បុរសម្នាក់របួសធ្ងន់ ព្រោះតែរថយន្តរ៉ែងរ៉ូវ័របុក និងនារីម្នាក់ទៀតបែកក្បាល ព្រោះតែបើករថយន្តបុកទ្រូងផ្លូវ

ភ្នំពេញ ៖ បុរសម្នាក់រងររបួសធ្ងន់ធ្ងរ ហើយត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត ដោយសារតែត្រូវរថយន្តម៉ាករ៉ែងររ៉ូវ័របុកម៉ូតូកង់បីឥណ្ឌាពេញទំហឹង និងស្ត្រីម្នាក់ទៀតរបួសបែកក្បាល ដោយសារតែគាត់បើករថយន្តម៉ាកព្រូសបុករបាំងពុះចែកទ្រូងផ្លូវ ដោយខ្លួនឯង ដែលហេតុការណ៍គ្រោះថ្នាក់ចរាចរណ៍នោះកើតឡើងក្នុងករណីផ្សេងពីរគ្នា នៅក្នុងមូលដ្ឋានដូនពេញ។

សមត្ថកិច្ចបានឲ្យដឹងថា ហេតុការណ៍គ្រោះថ្នាក់បន្តបន្ទាប់គ្នានោះ ទី១-បានកើតឡើងនៅវេលាម៉ោង២២និង១០នាទី ថ្ងៃទី០៥ ខែឧសភា ឆ្នាំ២០១៩ ចំណុចផ្លូវខាងត្បូងវាំង ផ្លូវ២៤០ ក្នុងសង្កាត់ចតុមុខខណ្ឌដូនពេញ រាជធានីភ្នំពេញ ដែលកើតឡើងរវាងរថយន្តម៉ាករ៉ែងរ៉ូវ័រ ពាក់ស្លាកលេខភ្នំពេញ2AJ.8811 បានបុកម៉ូតូកង់បីឥណ្ឌា ពាក់ស្លាកលេខ ភ្នំពេញ1HB0888 បណ្ដាលឲ្យក្រឡាប់២ ទៅ៣ជុំធ្វើឲ្យអ្នកបើកម៉ូតូ កង់បីឥណ្ឌានោះ របួសធ្ងន់ ហើយបានបញ្ជូនទៅសម្រាកព្យាបាលនៅមន្ទីរពេទ្យកាល់ម៉ែត។

ចំណែកម៉ូតូកង់បី និងរថយន្ត បានវាស់វែង និងប្រគល់ទៅការិយាល័យចរាចរណ៍ផ្លូវគោក ដើម្បីដោះស្រាយតាមផ្លូវច្បាប់។

សមត្ថកិច្ចបានបន្តទៀតថា ចំណែកករណីគ្រោះថ្នាក់លើកទី២ កើតឡើង នៅវេលាម៉ោង០២និង០៥នាទី ថ្ងៃទី០៦ ខែឧសភា ឆ្នាំ២០១៩ នៅចំណុចមុខក្តាន់ពី ផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ បានកើតឡើងដោយរថយន្តព្រូស ពាក់ស្លាកលេខភ្នំពេញ.2AM.6595 បើកបរដោយស្ត្រីម្នាក់ ប្រហែលចេញពីផឹក១យប់ ទល់ភ្លឺហើយ ដោយបើកបោះពួយយ៉ាងលឿន លុះមកដល់កន្លែងកើតហេតុជាកន្លែងផ្លូវរួមតូច ព្រោះមន្ទីរសាធារណៈបានវាទចំណែកផ្លូវម្ខាងឲ្យធំជាងទើបធ្វើឲ្យរថយន្តម៉ាកព្រូសនោះបុកថ្មពុះទ្រូងផ្លូវ បណ្ដាលឲ្យអ្នកបើករូបនោះរបួសបែកក្បាលស្រាល ហើយក៏បានឡើងជិះម៉ូតូឌុបចេញទៅបាត់ ហើយករណីនេះបានប្រគល់ឲ្យចរាចរណ៍ក្រុង វាស់វែងយកទៅរក្សាទុកនៅការិយាល័យចរាចរណ៍ផ្លូវគោក ដើម្បីដោះស្រាយតាមផ្លូវច្បាប់។

គួរបញ្ជាក់ថា របាំងពុះចែកទ្រូងផ្លូវនៅខាងមុខក្តាន់ពីរនោះបានក្លាយជាឧបសគ្គសម្រាប់អ្នកបើកយានយន្ត ជាពិសេសរថយន្តតែម្តង ពេលដែលបើកមកដល់ចំណុចកើតហេតុនោះតែងតែជួបគ្រោះថ្នាក់ញឹកញាប់មកហើយមិនត្រឹមតែខូចខាតយានយន្តនោះទេ គឺមានទាំងគ្រោះថ្នាក់ដល់អាយុជីវិតដល់អ្នកដំណើរទៀតផង ព្រោះតែបុករបាំងពុះចែកទ្រូងផ្លូវកន្លែងនោះតែម្តង៕