ភ្លៀង១មេធំ រលំផ្ទាំងប៉ាណូដ៏ធំរបស់ក្រុមហ៊ុនម្សៅទឹកដោះឌុយម៉ិចឌុយប្រូ កាត់ទទឹងផ្លូវ សង្កត់អ្នកដំណើរ របួសធ្ងន់ម្នាក់

Cambodia News May 07, 2019

ភ្នំពេញ ៖ ភ្លៀងមួយមេធំ បូករួមនឹងខ្យល់កន្ត្រាក់ បានបោកបក់បាក់រលំផ្ទាំងប៉ាណូផ្សាយពាណិជ្ជកម្មរបស់ក្រុមហ៊ុនម្សៅទឹកដោះគោឌុយម៉ិចឌុយប្រូ កាត់ទទឹងផ្លូវ បណ្ដាលឲ្យសង្កត់កិនម៉ូតូអ្នកដំណើរ របួសធ្ងន់ម្នាក់ ត្រូវបានគេបញ្ជូនទៅមន្ទីរពេទ្យកាល់ម៉ែត។

ហេតុការណ៍នេះ បានកើតឡើងកាលពីវេលាម៉ោង៣និង១៥នាទី ថ្ងៃទី៦ ខែឧសភា ឆ្នាំ២០១៩ តាមបណ្ដោយផ្លូវជាតិលេខ ៥ ចំណុចក្រុម៣ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ។

ភ្លាមៗ គេឃើញសមត្ថកិច្ច និង អាជ្ញាធរ បានចុះទៅអន្តរាគមន៍ជួយលើកម៉ូតូម៉ាកមូ ដែលមានស្លាកលេខ ភ្នំពេញ 1FM 8539 ចេញពីកន្លែងកើតហេតុ និង នាំជនរងគ្រោះ ឈ្មោះ ថោង សុខ ភេទប្រុសអាយុ៤៩ឆ្នាំ ស្នាក់នៅសង្កាត់ព្រែកព្នៅ ខណ្ឌព្រែកព្នៅ ទៅមន្ទីរពេទ្យកាល់ម៉ែតផងដែរ។

សមត្ថកិច្ចបានឲ្យដឹងថា ខណៈមានភ្លៀងធ្លាក់មួយមេយ៉ាងធំលាយឡំនឹងមានខ្យល់កន្ត្រាក់ បានបោកបក់រលំផ្ទាំងប៉ាណូមួយផ្ទាំងធំរបស់ក្រុមហ៊ុនម្សៅទឹកដោះគោឌុយ ម៉ិចឌុយប្រូ បណ្ដាលឲ្យសង្កត់ទទឹងផ្លូវច្រងាង និងសង្កត់អ្នកធ្វើដំណើរដោយម៉ូតូម្នាក់ បណ្ដាលឲ្យរបួសធ្ងន់។ ខណៈនោះផ្លូវជាតិលេខ៥ កាត់ផ្ដាច់ចរាចរណ៍មួយរយៈ ដោយសមត្ថកិច្ចបញ្ចៀសផ្លូវផ្សេង។

ជាមួយគ្នានោះ សមត្ថកិច្ច ក៏ដូចជាអាជ្ញាធរសង្កាត់ ខណ្ឌ បានចុះមកជួយអន្តរាគមន៍បញ្ជាចរាចរណ៍កុំឲ្យកកស្ទះ។ ក្រៅពីរលំប៉ាណូដ៏ធំមួយនេះ នៅខណ្ឌឫស្សីកែវ និងខណ្ឌជ្រោយចង្វារ ក៏មានរលំផ្ទាំងប៉ាន់ណូតូចៗជាផ្ទាំងស្លាកសញ្ញាគណបក្សដទៃទៀតជាច្រើន៕