ពានរង្វាន់លីគកំពូលកម្ពុជា (Metfone Cambodian League) ឆ្នាំ២០១៩ ដែលរៀបចំឡើងដោយគណៈកម្មការប្រកួតបាល់ទាត់ជាតិកម្ពុជា(CNCC) សេនាធិការរបស់សហព័ន្ធកីឡាបាល់ទាត់កម្ពុជា ខណៈឆ្លងកាត់ប្រកួតសប្ដាហ៍ទី៦ មកនេះក្រុមបាល់ទាត់ព្រះខ័នរាជស្វាយរៀង បន្តឈរកំពូលតារាងបណ្តោះអាសន្នក្រោយប្រកួតឈ្នះ៥លើក និងស្មើ១លើក មានពិន្ទុក្នុងដៃច្រើនជាងគេ ស្របពេលក្រុមខេត្តកំពង់ចាម ស្ថិតនៅបាតតារាង។
ជាលទ្ធផលប្រកួតប្រចាំសប្ដាហ៍ទី៦ ក្នុងចំណោមសប្ដាហ៍សរុប២៦សប្ដាហ៍នៃលីគកំពូលកម្ពុជា ឃើញថា នៅថ្ងៃសៅរ៍ ទី៤ ខែឧសភា ឆ្នាំ២០១៩ ដោយក្រុមវិសាខា យកឈ្នះក្រុមខេត្តកំពង់ចាម ១៤ទល់០ លើទីលានកីឡដ្ឋានវិសាខា ហើយក្រុមសូលទីឡូអង្គរ ស្មើគ្នាជាមួយក្រុមក្រសួងការពារជាតិ លើទីលានកីឡដ្ឋានខេត្តសៀមរាប និងក្រុមអគ្គស្នងការដ្ឋាននគរបាលជាតិ ចាញ់ក្រុមគីរីវង់សុខសែនជ័យ ៣ទល់២លើទីលានកីឡដ្ឋានអគ្គីសនីកម្ពុជា។
ចំណែក៤គូផ្សេងទៀតនៅថ្ងៃអាទិត្យ ទី៥ខែឧសភា ឆ្នាំ២០១៩ ដោយក្រុមអាស៊ីអឺរ៉ុប ស្មើគ្នាជាមួយក្រុមអគ្គីសនីកម្ពុជា ២ទល់២ លើទីលាន AEU Sport Park ហើយក្រុមណាហ្គាវើល ឈ្នះក្រុមភ្នំពេញក្រោន ៣ទល់០លើទីលានស្តាតចាស់ ខណៈក្រុមយុវជនសាលាបាល់ទាត់ជាតិបាទី ចាញ់ក្រុមបឹងកេត ៣ទល់១ លើទីលានសាលាបាល់ទាត់ជាតិ ក្នុងស្រុកបាទីខេត្តតាកែវ និងចុងក្រោយក្រុមព្រះខ័នរាជស្វាយរៀង ស្មើគ្នាជាមួយក្រុមអង្គរថាយហ្គឺរ ១ទល់១ លើទីលានកីឡដ្ឋានខេត្តស្វាយរៀង។
ងាកមកមើលចំណាត់ថ្នាក់បណ្តោះអាសន្នក្រោយប្រកួតបាន៦លើកនេះមកឃើញថាក្រុមព្រះខ័នរាជស្វាយរៀង ឈរលេខ១ មាន១៦ពិន្ទុហើយក្រុមណាហ្គាវើល ឈរលេខ២ មាន១៥ពិន្ទុ ក្រុមវិសាខា ឈរលេខ៣ មាន១៣ពិន្ទុ ហើយក្រុមបឹងកេត ឈរលេខ៤ មាន១៣ពិន្ទុ ក្រុម អង្គរថាយហ្គឺរ ឈរលេខ៥ មាន១២ពិន្ទុ ចំណែកក្រុមក្រសួងការពារជាតិ ឈរលេខ៦មានមាន១១ពិន្ទុ។ ក្រុមអាស៊ីអឺរ៉ុប ឈរលេខ៧ មាន៧ពិន្ទុ ហើយក្រុមអគ្គីសនីកម្ពុជា ឈរលេខ៨ មាន៧ពិន្ទុដូចគ្នា ក្រុមគីរីវង់សុខសែនជ័យ ឈរលេខ៩ ស្មើគ្នាជាមួយក្រុមភ្នំពេញក្រោន ឈរលេខ១០។ ក្រុមអគ្គស្នងការដ្ឋាននគរបាលជាតិ ឈរលេខ១១ មាន៤ពិន្ទុ ស្របពេលក្រុមសូលទីឡូអង្គរ ឈរលេខ១២ ក្រុមយុវជនសាលាបាល់ទាត់ជាតិឈរលេខ១៣ ក្រុមខេត្តកំពង់ចាម លេខ១៤មាន៣ពិន្ទុស្មើគ្នា។
សម្រាប់គម្រោងប្រកួតសប្ដាហ៍ទី៧វិញនៅថ្ងៃសៅរ៍ ទី១១ ខែឧសភា ឆ្នាំ២០១៩ ក្រុមក្រសួងការពារជាតិ ត្រូវទទួលក្រុមយុវជនសាលាបាល់ទាត់ជាតិ នៅវេលាម៉ោង៦ល្ងាចលើទីលានស្តាតចាស់ ហើយក្រុមអគ្គីសនីកម្ពុជា ប៉ះណាហ្គាវើល នៅម៉ោង៣និង៣០នាទីរសៀលលើទីលានអគ្គីសនីកម្ពុជា និងក្រុមវិសាខា ទទួលបឹងកេតអែហ្វស៊ី នៅវេលាម៉ោង៦ល្ងាចលើទីលានកីឡដ្ឋានវិសាខា។ ៤គូផ្សេងទៀតត្រូវប្រកួតនៅថ្ងៃអាទិត្យទី១២ ខែឧសភា ឆ្នាំ២០១៩ ក្រុមភ្នំពេញក្រោន ទទួលក្រុមអគ្គស្នងការដ្ឋាននគរបាលជាតិ វេលាម៉ោង៦ល្ងាចលើទីលានកីឡដ្ឋាន RSN Stadium ហើយក្រុមខេត្តកំពង់ចាម ជួបក្រុមព្រះខ័នរាជស្វាយរៀង នៅម៉ោង៣និង៣០នាទីរសៀលលើទីលានវិទ្យាល័យប៊ុនរ៉ានីហ៊ុនសែនមេមត់ ក្រុមអង្គរថាយហ្គឺរ ប៉ះអាស៊ីអឺរ៉ុប នៅម៉ោងដំណាលគ្នាលើទីលានខេត្តសៀមរាប និងក្រុមគីរីវង់សុខសែនជ័យ ជួបក្រុមសូលទីឡូអង្គរ នៅម៉ោង៣និង៣០រសៀលលើទីលានកីឡដ្ឋានគីរីវង់សុខសែនជ័យ។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments