ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ ហ៊ានប្ដឹងជំទាស់ជាមួយការសម្រេចរបស់ចៅហ្វាយខេត្តមែន?

កំពង់ស្ពឺ ៖ លោក ឈៀង តុលា ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ ពិតជាថ្លើមធំ ហ៊ានប្តឹងជំទាស់ការសម្រេចរបស់លោកអភិបាលខេត្តកំពង់ស្ពឺ ជុំវិញករណីចេញប្លង់កម្មសិទ្ធិដីធ្លីជូនប្រជាពលរដ្ឋ រស់នៅលើអតីតដីចំក្រុមហ៊ុនអភិវឌ្ឍន៍ដំណាំកសិកម្មស្វាយចន្ទីអ៊ុកឃុនមែនឬ?។

ប្រភពពីមន្ត្រីដែលស្និតនឹងលោក វ៉ី សំណាង អភិបាលខេត្តកំពង់ស្ពឺបានបង្ហើបប្រាប់ឲ្យដឹងនៅថ្ងៃទី០៦ ខែឧសភា ឆ្នាំ២០១៩ថា លោកឈាង តុលា ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ ដែលធ្លាប់តែល្បីល្បាញពាក់ព័ន្ធរឿងអាស្រូវក្នុងបទល្មើសព្រៃឈើ និងប្តូរដីជាច្រើនកន្លែង តាំងពីពាយ័ព្យ(ឧត្តរមានជ័យ) ភូមិភាគឦសាន្តប៉ុន្មានឆ្នាំចុងក្រោយនេះ ក្លាយជាប្រធានមន្ទីរកសិកម្មខេត្តកំពង់ស្ពឺ ក្រោយពីរៀបចំរចនាសម្ព័ន្ធគ្រប់គ្រងថ្មី។

ក្នុងការដឹកនាំកន្លងមកលោក ឈាង តុលា ឮតែកូនចៅប្តឹងមិនចេះចប់មិនចេះ ហើយមិនទាន់ដោះស្រាយចប់សព្វគ្រប់ផង ស្រាប់តែពេលនេះ លោក ឈៀង តុលា ប្តឹងទាស់លិខិតរបស់ លោក វ៉ីសំណាង អភិបាលខេត្តកំពង់ស្ពឺ មិនឲ្យចេញប័ណ្ណកម្មសិទ្ធិដីជូនប្រជាពលរដ្ឋឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺទៀត។

មន្ត្រីមន្ទីររៀបចំដែនដីនគរូបនីយកម្ម និងភូមិបាលខេត្តកំពង់ស្ពឺ សុំមិនបញ្ចេញឈ្មោះ បានប្រាប់ឲ្យដឹងថា «មន្ត្រីរបស់យើងខិតខំអនុវត្តន៍តាមបទបញ្ជារបស់រាជរដ្ឋាភិបាលក្រសួងរៀបចំដែនដីនគររូបនីយកម្ម និងសំណង់ ក៏ដូចជាលិខិតបទដ្ឋាននានារបស់រដ្ឋបាលខេត្តកំពង់ស្ពឺ ដើម្បីផ្តល់សិទ្ធិស្របច្បាប់ជូនប្រជាពលរដ្ឋតាំងពីមុនមកដល់ពេលនេះ មានរយៈពេលជាង៣ឆ្នាំហើយ តែលទ្ធផលចុងក្រោយ លោក ឈៀង តុលា បែរជាប្តឹងទាស់មិនឲ្យខេត្តចេញប័ណ្ណកម្មសិទ្ធិជូនប្រជាពលរដ្ឋទៅវិញ។ តើថ្នាក់ដឹកនាំខេត្ត និងរាជរដ្ឋាភិបាល ទុកឲ្យមន្ត្រីរូបនេះធ្វើអ្វីស្រេចតែចិត្ត ឬយ៉ាងណា?។

