តាកែវ ៖ ការកើតទុក្ខមិនសុខចិត្តមួយ បានកើតឡើងលើគ្រួសារ លោកពូ អូក ញ៉ និង អ្នកមីង ម៉ី ផាន្នី រស់នៅភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ ក្រោយពីអាជ្ញាធរបានសម្រេចបើកផ្លូវឲ្យប្រជាពលរដ្ឋ ធ្វើឲ្យបាត់បង់ដីផ្ទាល់ខ្លួនរបស់គាត់ទាំងដែលមិនមានដំណោះស្រាយណាមួយសមស្របដែលអាចទទួលយកបាន។
គ្រួសាររងគ្រោះដោយការបាត់បង់ដី លោកពូ អូក ញ៉ និង អ្នកមីង ម៉ី ផាន្នី បាននិយាយប្រាប់ក្រុមអ្នកសារព័ត៌មាននាព្រឹកថ្ងៃទី០៦ ខែឧសភា ឆ្នាំ២០១៩នេះថា ដើមឡើយ ការទំនាស់ដីធ្លីចំពោះពលរដ្ឋ និងគ្រួសាររបស់គាត់ គឺមានជាយូរឆ្នាំណាស់មកហើយ លើបញ្ហាសុំបើកផ្លូវលើផ្លូវចាស់ដែលមានស្រាប់ ដែលជាផ្លូវភ្លឺស្រែតែប៉ុណ្ណោះ រហូតកើតក្ដីក្ដាំតវ៉ាគ្នាតាំងពីឆ្នាំ២០០០មកម្ល៉េះ។
លុះមកដល់ពេលបច្ចុប្បន្ន ភាគីទាំងសងខាង នៃផ្លូវបានសម្រេចផ្តល់ដីរបស់ខ្លួន ដើម្បីពង្រីកផ្លូវឲ្យបានទំហំ២.៥ម៉ែត្រ ធំជាងមុនដែលជាផ្លូវភ្លឺស្រែនោះអាចបើកបររថយន្តចេញចូលបានដល់ប្រជាពលរដ្ឋដែលរស់នៅខាងក្រោយ។ ដោយមានមហិច្ឆតាចង់បានពីសំណាក់បងប្អូនប្រជាពលរដ្ឋដែលរស់នៅខាងក្រោយ ក៏កើតមានរឿងសុំបើកផ្លូវសាជាថ្មីម្តងទៀត ដែលក្នុងនោះ ក្រោមការដឹកនាំរបស់អតីតអភិបាលស្រុកត្រាំកក់ លោក តឹក តុងលីម បានធ្វើការបកស្រាយបំភ្លឺលើករណីពង្រីកផ្លូវនេះទៅថ្នាក់ខេត្តយ៉ាងច្បាស់ថា ដើមឡើយផ្លូវនេះ គឺជាផ្លូវភ្លឺស្រែតែប៉ុណ្ណោះ ដោយមានសភាពតូចចង្អៀត ពលរដ្ឋដែលរស់នៅខាងក្រោយបានស្នើសុំឲ្យម្ចាស់ដីដែលនៅខាងមុខ គឺ លោកពូ អូក ញ៉ និងភាគីដីម្ខាងទៀត នៃផ្លូវ មេត្តាជួយបើកផ្លូវឲ្យបានធំជាងនេះ ក្រោយមកភាគីទាំងសងខាងបានសម្រេចបើកផ្លូវតាមសំណូមពរប្រជាពលរដ្ឋឲ្យធំជាងមុន ក្នុងទំហំ២.