កែវ រំចង់ អ្នកប្រដាល់ក្លិបដំបងគ្រញូងមានរិទ្ធខេត្តបាត់ដំបង នឹងបង្ហាញខ្លួននៅលើសង្វៀនបាយ័នស្ទឹងមានជ័យ នាយប់ថ្ងៃសុក្រ ទី១០ ខែឧសភា ឆ្នាំ២០១៩នេះ។ រំចង់ ត្រូវបានគេផ្គូឲ្យជួបប្រកួតជាមួយអ្នកប្រដាល់ថៃ ចែគស្យ៉ាម ចែគស្យ៉ាមជីម (Jacksiam Jacksiam Gym) ដោយជួបគ្នាក្នុងប្រភេទទម្ងន់៧២គីឡូក្រាម។
ចែគស្យ៉ាម ចែគស្យ៉ាមជីមនេះ គេជាម្ចាស់ខ្សែក្រវាត់ពីរស្ថាប័ននៅប្រទេសថៃ។ ចែគស្យ៉ាម គេធ្លាប់មកប្រកួតនៅកម្ពុជាប៉ុន្មានលើកហើយកន្លងមក។ អ្នកប្រដាល់ថៃរូបនេះ ខ្លាំងគួរសមដែរ។ នេះបើតាមអ្នកដឹកនាំកីឡាករថៃមកប្រកួតឲ្យដឹង។
ចែគស្យ៉ាម បើតាមអ្នកផ្គូផ្គងឲ្យដឹងនោះ គេមានកំណត់ត្រាប្រកួត៧៩លើក ឈ្នះ៦៣លើក ចាញ់១៥លើក ស្មើ០១លើក និងធ្លាប់វាយដៃគូឲ្យសន្លប់ជាង២០លើកឯណោះ។
ទោះជាយ៉ាងណា អ្នកប្រដាល់ថៃរូបនេះ មកជួបកែវរំចង់ គឺមិនជាអ្នកខ្សោយនោះឡើយ ទើបអាចផ្គូឲ្យជួបជាមួយកែវ រំចង់ បាន។ ប៉ុន្តែយ៉ាងណា អ្នកប្រដាល់ថៃដែលមកជួបកែវ រំចង់កន្លងមក សុទ្ធតែអះអាងថា ជាជើងខ្លាំងនោះ សុទ្ធតែត្រូវកែវរំចង់ ផ្តួលយកឈ្នះបានដែរ។
កែវ រំចង់ គេមានកំណត់ត្រាប្រកួតចំនួន១៦០លើក ក្នុងនោះ ឈ្នះ១៤៤ លើក ចាញ់១២លើក និងស្មើ៤លើក ហើយរំចង់ ធ្លាប់ផ្ដួលគូប្រកួតឲ្យសន្លប់បានចំនួន១៧លើក។ ការប្រកួតចុងក្រោយនេះ រំចង់បានវាយចាញ់អ្នកប្រដាល់ជើងខ្លាំងថៃដាបម៉ន ភុមផានមួង ក្នុងទឹកទី៤ កាលពីថ្ងៃទី១៤ ខែតុលាឆ្នាំ២០១៨ កន្លងទៅនេះ ដោយសារតែគេបានខកខានឡើងប្រកួតយូរ។
កែវ រំចង់ គេខ្លាំងកណ្តាប់ដៃ និងវាយសម្រុកលឿន រហ័ស ដែលដៃគូពិបាកនឹងទប់ទល់ណាស់។ ដូច្នេះចាំមើល តើនរណាឈ្នះនៅក្នុងការជួបគ្នារវាង កែវ រំចង់ និង ចែគស្យ៉ាម ចែគស្យ៉ាមជីមនេះ?។
ទោះជាយ៉ាងនេះក្តី កែវ រំចង់ មិនអាចមើលងាយ ចែគស្យ៉ាម បានឡើយ ព្រោះអ្នកប្រដាល់ថៃរូបនេះ ធ្លាប់វាយឈ្នះឯម ឡេងលី ក្នុងទឹកទី២ និង ធ្លាប់ឈ្នះវង្ស ណយ ដោយពិន្ទុ ក្នុងការជួបប្រកួតគ្នានៅសង្វៀនបាយ័នស្ទឹងមានជ័យនេះ កាលពីពេលកន្លងមក។
ចំពោះ អ្នកប្រដាល់កម្ពុជា ឡៅ ចិត្រា ក្លិបកងពលតូចទ័ពឆ័ត្រយោង៩១១ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ ផេតរ៉ាវី ផ្លាយង៉ាមរីសត (Petchravi Phlayngarmresort) ក្នុងប្រភេទទម្ងន់៦១គីឡូក្រាម។
ឡៅ ចិត្រា ជាអ្នកប្រដាល់វ័យក្មេង ដែលខ្លាំងជាងគេក្នុងចំណោមអ្នកប្រដាល់កម្ពុជាដែលមានវ័យក្មេង និងទម្ងន់ដូចគ្នានោះ ហើយចិត្រា គេក៏ជាអ្នកប្រដាល់ជើងខ្លាំងម្នាក់ដែរ សម្រាប់ពេលបច្ចុប្បន្ននេះ។ ចិត្រា ធ្លាប់ប្រកួតជាមួយអ្នកប្រដាល់ថៃច្រើននាក់មកហើយនាពេលកន្លងមក ដែលភាគច្រើនឈ្នះសឹងតែទាំងអស់រាល់ពេលជួបជាមួយថៃនោះ។
និយាយជារួម ចិត្រា ទាំងបទពិសោធន៍ ទាំងស្នៀតប្រដាល់ ល្បិចកល និងកាយសម្បទា សុទ្ធតែល្អនិងខ្លាំង ដែលអាចទុកចិត្តបានថា អាចយកឈ្នះលើអ្នកប្រដាល់ថៃ ផេតរ៉ាវី បានមិនខាន។
អ្នកប្រដាល់ថៃ ផេតរ៉ាវី នេះ ជាជើងខ្លាំងម្នាក់នៅស្រុកថៃ ដែលមានស្នៀតប្រដាល់ល្អនិងខ្លាំង ហើយបទពិសោធន៍លើរេញរបស់គេគួរសមដែរ។ អ្នកប្រដាល់ថៃរូបនេះ គេធ្លាប់មកប្រកួតនៅស្រុកខ្មែរប្រមាណ២-៣ដងហើយ ក្នុងនោះគេធ្លាប់ឈ្នះនិងចាញ់អ្នកប្រដាល់ខ្មែរ។
បើតាមពិនិត្យកម្រិតសមត្ថភាពបច្ចេកទេស និងកាយសម្បទារបស់ពួកគេទាំងពីរនេះ គេមិនរំពឹងថា ឡៅចិត្រា ចាញ់ ផេតរ៉ាវី នោះទេ ដោយសារចិត្រា គេមានផ្លែល្អជាង។ យ៉ាងណា ឡៅ ចិត្រា មិនអាចមើលស្រាលផេតរ៉ាវី នោះឡើយ ព្រោះថាអ្នកប្រដាល់ថៃរូបនេះ ក៏ធ្លាប់យកឈ្នះអ្នកប្រដាល់ខ្មែរផងដែរកន្លងមក។ ចាំមើល ឡៅ ចិត្រា គេអាចផ្តួលអ្នកប្រដាល់ថៃ ផេតរ៉ាវី បានឬអត់នោះ?៕
Source: Kampuchea Thmey Daily
0 Comments