អាជ្ញាធរឃុំត្រែងត្រយឹងបាននិយាយថា «ដីដែលមន្ត្រសុរិយោដីកំពុងវាស់វែងធ្វើប័ណ្ណកម្មសិទ្ធិជូនប្រជាពលរដ្ឋនោះ ជាដីសម្បទានសេដ្ឋកិច្ចរបស់ក្រុមហ៊ុនអភិវឌ្ឍន៍ដំណាំកសិកម្មអ៊ុក ឃុន ដែលមានទំនាស់រ៉ាំរ៉ៃជាមួយប្រជាពលជាង២០ឆ្នាំមកហើយ»។

ក្រុមហ៊ុននេះចេះតែអះអាងថា ខ្លួនបានទទួលសិទ្ធិពីរដ្ឋាភិបាល ប៉ុន្តែការពិតទីតាំងទំនាស់នោះសុទ្ធតែភូមិឋានប្រជាពលរដ្ឋកំពុងរស់នៅអាស្រ័យផលចម្ការដំណាំ សាលារៀន មន្ទីរពេទ្យ វត្តអារាមទីតាំងអង្គភាពយោធាជាច្រើន ទើបរដ្ឋាភិបាល សម្រេចប្រគល់ជូនផ្នែកជំនាញវាស់វែងជូនប្រជាពលរដ្ឋតាមលក្ខណប្រព័ន្ធ។

ប្រសិនបើ លោក ឈាង តុលា ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ ប្តឹងទាស់បែបនេះមែននោះ ប្រជាពលរដ្ឋ និងអាជ្ញាធរតាមលំដាប់ថ្នាក់ ពិតជាមិនយល់ព្រមទេ ហើយនឹងលើកសំណើជូនទៅលោកអភិបាលខេត្តជាម៉ែឪឲ្យជួយដោះស្រាយរឿងនេះជាមិនខានឡើយ។

សូមបញ្ជាក់ថា ក្រុមហ៊ុនអ៊ុក ឃុន បានទទួលដីសម្បទានពីរដ្ឋាភិបាលតាំងពីឆ្នាំ១៩៩៣មកម្ល៉េះ តែក្រុមហ៊ុននេះ មិនបានអភិវឌ្ឍន៍តាមផែនការណ៍របស់ខ្លួនទេ ចេះតែកាងដីទុកបង្កទំនាស់ជាមួយប្រជាពលរដ្ឋ និងក្រុមហ៊ុនអភិវឌ្ឍន៍ផ្សេងៗទៀត រហូតមក ទើបរដ្ឋាភិបាលសម្រេចប្រគល់ចម្ការស្វាយចន្ទី៥០ហិកតាឲ្យទៅតំណាងក្រុមហ៊ុនសិង្ហបុរី។

ក្រៅពីនោះ រដ្ឋាភិបាល បានឲ្យក្រសួងដែនដីនគររូបនីយកម្ម និងរដ្ឋបាលខេត្ត វាស់វែងចេញប្លង់កម្មសិទ្ធិជូនប្រជាពលរដ្ឋតាំងពីឆ្នាំ២០១៧មក ទើបតែថ្ងៃទី៨ ខែមេសា ឆ្នាំ២០១៩នេះ លោក ឈៀងតុលា បុរសខ្លាំងធ្លាប់ចល័តខ្លួនពេញផ្ទៃប្រទេស ហ៊ានចេញលិខិតប្តឹងទាស់ជាមួយរដ្ឋបាលខេត្ត ក៏ដូចជារដ្ឋាភិបាលតែម្តង។

សូមរង់ចាំមើលបន្តទៀត លើលិខិតប្តឹងរបស់ លោក ឈៀង តុលា តើមានប្រសិទ្ធភាពជាងរដ្ឋបាលខេត្ត ឬយ៉ាងណា?

