ការស៊ុតបាល់ប៉េណាល់ទីនៅនាទីទី ៩៨ របស់កីឡាករ Lorenzo Insigne បានជួយឲ្យក្រុម Napoli ស្ថិតនៅលេខរៀងទី ២ ក្នុងក្របខ័ណ្ឌ Serie A ជាមួយនឹងជ័យជម្នះក្នុងផ្ទះ ២-១ លើក្រុម Cagliari កាលពីថ្ងៃអាទិត្យ ។
កីឡាករ Leonardo Pavoletti បានជួយឲ្យក្រុម Cagliari នាំមុខមុននៅក្នុងតង់ទី ២ ប៉ុន្តែខ្សែប្រយុទ្ធ Dries Mertens របស់ក្រុម Napoli បានរកគ្រាប់បាល់តាមស្មើនៅ ៥ នាទីមុនឈានដល់ម៉ោងបន្ថែម ខណៈដែលកីឡាករ Insigne បានជួយឲ្យក្រុមមួយនេះទទួលបានជ័យជម្នះនៅនាទីចុងក្រោយពីការប្រកួតនោះ ។
លទ្ធផលនេះមានន័យថា ក្រុមរបស់លោក Carlo Ancelotti ត្រូវបានធានាថា បានបញ្ចប់ក្នុងចំណាត់ថ្នាក់លេខ ២ ក្នុង ២ រដូវកាលជាប់គ្នា ខណៈដែលពួកគេមាន ៧៣ ពិន្ទុ លើស ១០ ពិន្ទុពីក្រុម Inter Milan ដែលស្ថិតក្នុងចំណាត់ថ្នាក់លេខ ៣ ខណៈដែលការប្រកួតនៅសល់ចំនួនបីលើកទៀត ។
ក្រុម Cagliari ស្ថិតនៅលំដាប់ទី ១២ ដោយមាន ៤០ ពិន្ទុដាច់ ៨ ពិន្ទុពីតំបន់កាត់ចោល និងស្ថិតនៅក្រោយក្រុមចំនួនពីរគឺក្រុម SPAL និង Sassuolo ។
Napoli បានស្ថិតក្នុងទម្រង់លេងត្រដាបត្រដួសក្នុងការប្រកួតនេះដោយឈ្នះមួយប្រកួតប៉ុណ្ណោះក្នុងការប្រកួតលីគចំនួន ៥ លើកចុងក្រោយរបស់ពួកគេ។
ការតស៊ូរបស់ពួកគេហាក់ដូចជាបន្តនៅពេលដែលខ្សែបម្រើ Nicolo Barella បានបញ្ជូនបាល់ឲ្យកីឡាករ Pavoletti ស៊ុតបញ្ចូលទីនៅនាទីទី ៦៣។
ប៉ុន្តែក្រុមម្ចាស់ផ្ទះបានបង្កើនសម្ពាធ ខណៈដែលអ្នកចាំទី Alessio Cragno របស់ក្រុម Cagliari បានជួយសង្គ្រោះបាល់ជាច្រើនគ្រាប់របស់កីឡាករ Mertens ពីការស៊ុតជាច្រើនជើង។
ទោះជាយ៉ាងណាអ្នកចាំទី Cragno មិនអាចជួយសង្គ្រោះបាល់ពីការតែតបញ្ចូលទីតាមស្មើរបស់កីឡាករអន្តរជាតិប៊ែលហ្សិកបាននោះទេនៅនាទីទី ៨៥។
បន្ទាប់មកក្រុម Napoli ទទួលបានការពិន័យដោយបាល់ប៉េណាល់ទីបន្ទាប់ពីការពិនិត្យមើលវីដេអូជំនួយអាជ្ញាកណ្ដាល (VAR) ដោយម៉ោងបន្ថែម ហើយជាលទ្ធផលក៏មានការផ្ដល់កាតក្រហមសម្រាប់ខ្សែបម្រើ Artur Ionita របស់ក្រុម Cagliari សម្រាប់ការជំទាស់។
លើសពីនេះកីឡាករ Insigne ក៏បានបង្ហាញពីភាពស្ងប់ស្ងាត់ក្នុងការស៊ុតបាល់បញ្ចូលទីដ៏អស្ចារ្យ ហើយក៏ជួយឲ្យក្រុមរបស់ខ្លួនទទួលបានបីពិន្ទុបន្ថែមទៀតផងដែរ៕
REUTERS
Source: Kampuchea Thmey Daily
0 Comments