៥ ម៉ែត្រ។ លុះអភិបាលស្រុកចាស់ត្រូវចូលនិវត្តន៍ប្តូរអភិបាលស្រុកថ្មីដោយ លោក កៅ វគ្គសែល ក៏កើតមានរឿងសុំបើកផ្លូវសាជាថ្មីម្តងទៀត ដែលមានទំហំរហូតដល់៥ម៉ែត្រ ដែលអនុវត្តដីការបស់សាលាដំបូងខេត្តតាកែវ ថ្ងៃទី២៦ ខែធ្នូ ឆ្នាំ២០១៨ ឲ្យវាយកម្ទេចរបងផ្ទះរបស់គាត់ធ្វើឲ្យប៉ះពាល់ដីផ្ទាល់ខ្លួនរបស់ លោកពូ អូក ញ៉ ជាច្រើនម៉ែត្រថែមទៀត។ អ្វីដែលគ្រួសារគាត់នោះមិនសុខចិត្ត ការពង្រីកផ្លូវគឺទាល់តែមានការចូលរួមវិភាគទានគ្នាទាំងម្ចាស់ដីសងខាង នៃផ្លូវ ហេតុអ្វីបានជាពង្រីកផ្លូវយកដីគាត់តែម្ខាង តើនេះជារឿងយុត្តិធម៌ដែរឬទេ? ដោយកើតជាចម្ងល់ លោកពូ អូក ញ៉ និង អ្នកមីង ម៉ី ផាន្នី តែងតែទៅជួបលោក កៅ វគ្គសែល ដែលជាអភិបាលស្រុកត្រាំកក់ ជួយដោះស្រាយដល់ប្រជាពលរដ្ឋ តែត្រូវ លោក កៅ វគ្គសែល ប្រើពាក្យសម្ដីមិនសមគួរ និងស្ដីបន្ទោសគ្រប់ពេលដែលជួប។ ពួកគាត់បានលើកឡើងថា តើមន្ត្រីទាំងនោះ ជាចៅហ្វាយរាស្ត្រ ឬជាអ្នកបម្រើរាស្ត្រ? បើពេលជួបម្តងៗសុំឲ្យធ្វើការដោះស្រាយជូនដូចទៅជួបចៅហ្វាយនាយអញ្ចឹង! ដែលការអនុវត្តរបស់លោកអភិបាលស្រុកត្រាំកក់រូបនេះវាផ្ទុយទៅនឹងប្រសាសន៍របស់ សម្ដេចតេជោ ហ៊ុន សែន ដែល សម្ដេច តែងតែនិយាយថា មន្ត្រីរាជការ គឺជាអ្នកបម្រើរាស្ត្រ មិនមែនជាចៅហ្វាយនាយនោះទេ។
ជុំវិញករណីនេះ លោក កៅ វគ្គសែល អភិបាលស្រុកត្រាំកក់មិនអាសុំការបំភ្លឺបានទេនៅរសៀល ថ្ងៃទី០៦ ខែឧសភា ឆ្នាំ២០១៩ ដោយទូរស័ព្ទរបស់លោកខលចូល តែមិនមានអ្នកទទួល។
ដោយឡែក លោក នួន សុធា ប្រធានមន្ទីរសុរិយោដីខេត្តតាកែវ បានប្រាប់ឲ្យដឹងតាមរយៈទូរស័ព្ទថា រឿងនេះ លោកមិនសូវដឹងច្បាស់នោះទេ ព្រោះភូមិបាលស្រុកត្រាំកក់ជាអ្នកធ្វើ ហើយមន្ទីរគ្រាន់តែមានសិទ្ធគូសផ្គងប្លង់តែប៉ុណ្ណោះ ចំណែករឿងពង្រីកផ្លូវចូលដីភាគីតែម្ខាង គឺលោកមិនបានឆ្លើយតបអ្វីទាំងអស់ ហាក់បីដូចជាមានការឃុបឃិតគ្នាធ្វើបាបម្ចាស់ដីតែម្ខាង គឺ លោកពូ អូក ញ៉ និង អ្នកមីង ម៉ីផាន្នី។
គ្រួសាររងគ្រោះ ដែលមានការគាបសង្កត់ពីអាជ្ញាធរ បានលើកដៃសំពះស្នើសុំឲ្យ សម្ដេចតេជោ ជួយរកយុត្តិធម៌ពួកគាត់ផង៕
Source: Kampuchea Thmey Daily
0 Comments