អាជ្ញាធរស្រុកភ្នំស្រួចបានឲ្យដឹងថា បច្ចុប្បន្ននេះ ដីសម្បទានសេដ្ឋកិច្ចដែលរាជរដ្ឋាភិបាលប្រគល់ឲ្យក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុក ឃុន នៅឃុំត្រែងត្រយឹង កាន់តែបង្កភាពស្មុគស្មាញក្នុងករណីទំនាស់ដីធ្លី ធ្វើឲ្យអាជ្ញាធរពិបាកដោះស្រាយយ៉ាងខ្លាំង។

ប្រភពបន្តទៀតថា «ក្រុមហ៊ុនអ៊ុកឃុន បានកែនប្រជាពលរដ្ឋចំណាកស្រុក មកចាប់ទន្ទ្រានហ៊ុមព័ទ្ធពុះចែកដីឡូត៍លក់ដូរយ៉ាងអនាធិបតេយ្យ មិនស្តាប់តាមការណែនាំរបស់អាជ្ញាធរឡើយ ហើយពេលនេះ ក្នុងតំបន់នោះ ស្ទើរក្លាយជាតំបន់អភិគម(ភាពអនាធិបតេយ្យ)»។

អាជ្ញាធរស្រុកភ្នំស្រួចបានឲ្យដឹងថា «ក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន បច្ចុប្បន្នគ្រប់គ្រងដោយលោកស្រីសុខ សុភាព និងមានលោក អ៊ុក វិច្ឆិកា កូនប្រុសជាដំណាងក្រុមហ៊ុន ស្ថិតក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ»។

សូមរម្លឹកថា ក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន បានទទួលសិទ្ធិវិនិយោគសម្រាប់ដាំដំណាំកសិ-ឧស្សាហកម្ម ស្ថិតនៅក្នុងឃុំចំនួន០៣ គឺឃុំត្រែងត្រយឹង ឃុំអូរ និងឃុំដំបូករូង ស្រុកភ្នំស្រួច លើផ្ទៃដីទំហំសរុបប្រមាណជាង១២.៥០៦ហិកតា ដោយបានចុះកិច្ចសន្យាជាមួយក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៣ ខែមេសា ឆ្នាំ១៩៩២។

នៅអំឡុងឆ្នាំ១៩៩២ នៅស្រុកភ្នំស្រួចពុំ សង្គ្រាមស៊ីវិលមិនទាន់បានបញ្ចប់នៅឡើយទេ ជាពិសេសភូមិសាស្ត្រឃុំត្រែងត្រយឹង ជាតំបន់ដែលត្រូវបានកងទ័ពខ្មែរក្រហមវាយឆ្មក់ជាញឹកញាប់។ សម្រាប់ការផ្តល់សិទ្ធិវិនិយោគឲ្យទៅក្រុមហ៊ុនអ៊ុកឃុន នាពេលនោះ ក្រុមការងារជំនាញក្រសួងកសិកម្មរុក្ខាប្រមាញ់ និងនេសាទ ពុំបានចុះធ្វើការសិក្សាអំពីផលប៉ះពាល់ឲ្យបានលំអិតឡើយដោយក្រុមការងារគូសនៅលើផែនទីភ្ជាប់នឹងកិច្ចសន្យាវិនិយោគតែម្តង។

ការគូសផែនទីផ្តល់ដីសម្បទានសេដ្ឋកិច្ចឲ្យក្រុមហ៊ុនអភិវឌ្ឍន៍ដំណាំឧស្សាហកម្មពេលនោះទៀតសោត ជាន់ទៅលើទីតាំងដីភូមិដ្ឋានរបស់ប្រជាពលរដ្ឋដែលរួមមាន ដីលំនៅដ្ឋានដីស្រែចម្ការ ទីតាំងវត្តអារាម សាលារៀន សាលាឃុំ និងទីតាំងកម្លាំងកងទ័ពឈរជើងផងដែរ។

បន្ទាប់ទទួលបានសិទ្ធវិនិយោគពីរដ្ឋាភិបាលក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន មិនបានធ្វើតាមកិច្ចសន្យានោះឡើយ ដោយធ្វើការដាំដុះស្វាយចន្ទីបានតែប្រមាណជាង១០០ហិកតាប៉ុណ្ណោះ។

នៅថ្ងៃទី២១ ខែសីហា ឆ្នាំ២០១៥ ទីស្តីការគណៈរដ្ឋមន្ត្រីបានចេញលិខិតលេខ៩៥៦ស.ជ.ណបានសម្រេចប្រគល់ដីចំការស្វាយចន្ទី៥២ហិកតាឲ្យទៅក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុនគ្រប់គ្រង និង៥០ហិកតាទៀតឲ្យទៅក្រុមហ៊ុនសិង្ហបុរី ក៏ប៉ុន្តែក្រុមហ៊ុនអ៊ុកឃុន មិនអនុវត្តន៍តាមឡើយ នៅតែបន្តធ្វើសកម្មភាពរញ៉េរញ៉ៃដដែល។

