កំពង់ចាម ៖ ជនអនាមិក បានយកវ៉ាលិសមកផ្លុងចោលនៅមុខទូដកប្រាក់ អេធីអឹមរបស់ធនាគារស្ថាបនា កាលពីថ្ងៃទី២៦ ខែមេសា ឆ្នាំ២០១៩ បង្កឲ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋក្នុងក្រុងកំពង់ចាម ហើយរហូតមកដល់ថ្ងៃទី៦ ខែឧសភា ឆ្នាំ២០១៩នេះ សមត្ថកិច្ចបានរកឃើញជនសង្ស័យហើយ គឺជាមនុស្សមានសតិមិនល្អ។
ប៉ូលិសបានឲ្យដឹងថា នៅថ្ងៃទី០៦ ខែឧសភា ឆ្នាំ២០១៩ វេលាម៉ោង៩ព្រឹក កម្លាំងប៉ុស្តិ៍កំពង់ចាមល្បាតក្នុងភូមិសាស្ត្រ បានប្រទះឃើញមុខសញ្ញាសង្ស័យ០១នាក់ នៅចំណុចផ្លូវភ្លោះម្តុំផ្ទះសំណាក់ផ្កាឈូកទិព្វ ស្ថិតក្នុងភូមិទី១៥ សង្កាត់កំពង់ចាម ក្រុងកំពង់ចាម ដែលជាជនសង្ស័យពាក់ព័ន្ធក្នុងករណីដាក់វ៉ាlisចាស់ និង លុយដុល្លារឆេងម៉េង ក្នុងទូអេធីអឹមធនាគារស្ថាបនា កាលពីថ្ងៃទី២៦ ខែមេសា ឆ្នាំ២០១៩ វេលាម៉ោង១៤ នៅចំណុចក្បែរដើមពោធិ ម្តុំផ្សារាត្រី ស្ថិតក្នុងភូមិទី១៥ សង្កាត់កំពង់ចាម ក្រុងកំពង់ចាមហើយ។
ប៉ូលិសបានឲ្យដឹងថា សមត្ថកិច្ចបាននាំខ្លួនជនសង្ស័យបញ្ជូនមកកាន់អធិការដ្ឋាននគរបាលក្រុងកំពង់ចាម ដើម្បីធ្វើការសាកសួរ។
ជនសង្ស័យ ឈ្មោះ ឌុល ឌុច ភេទប្រុស អាយុ២៩ឆ្នាំ រស់នៅភូមិ វាលខ្សាច់ ឃុំរអាង ស្រុកកំពង់សៀម ខេត្តកំពង់ចាម ជាមនុស្សមានសតិមិនល្អ បានឆ្លើយបំភ្លឺជូនសមត្ថកិច្ចយើងថា កន្លងមកខ្លួនធ្លាប់ដើររើសអេតចាយ និងបានយកនាឡិកាចាស់ៗ.ថ្មទូរស័ព្ទចាស់ៗ.កូនជ្រូកដី មកដាក់ចូលក្នុងទូATM៣ទៅ៤ដង រហូតដល់ថ្ងៃទី២៦ ខែមេសា ឆ្នាំ២០១៩ មិនចាំម៉ោង ខ្លួនបានរើសបានវ៉ាលិសចាស់មួយ ក៏បានយកស្នោ និងលុយដុល្លារឆេងម៉េងបិទដាក់ក្នុងវ៉ាលិស ដោយខ្លួន ធ្លាប់បានមើលក្នុងរឿងភាគហុងកុង ឃើញគេដាក់លុយក្នុងវ៉ាលិស ក៏ដាក់តាម រួចយកទៅទុកចោលក្នុងទូATMធនាគារស្ថាបនា ស្ថិតក្នុងភូមិទី១៥ សង្កាត់កំពង់ចាម ពិតប្រាកដមែន ហើយចេញទៅផ្ទះបាត់។
ជនសង្ស័យបន្តថា នៅថ្ងៃទី៦ ខែឧសភា ឆ្នាំ២០១៩ វេលាពេលព្រឹក ខ្លួនបានដើរមករើសអេតចាយនៅក្បែរនោះ ក៏ត្រូវប៉ូលិសហៅមកតែម្តង។
ប៉ូលិសបន្តថា ផ្អែកតាមរូបភាពកាមេរ៉ាសុវត្ថិភាពជាប់ក្នុងទូ ATM សមត្ថកិច្ចយើងបានយកមកបង្ហាញឲ្យជនសង្ស័យពិនិត្យមើល ជនសង្ស័យបានឆ្លើយថា ពិតជារូបរបស់ខ្លួនពិតប្រាកដមែន ចំពោះខោ-អាវ និងមួកខ្លួនបានបោះចោលអស់ហើយ។
ប៉ូលិសបញ្ជាក់ថា ដោយមានការឯកភាពពី លោក ហួត វុទ្ធី ព្រះរាជអាជ្ញា បានអនុញ្ញាតឲ្យជនខាងលើនេះ ជាមនុស្សមានសតិមិនល្អត្រឡប់ទៅលំនៅដ្ឋានវិញ៕
Source: Kampuchea Thmey Daily
0 Comments