ភ្នំពេញ ៖ សហព័ន្ធកីឡាខ្មែរទោចក្រយាន បានបង្កើតព្រឹត្តិការណ៍ប្រណាំងកង់ភ្នំដើម្បីអភិវឌ្ឍវិស័យប្រណាំងកង់ភ្នំនៅកម្ពុជាឲ្យកាន់តែផុលផុសថែមទៀតខណៈការប្រណាំងកង់ភ្នំដំណាក់កាលទី១នៅរាជធានីភ្នំពេញមានអ្នកចូលរួមច្រើនជាបណ្តាឆ្នាំមុនៗប្រមាណជិត១០០នាក់ទាំងមនុស្សចាស់និងកុមារផងដែរ។
ថ្លែងក្រោយបញ្ចប់ព្រឹត្តិការណ៍ប្រកួតប្រណាំងកង់ភ្នំ ឬហៅថា( Mountai Biking Series ឆ្នាំ២០១៩) កាលពីអាទិត្យទី៥ខែឧសភាកន្លងទៅនៅទីលានប្រណាំងព្រែកលៀប លោក ព្យែ អ៊ីវកាត់ទ្រី អគ្គលេខាធិការរងសហព័ន្ធកីឡាខ្មែរទោចក្រយាននិងជាស្ថាបនិកបង្កើតព្រឹត្តិការណ៍នេះបានឲ្យដឹងថា ការប្រកួតដំណាក់កាលទី១ គឺទទួលបានជោគជ័យ ជាងឆ្នាំមុនៗព្រោះមានអ្នកចូលរួមច្រើនលើសពីការរំពឹងទុក ពិសេសគឺក្មេងៗតែម្តង។
លោក ព្យែ អ៊ីវកាត់ទ្រី បញ្ជាក់ថា ការប្រកួតជុំដំបូងនេះ ភូមិសាស្ត្រផ្លូវប្រកួតហាក់ ស្រួលបន្តិច សម្រាប់អ្នកចូលរួម ត្បិតយើងចង់ឲ្យកីឡាករកីឡាការិនីចូលរួមប្រកួតបានច្រើន ។ ប៉ុន្តែដំណាក់កាលប្រកួតជុំបន្តបន្ទាប់ទៀតយើងនិងធ្វើផ្លូវសម្រាប់ប្រកួតឲ្យមានសភាពលំបាកបន្តិចម្តងៗតាមដំណាក់កាលនៃការប្រកួត។
ដោយឡែក លោក អ៊ុ វណ្ណៈ ប្រធានផ្នែកទំនាក់ទំនងក្រុមហ៊ុនវីតាល់បានលើកឡើងថា ការចូលរួមគាំទ្រឧបត្ថម្ភ ពីវីតាល់ក្នុងព្រឹត្តិការណ៍ប្រណាំងកង់ដ៍ពេញនិយមមួយនេះ គឺធ្វើឡើងក្នុងគោលដៅ រួមចំណែកជំរុញការអភិវឌ្ឍវិស័យប្រណាំងកង់ភ្នំនៅកម្ពុជាឲ្យកាន់តែមានភាពផុលផុសខ្លាំងឡើងៗនិងដើម្បីផលិតបាននូវធនធានកីឡាករកីឡាការិនីកង់ភ្នំល្អៗត្រៀមចេញប្រកួតប្រជែងទាំងនៅថ្នាក់ជាតិនិងអន្តរជាតិនាពេលខាងមុខ។
លោកបានបន្តទៀតថា វីតាល់តែងចូលរួម ឧបត្ថម្ភគ្រប់សកម្មភាព ដូច ការងារសង្គម មនុស្សធម៌ និងសកម្មភាពកីឡា តាមរយៈមូលនិធិ២៥រៀល ដែលប្រជាពលរដ្ឋជាវទឹកវីតាល់១ទឹក១ដបយកទៅពិសារ។
សូមបញ្ជាក់ថា ព្រឹត្តិការណ៍ប្រកួតប្រណាំងកង់ភ្នំដែលប្រសិទ្ធិនាមថា Mountai Biking Series ឆ្នាំ២០១៩មានចំនួន៥ដំណាក់កាល ដំណាក់កាលទី១ ធ្វើនៅទីលានប្រណាំងព្រែកលៀប នាព្រឹកថ្ងៃអាទិត្យទី៥ខែឧសភា ម្សិលមិញនេះ រីឯដំណាក់កាលទី២ ធ្វើនៅខេត្តកែបនាថ្ងៃទី១៦ ខែមិថុនា ដំណាក់កាលទី៣ធ្វើនៅភ្នំជៀល ខេត្តកំពង់ស្ពឺថ្ងៃទី២១ ខែ សីហា ដំណាក់កាលទី៤ធ្វើនៅភ្នំបាសិទ្ធិ ខេត្តកណ្តាល ថ្ងៃទី៣ ខែវិច្ឆិកា និងដំណាក់កាលទី៥ ជុំចុងក្រោយធ្វើនៅ កំពូលភ្នំគិរីរម្យថ្ងៃទី១៥ ខែ ១២ ឆ្នាំ២០១៩៕
Source: Kampuchea Thmey Daily
0 Comments