ជាក់ស្ដែង បច្ចុប្បន្ននេះ ក្រុមហ៊ុនអ៊ុកឃុន ធ្វើសកម្មភាពយកដីសម្បទានរបស់រដ្ឋក្នុងទំហំ៥២ហិកតាដោយពុះជាឡូត៍ៗ លក់ដូរយ៉ាងអនាធិបតេយ្យ, ធ្វើការកែនប្រជាពលរដ្ឋចំណាកស្រុកជាច្រើនគ្រួសារចូលទន្ទ្រានកាន់កាប់ដីរបស់ឈ្មោះពិតនិមលនៅចំណុចអូរចោទភូមិទី៦ឃុំត្រែងត្រយឹង, ដឹកនាំប្រជាពលរដ្ឋទន្ទ្រានចូលកាន់កាប់ដីកម្មសិទ្ធិរបស់ក្រុមហ៊ុនហាយផាតនើរអ៊ែសេតឯក(ក្រុមហ៊ុនកូរ៉េ) នៅចំណុចអូរចោទក្នុងភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

ក្រោយមកក្រុមហ៊ុនអ៊ុកឃុន បានកែនប្រជាពលរដ្ឋចំណាកស្រុកជាច្រើនគ្រួសារចូលទន្ទ្រានកាន់កាប់ដីសម្បទានរបស់ លោកទាវ ឃីនសេង ជនជាតិសិង្ហបុរី ដែលមានទំហំ៥០ហិកតា ដោយបានព័ទ្ធជារបងបន្លាលួសពុះជាឡូត៍ៗសង់ជារោងប្រក់ស្បូវប្រក់ស័ង្កសីច្រើនខ្នង និងបានលើកស្លាកសញ្ញាទង់គណបក្សប្រជាជនកម្ពុជាទៀតផង។

ក្នុងនោះបុគ្គល ឈ្មោះ រិន ដា ភេទប្រុស ប្រធានសន្តិសុខរបស់ក្រុមហ៊ុនអ៊ុកឃុន និងឈ្មោះអូន ទូចភេទប្រុស បានដឹកនាំកម្មកររបស់ក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន ប្រមាណជា៣០ទៅ៤០នាក់ ចូលទន្ទ្រានកាន់កាប់ដោយបានធ្វើការសាងសង់រោងជាច្រើនខ្នងលើដីកម្មសិទ្ធិរបស់ ឈ្មោះឡេង សុង នៅចំណុចអូរចោទភូមិទី៦ ឃុំត្រែងត្រយឹង, ធ្វើការរារាំងការអនុវត្តការងាររបស់ក្រុមមន្ត្រីជំនាញ ដែលបានចុះវាស់វែងដីជូនប្រជាពលរដ្ឋតាមស្មារតី នៃលិខិតលេខ៩៥៦ស.ជ.ណរបស់ទីស្ដីការគណៈរដ្ឋមន្ត្រី។

នៅដើមខែតុលា ឆ្នាំ២០១៨ ក្រុមកម្មកររបស់ក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន បានធ្វើសកម្មភាពកាប់បំផ្លាញដំណាំស្វាយចន្ទីក្នុងដីសម្បទានសេដ្ឋកិច្ចក្រុមហ៊ុនសិង្ហបុរី និងសង់រោងធ្វើពីដែកប្រក់ស័ង្កសី១២ខ្នង, រោងធ្វើអំពីឈើប្រក់ស្បូវ៥០រោង និងធ្វើរបងបន្លាលួសពុះជាឡូត៍ប្រមាណជា៥០០ឡូត៍លក់ដូរយ៉ាងអធិបតេយ្យ។

