អ្នកប្រដាល់ជើងខ្លាំងកម្ពុជា២រូប គឺមាជ សុខរ៉ា អ្នកប្រដាល់ក្លិបថ្មគោលពោធិសែនជ័យ និងខាំ ផានី អ្នកប្រដាល់ក្លិបដីឡូតិ៍មានរិទ្ធខេត្តបន្ទាយមានជ័យ ដែលជួបប្រកួតជាមួយអ្នកប្រដាល់ថៃនៅលើសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យទី០៥ ខែឧសភា ឆ្នាំ២០១៩នោះ បានវាយចាញ់ថៃក្នុងទឹកទី៣ដូចគ្នា។
មាជ សុខរ៉ា គេប្រកួតចាញ់អ្នកប្រដាល់ថៃឈ្មោះគ្រៀង ក្រៃ(Kreangkrai Tor.Silachai) ហើយ ខាំ ផានី ចាញ់ ផេត ឆ័ត្រឆ័យ សរ.ប៊ុនយៀម (Phet chchharchai Sor.Bunyeam) ក្នុងការប្រកួតទម្ងន់៦៧គីឡូក្រាមដូចគ្នានោះ។
គ្រៀង ក្រៃ និង មាជ សុខរ៉ា ប្រកួតគ្នាក្នុងលក្ខណះវាយប្តូរកែង និង កណ្ដាប់ដៃគ្នាយ៉ាងខ្លាំងក្លាបំផុត ដែលក្នុងនោះបានធ្វើឲ្យគ្រៀង ក្រៃ បែកឈាមក្បាលផងដែរ។ ទោះជាយ៉ាងណា មកដល់ទឹកទី៣ គ្រៀង ក្រៃ បានវាយចំធុងទឹក(ពោះ)របស់ មាជ សុខរ៉ា ធ្វើឲ្យ សុខរ៉ា ដួលសន្លប់តែម្តង។
អ្នកប្រដាល់ថៃរូបនេះ មិនធម្មតាទេ ដោយគេមានកាយសម្បទារឹងមាំ ស្នៀតប្រដាល់ល្អ វាយចេញចូលរហ័ស កម្លាំងស៊ុហ្វខ្លាំង មិនងាយស្រួលនឹងបង្ក្រាបនោះឡើយ។
ចំពោះការប្រកួតរបស់ខាំ ផានី អ្នកប្រដាល់ក្លិបដីឡូត៍មានរិទ្ធខេត្តបន្ទាយមានជ័យវិញ គេត្រូវ អ្នកប្រដាល់ថៃផេត ឆ័ត្រឆ័យ សរ.ប៊ុនយៀម ទាត់ឲ្យខូចជើងខាងស្តាំនៅក្នុងទឹកទី៣ ដែលធ្វើឲ្យផានី មិនអាចបន្តការប្រកួតតទៅទៀតបាន និងត្រូវអាជ្ញាកណ្ដាលបញ្ឈប់លែឲ្យប្រកួត។
នេះជាលើកទី៧ ដែលខាំ ផានី ជួបប្រកួតជាមួយអ្នកប្រដាល់បរទេស ដែលការជួប៧លើកនេះ គេវាយឈ្នះអ្នកប្រដាល់អាល្លឺម៉ង់Ali ទឹកទី៣ បន្ទាប់មកចាញ់Erhan Gungor(អាល្លឺម៉ង់)ទឹកទី៣វិញ វាយចាញ់ថៃKong Thailen ក្នុងទឹកទី៣ វាយឈ្នះផេត ស្រ៊ីគាវ ក្នុងទឹកទី៣ និងចាញ់កេង កាត់ វ៉.ស៊ូងនឹនដោយពិន្ទុ ចាញ់គ្រៀង ក្រៃ ក្នុងទឹកទី២ ហើយចុងក្រោយនេះ ចាញ់ផេត ឆ័ត្រឆ័យ សរ.ប៊ុនយៀម នេះឯង។
ចំពោះការប្រកួតរវាងអ្នកប្រដាល់រួមជាតិវិញ យ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធ ប្រកួតចាញ់ សុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ដោយពិន្ទុ ក្រោយពីវាយគ្នាប្រាំទឹកពេញនោះ។ ពួកគេទាំងពីរ ធ្លាប់ជួបគ្នាកន្លងមក តែយ៉ុន ដារ័ត្ន មិនដែលឈ្នះសុខ សុវណ្ណ នោះទេ។
ដោយឡែក នៅក្នុងការប្រកួតលើសង្វៀនបាយ័នស្ទឹងមានជ័យកាលពីថ្ងៃទី០៤ ខែឧសភា ឆ្នាំ២០១៩
ជ័យ ស៊ីនេត អ្នកប្រដាល់ជើងចាស់ក្លិបឃ្លាំងមឿងកីឡា បានផ្ដួលជើងថ្មីមាឃ វណ្ណារ៉ា អ្នកប្រដាល់ក្លិបរាជសីហ៍ខេត្តរតនគិរី មិនដល់មួយទឹកនោះទេ។
មាឃ វណ្ណារ៉ា បានបោះបង់ចោលការប្រកួតក្នុងទឹកទី១ បន្ទាប់ពីត្រូវជ័យ ស៊ីនេត ទាត់ឲ្យខូចជើងខាងស្តាំនោះ។
ឌុម កែវដប អ្នកប្រដាល់ជើងចាស់ បានវាយចាញ់ អេរ៉ាវ៉ាន់ ចាន់រាជ អ្នកប្រដាល់ជើងថ្មីក្លិបកុសលកីឡា ដោយពិន្ទុ។ ចំណែក ជុន សាវុធ អ្នកប្រដាល់ជើងចាស់ក្លិបកងពលតូចដឹកជញ្ជូនលេខ៩០ ក៏ប្រកួតចាញ់ រិន ដេវីត អ្នកប្រដាល់ជើងថ្មី ក្លិបនាគរាជចតុមុខ ដោយពិន្ទុដែរ ក្នុងការជួបប្រកួតគ្នាប្រភេទទម្ងន់៥៤គីឡូក្រាម។
ចំណែក លី តឿន អ្នកប្រដាល់ជើងចាស់ក្លិបមកុដរាជសីហ៍ ក៏ប្រកួតចាញ់ នួន រ៉ាថេន អ្នកប្រដាល់ស្រករក្រោយ នៃក្លិបតាឯកដំបងដែកមានរិទ្ធខេត្តព្រៃវែង ក្នុងទឹកទី១៕
Source: Kampuchea Thmey Daily
0 Comments