២នេះសម្ដេចតេជោ នាយករដ្ឋមន្ត្រីបានអនុញ្ញាតឲ្យក្រសួងចំនួន៤ ធ្វើការបកស្រាយជូនក្រុមភ្នាក់ងារអង្គការសហប្រជាជាតិប្រចាំនៅកម្ពុជាក្នុងនោះមានក្រសួងផែនការ,ក្រសួងសេដ្ឋកិច្ចហិរញ្ញវត្ថុ,ក្រសួងកិច្ចការនារីនិងក្រសួងអប់រំ យុវជន និង កីឡា។
ចំណុចនេះសម្ដេចតេជោនាយករដ្ឋមន្ត្រីក៏បានធ្វើការបញ្ជាក់ចំពោះប្រព័ន្ធអង្គការសហប្រជាជាតិដែលស្នើឲ្យមានការបង្កើននូវថវិកាជាតិនិងពង្រឹងសមត្ថភាពមន្ត្រីស្ថាប័នការងារទិន្នន័យសម្រាប់ការអភិវឌ្ឍនេះ។ សម្ដេចតេជោនាយករដ្ឋមន្ត្រីបានធ្វើការបកស្រាយថា កន្លងមករាជរដ្ឋាភិបាលកម្ពុជាបានជំរុញនិងផ្ដល់ថវិកាជាតិជាប្រចាំ សង្ឃឹមថា នឹងបង្កើនថវិកាថែមទៀតសម្រាប់ការងារទិន្នន័យសម្រាប់ការអភិវឌ្ឍនេះ។ ដោយឡែកពាក់ព័ន្ធនឹងការពង្រឹងសមត្ថភាពសម្ដេចក៏បានធ្វើការណែនាំឲ្យធ្វើយ៉ាងណាមានការជំរុញឲ្យមានការសិក្សានៅថ្នាក់បរិញ្ញាបត្រក៏ដូចជាបរិញ្ញាបត្រជាន់ខ្ពស់ពាក់ព័ន្ធនឹងវិស័យនេះ ដើម្បីជំរុញការអប់រំរហូតដល់ថ្នាក់បញ្ញានិងបញ្ញាជាន់ខ្ពស់ពាក់ព័ន្ធនឹងកម្មវិធីទិន្នន័យសម្រាប់ការអភិវឌ្ឍនេះ។
ចំណុចទី ៣ ក្រុមភ្នាក់ងារអង្គការសហប្រជាជាតិបានស្នើឲ្យមានការចូលរួមពិនិត្យរបាយការណ៍ថ្នាក់ជាតិលើការអនុវត្តគោលដៅអភិវឌ្ឍន៍ដោយចីរភាពរបស់អង្គការសហប្រជាជាតិដែលនឹងត្រូវធ្វើឡើងនៅទីក្រុងញូវយ៉ក សហរដ្ឋអាមេរិកនៅខែកក្កដាឆ្នាំ ២០១៩នេះ និង មានការចូលរួមគាំទ្រពីស្ថាប័នពាក់ព័ន្ធ។
ចំណុចនេះសម្ដេចតេជោនាយករដ្ឋមន្ត្រីបានអនុញ្ញាតឲ្យក្រសួងផែនការធ្វើការបកស្រាយហើយសម្តេចបានបន្ថែមផងដែរថា កម្ពុជាបានត្រៀមខ្លួនជាស្រេចដើម្បីចូលរួមប្រជុំនៅខែ កក្កដាខាងមុខនេះ។ ពាក់ព័ន្ធការស្នើឲ្យមានការគាំទ្រឲ្យមានការចូលរួមគាំទ្រពីស្ថាប័នពាក់ព័ន្ធសម្ដេចបានលើកឡើងថា រាល់ថ្ងៃនេះប្រព័ន្ធការងារគឺមានការសម្របសម្រួលគ្នាដោយមានការចូលរួមជាពិសេសពីឧត្តមក្រុមប្រឹក្សសេដ្ឋកិច្ចជាតិផងដែរ។
គួរបញ្ជាក់ថា ជំនួបរវាងប្រតិភូក្រុមការភ្នាក់ងារអង្គការសហប្រជាជាតិប្រចាំនៅកម្ពុជានិងរាជរដ្ឋាភិបាលតែងជួបគ្នា ១ឆ្នាំម្តងជារៀងរាល់ឆ្នាំហើយនេះជាលើកទី ៥ ហើយដែលភ្នាក់ងារអង្គការសហប្រជាជាតិប្រចាំនៅកម្ពុជាបានជួបជាមួយនឹងរាជរដ្ឋាភិបាល៕
Source: Kampuchea Thmey Daily
0 Comments