កន្លងមក ក្រុមការងារថ្នាក់ស្រុកខេត្ត ស្រុក និងមន្ត្រីជំនាញពាក់ព័ន្ធចុះទៅធ្វើការហាមឃាត់ជាច្រើនលើកច្រើនសា ប៉ុន្តែមនុស្សទាំងនោះមិនស្តាប់ការណែនាំរបស់អាជ្ញាធរឡើយ។

ជុំវិញករណីក្រុមហ៊ុនអ៊ុកឃុនបង្កភាពអនាធិប្បតេយ្យរញ៉េរញ៉ៃធ្វើឲ្យអាជ្ញាធរឈឺក្បាលរហូតដូចសព្វថ្ងៃនេះ ចំពោះវិធានការរបស់ស្ថាប័នតុលាការ និងអាជ្ញាធរខេត្ត អយ្យការអមសាលាដំបូងខេត្តកំពង់ស្ពឺ បានឃាត់ខ្លួនឈ្មោះអ៊ុក វិច្ឆិកា ដែលជាកូនប្រុសរបស់លោកស្រី សុខ សុភាព នាយិកាក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន ពីបទដឹកនាំកម្លាំងធ្វើសកម្មភាពរំលោភបំពានកម្មសិទ្ធិអ្នកដទៃដោយខុសច្បាប់ ប៉ុន្តែក្រោយមកក៏មានការដោះលែងវិញ ដោយដាក់ស្ថិតនៅក្រោមការឃ្លាំមើលពីស្ថាប័នតុលាការ។

ក្នុងនោះរដ្ឋបាលខេត្តកំពង់ស្ពឺ បានបង្កើតក្រុមការងារចម្រុះដើម្បីចុះធ្វើការដោះស្រាយករណីទន្ទ្រានកាន់កាប់ដីរបស់ក្រុមហ៊ុនសិង្ហបុរីដែលមានទំហំ៥០ហិកតា ប៉ុន្តែពុំទទួលបានលទ្ធផលនោះទេ។

នៅថ្ងៃទី២៩ និង៣០ ខែមករា ឆ្នាំ២០១៩កន្លងមកនេះ ក្រុមការងារចម្រុះខណ្ឌរដ្ឋបាលព្រៃឈើកំពង់ស្ពឺ ចុះធ្វើបច្ចុប្បន្នភាពនៅក្រុមហ៊ុនអ៊ុកឃុន នៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺផងដែរ។

កាលពីថ្ងៃអង្គារ៩រោច ខែបុស្ស ឆ្នាំច ព.ស២៥៦២ ត្រូវនឹងថ្ងៃទី២៩ ខែមករា ឆ្នាំ២០១៩ លោកអ៊ុំ ដេតអភិបាលរងស្រុកភ្នំស្រួច រួមសហការជាមួយក្រុមការងារថ្នាក់ឃុំ បានចុះឃាត់គ្រឿងចក្រពាក់ព័ន្ធក្រុមហ៊ុនអភិវឌ្ឍន៍ដំណាំឧស្សាហកម្ម អ៊ុកឃុន ដែលបានធ្វើសកម្មភាពទន្ទ្រានឈូសឆាយ និងកាយដីលើដីរបស់ប្រជាពលរដ្ឋ០២គ្រួសារ នៅចំណុចភូមិពាមទុង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

សូមរម្លឹកទៀត បន្ទាប់ពីមានចលនាបំផុសបំផុលឲ្យមានសកម្មភាពអនាធិបតេយ្យចូលទន្ទ្រានរំលោភដីធ្លីក្នុងតំបន់ខាងលើ ក៏កើតមានអំពើឃាតកម្មបាញ់សម្លាប់យុវជនម្នាក់ នៅយប់ថ្ងៃទី២៧ ខែមករាឆ្នាំ២០១៦ ចំណុចភូមិទី១ឃុំត្រែត្រយឹង ស្រុកភ្នំស្រួច ខេត្តកំពង់ស្ពឺ។

ជនរងគ្រោះមិនមែនជាមនុស្សរស់នៅកន្លែងកើតហេតុឡើយ គឺមនុស្សមកស៊ីឈ្នួលយាមដីឲ្យគេដែលមានឈ្មោះស៊ុន ដាវីត អាយុ១៨ឆ្នាំ រស់នៅភូមិអណ្តូងថ្មី សង្កាត់គោករកា ខណ្ឌព្រែកព្នៅ រាជធានីភ្នំពេញ គិតរហូតមកដល់បច្ចុប្បន្ននេះ ឃាតករកមុខមិនទាន់ឃើញនៅឡើយ។

