ភ្នំពេញ ៖ នេះជាលើកទី២ហើយដែលក្រុមតន្ត្រី«ប្រហុក»ប្រចាំនៅប្រទេសណ័រវេសក្រោមការបង្កើតឡើងដោយកូន កូនប្រសានិងចៅរបស់កវីម្ចាស់ស្ទឹងសង្កែគង្គ ប៊ុនឈឿនបាននាំយកអំណោយគ្រឿងមានឧបភោគ បរិភោគនិងសម្ភារៈសិក្សាយកទៅចែកជូនសិស្សានុសិស្សនិងប្រជាជនទីទ័លក្រដែលរស់នៅភូមិអូ ឃុំព្នាយ ស្រុកសំរោងទង ខេត្តកំពង់ស្ពឺ ដោយប្រជាជនជួបការលំបាក១០គ្រួសារក្នុងមួយគ្រួសារៗទទួលបានអង្ករមួយ បេ ទឹកត្រី ទឹកស៊ីអ៊ីវ ត្រីខ ស្ករសនិងថវិកា២ម៉ឺនរៀល ព្រមទាំងសិស្សានុសិស្សក្រីក្រចំនួន៧១នាក់ម្នាក់ៗទទួលបានសៀវភៅសរសេរ ប៊ិច ខ្មៅដៃនិងថវិកា៥០០០រៀល ជូនក្រុមភ្លេងពិណពាទ្យ៧នាក់និងគណៈកម្មការវត្តត្រពាំងគឹន៤នាក់ម្នាក់ៗ២ម៉ឺនរៀល និងប្រគេទទេយ្យទានមានអង្ករ៥០គីឡូក្រាមនិងបច្ច័យ១២ម៉ឺនរៀលដល់ព្រះចៅអធិការវត្តត្រពាំងគឹនផងដែរ។
លោកមុត ដារីរិទ្ធីយ៉ាដែលជាអ្នកចម្រៀងនៅក្នុងក្រុមតន្ត្រី«ប្រហុក»ប្រចាំនៅណ័រវេសបាននិយាយថា ក្រុមតន្ត្រី«ប្រហុក»របស់លោកនឹងខំប្រឹងប្រែងស្វះស្វែងរកថវិកាពីសម្បុរសជននៅប្រទេសណ័រវេសជាបន្តទៀតដើម្បីយកមកជួយកុមារក្រីក្រនិងប្រជាជនជួយការខ្វះខាតនៅប្រទេសកម្ពុជាឲ្យបានយ៉ាងហោចណាស់មួយឆ្នាំ២ដងដែលនេះគឺជាការចូលរួមសកម្មភាពមនុស្សធម៌ក៏ដូចជាជួយដល់សង្គមជាតិរបស់យើង។ លោកមុត ដារី រិទ្ធីយ៉ាដែលគេស្គាល់ថាជាកូនប្រុសបង្កើតរបស់លោកមុត ថារីអ្នកនិពន្ធនិងដឹកនាំខ្សែភាពយន្តខ្មែរដ៏ល្បីនោះបាននិយាយបញ្ជាក់ថា បើទោះបីជាអំណោយដែលបានយកមកចែកជូនប្អូនៗសិស្សានុសិស្សក្រីក្រទាំង៧១នាក់និងពុកម៉ែបងប្អូនដែលជួបការខ្វះខាតក្នុងក្រុមគ្រួសារទាំង១០គ្រួសារនៅពេលនេះមានចំនួនតិចតួចក្តីក៏ប៉ុន្តែអាចជួយសម្រាលបាននៅការលំបាករបស់ពុកម៉ែបានមួយគ្រាដែរ។
អ្នកស្រីប៊ុនឈឿន សូរីវិល័យ និងអ្នកស្រីប៊ុនឈឿន សូមីរ៉ែនដែលជាសមាជិកក្នុងក្រុមតន្ត្រី«ប្រហុក»បាននិយាយស្រដៀងគ្នាដែរថា ពួកគាត់មានភាពសប្បាយរីករាយណាស់នៅពេលបានមកជួបផ្ទាល់ជាមួយពូ មីង ពុកម៉ែ និងប្អូនៗដោយបាននាំយកអំណោយបន្តិចបន្ទូចមកចែកជូនផងដែរ។
ពួកគាត់នឹងខំប្រឹងកៀរគររកជំនួយពីសប្បុរសជននៅប្រទេសណ័រវេសតាមរយៈការចេញច្រៀងប្រគំតន្ត្រីក្រុម«ប្រហុក»នៅតាមបណ្តារដ្ឋនានាដើម្បីយកមកជួយកុមារនិងប្រជាជនទីទាល់ក្រកម្ពុជាជាបន្តទៀត ហើយបើទោះបីជានៅឆ្នាំក្រោយៗពួកគាត់ដែលជាសមាជិកក្រុមតន្ត្រី«ប្រហុក»មិនមកកម្ពុជាដោយផ្ទាល់ក៏ដោយក៏គាត់នឹងផ្ញើថវិកាមនុស្សធម៌ដែលរៃអង្គាសបាននេះតាមរយៈលោកមុត ថារីយកមកជួយបងប្អូនទីទ័លក្រកម្ពុជាដោយមិនគិតថា នៅតំបន់នេះឬតំបន់ណានោះទេ។
នាឱកាសប្រកបដោយភាពស្និទ្ធស្នាលនោះដែរព្រះចៅអធិការវត្តត្រពាំងគឹន ប្រជាពលរដ្ឋ និងសិស្សានុសិស្សក៏បានថ្លែងអំណរគុណដល់ក្រុមតន្ត្រី«ប្រហុក»ដែលជាសាច់សាលោហិតរបស់កវីម្ចាស់ស្ទឹងសង្កែលោកគង្គ ប៊ុនឈឿនប្រចាំប្រទេសណ័រវេសផងដែរដែលបាននាំយកអំណោយមកចែកជូនដល់បងប្អូនយើងដើម្បីជាការចូលរួមចំណែកក្នុងអំពើមនុស្សធម៌ដ៏ថ្លៃថ្លា៕
ក្រុមតន្ត្រី "ប្រហុក" នាំយកអំណោយនិងសម្ភារៈសិក្សាចែកជូនដល់សិស្សានុសិស្សនិងប្រជាជនក្រីក្រនៅភូមិអូ
0 Comments