យោងតាមរបាយការណ៍របស់គណៈកម្មការអន្តរក្រសួង ដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ច ចុះថ្ងៃទី១៩ ខែសីហា ឆ្នាំ២០១៥ ទាក់ទងនឹងការវាយតម្លៃក្រុមហ៊ុនសម្បទានសេដ្ឋកិច្ចចំនួន១៥ក្រុមហ៊ុន ស្ថិតក្នុងខេត្តរតនគិរី ខេត្តឧត្តរមានជ័យ ខេត្តព្រះវិហារ ខេត្តក្រចេះ និងខេត្តកំពង់ស្ពឺ។

ក្នុងនោះក្រុមហ៊ុនអភិវឌ្ឍន៍ដំណាំឧស្សាហកម្មអ៊ុកឃុន រាជរដ្ឋាភិបាលកម្ពុជាបានសម្រេចដូចតទៅ ៖១-ប្រគល់ដីដែលមានប័ណ្ណកម្មសិទ្ធិចំនួន១៩៥៤ហិកតា ជូនក្រសួងរៀបចំដែនដីនគរូបនីយកម្ម និងសំណង់ និងអាជ្ញាធរខេត្តកំពង់ស្ពឺ ពិនិត្យដោះស្រាយ។ ដោយឡែកចំពោះដីវត្តដីសាលារៀន និងដីដែលប្រជាពលរដ្ឋរស់នៅកាន់កាប់ជាក់ស្តែង ត្រូវពិនិត្យដោះស្រាយតាមបទបញ្ចាលេខ០០១បប ចុះថ្ងៃទី០១ ខែឧសភា ឆ្នាំ២០១២ របស់រាជរដ្ឋាភិបាល។ ២-ប្រគល់ដីរបស់ក្រុមហ៊ុនដែលរាជរដ្ឋាភិបាលសម្រេចរួចហើយតាមរយៈលិខិតលេខ៥៧៤ស.ជ.ណ ចុះថ្ងៃទី០៤ ខែមិថុនា ឆ្នាំ២០១២ គឺបែងចែកដីដំណាំស្វាយចន្ទីទំហំ៥០ហិកតា ប្រគល់ឲ្យទៅលោកទាវ ឃិនសេង ជនជាតិសិង្ហបុរី ហើយប្រគល់ដីដំណាំស្វាយចន្ទី ទំហំ៥២ហិកតា ឲ្យទៅភាគីលោកស្រី សុខ សុភាព នាយិកាក្រុមហ៊ុនដំណាំឧស្សាហកម្មអ៊ុកឃុន សម្រាប់ដីសម្បទានសេដ្ឋកិច្ច។ ៣-ដីដែលបានកាន់កាប់ដោយក្រុមហ៊ុនឯកជន និងបុគ្គលមួយចំនួននៅលើដីសម្បទានរបស់ក្រុមហ៊ុនដំណាំឧស្សាហកម្មអ៊ុកឃុន ដែលមានទំហំធំ ត្រូវផ្ទេរមកជាដីសម្បទានសេដ្ឋកិច្ច ដោយធ្វើការចុះកិច្ចសន្យាឡើងវិញ ជាមួយក្រសួងកសិកម្មរុក្ខាប្រមាញ់ និងនេសាទ។

នៅរសៀលថ្ងៃទី០៦ ខែឧសភា ឆ្នាំ២០១៩នេះ អ្នកយកព័ត៌មានបានព្យាយាមទំនាក់ទំនងទៅ លោកឈៀង តុលា ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ស្ពឺ សុំការបកស្រាយពាក់ព័ន្ធនឹងលោកធ្វើលិខិតប្តឹងទាស់នឹងការសម្រេចរបស់រដ្ឋបាលខេត្តកំពង់ស្ពឺនេះ ប៉ុន្តែទូរស័ព្ទមិនមានអ្នកទទួល៕