Sunday, May 26, 2019

​ក្រុមហ៊ុន​British Airways​នឹង​បន្ត​ជើងហោះហើរ​ទៅកាន់​ប៉ា​គី​ស្ថាន​នៅ​សប្ដាហ៍​ក្រោយ បន្ទាប់ពី​ផ្អាក​អស់​ជាង​១​ទសវត្សរ៍



​ក្រុមហ៊ុន​អាកាសចរណ៍​British Airways​នឹង​បន្ត​ជើងហោះហើរ​ទៅកាន់​ប្រទេស​ប៉ា​គី​ស្ថាន​នៅ​សប្ដាហ៍​ក្រោយនេះ បន្ទាប់ពី​បាន​ផ្អាក​ដំណើរការ​អស់​១​ទសវត្សរ៍ ដោយសារ​មាន​ករណី​បំផ្ទុះ​គ្រាប់បែក​ក្នុង​សណ្ឋាគារ​ធំ​មួយ ហើយ​នេះ​ជា​ក្រុមហ៊ុន​អាកាសចរណ៍​លោកខាងលិច​ដំបូង​គេ​ហើយ​ដែល​បើក​ឱ្យមាន​ការហោះហើរ​ឡើងវិញ​ទៅកាន់​ប្រទេស​អាស៊ី​ភាគខាងត្បូង​មួយ​នេះ​។​

តាម​ការ​ឱ្យដឹង ក្រុមហ៊ុន​អាកាសចរណ៍​ខាងលើ​បាន​ផ្អាក​ការហោះហើរ​ទៅកាន់​ប្រទេស​ប៉ា​គី​ស្ថាន បន្ទាប់ពី​មាន​ករណី​បំផ្ទុះ​គ្រាប់បែក​ក្នុង​សណ្ឋាគារ Marriott កាលពី​ឆ្នាំ​២០០៨ ក្នុង​រដ្ឋធានី​អ៊ី​ស្លា​ម៉ា​បាត ដែល​បាន​កើតឡើង​ក្នុងពេល​មាន​ហិង្សា​យោធា​ពួក​ឥស្លាម​និយម​ដ៏​សាហាវ​ក្នុងប្រទេស​ប៉ា​គី​ស្ថាន​។​

ក្រោយមក ស្ថានភាព​សន្តិសុខ​ក៏បាន​ល្អប្រសើរ​ឡើងវិញ ដោយ​ការវាយប្រហារ​យោធា​បាន​ថមថយ​ក្នុងប្រទេស​មូស្លីម​ដែលមាន​ប្រជាជន​ប្រមាណ​២០៨​លាន​នាក់​មួយ​នេះ និង​បាន​ស្រោចស្រង់​ប្រទេស​ប៉ា​គី​ស្ថាន​ឱ្យ​ក្លាយជា​គោលដៅ​សម្រាប់​ទេសចរ​និង​អ្នកវិនិយោគ​ឡើងវិញ​។​
British Airways ដែល​កាន់កាប់​ដោយ​ក្រុមហ៊ុន IAG របស់​អេ​ស្ប៉ា​ញ​បានឱ្យដឹង​ក្នុង​
សេចក្ដីថ្លែងការណ៍​មួយ​ថា ខ្លួន​នឹង​បើក​ឱ្យមាន​ជើងហោះហើរ​ពី​ព្រលានយន្តហោះ Heathrow ទីក្រុង​ឡុង​ដ៍​ទៅកាន់​ក្រុង​អ៊ី​ស្លា​ម៉ា​បាត ដោយ​ប្រើ​យន្តហោះ​ខ្នាត​វែង​ដ៏​ថ្មី​សន្លាង​របស់ខ្លួន​គឺ ម៉ូ​ដែល Boeing 787 Dreamliner​។​

បច្ចុប្បន្ននេះ ក្រុមហ៊ុន​អាកាសចរណ៍​អន្តរជាតិ​ប៉ា​គី​ស្ថាន (PIA) ដែលជា​ក្រុមហ៊ុន​របស់​រដ្ឋ​និង​បាន​ខាតបង់​ប្រាក់ចំណេញ​ផង​នោះ មាន​ជើងហោះហើរ​ផ្ទាល់​ពី​ប៉ា​គី​ស្ថាន​ទៅ​ចក្រភព​អង់គ្លេស​ដែរ ប៉ុន្តែ​យន្តហោះ​ដែលមាន​សភាព​ចាស់​ទ្រុឌទ្រោម​របស់ខ្លួន​តែងតែ​ត្រូវ​អ្នក​ដឹកជញ្ជូន​ត្អូញត្អែរ​ជា​ញឹកញាប់។

ក្រុមហ៊ុន​អាកាសចរណ៍​នៅ​មជ្ឈិមបូព៌ា​ដូចជា Qatar Airways, Etihad Airways និង Emirates បាន​មាន​វត្តមាន​យ៉ាងរឹងមាំ​ក្នុងប្រទេស​ប៉ា​គី​ស្ថាន និង​បាន​នាំឱ្យ​ទីផ្សារ​ភាគហ៊ុន​របស់​ក្រុមហ៊ុន PIA មានការ​ធ្លាក់ចុះ​៕ REUTERS


Source: Kampuchea Thmey Daily

ចិន​ថ្កោលទោស​ពាក្យ​ចចាមអារ៉ាម​របស់​អាមេរិក​ដែលថា Huawei មាន​ទំនាក់ទំនង​ជាមួយ​រដ្ឋាភិបាល​ក្រុង​ប៉េកាំង​




កាលពី​ថ្ងៃ​សុក្រ​នេះ
ប្រទេស​ចិន​បានចេញ​មុខ​ថ្កោលទោស​រដ្ឋលេខាធិការ​ស​ហ​រដ្ឋ​អាមេរិក​លោក
Mike Pompeo
ដែល​បាន​ប្រឌិត​ពាក្យ​ចចាមអារ៉ាម​ថា​នាយក​ប្រតិបត្តិ​ក្រុមហ៊ុន
Huawei Technologies Co Ltd
របស់​ចិន​បាន​និយាយ​កុហក​អំពី​ទំនាក់ទំនង​ក្រុមហ៊ុន​របស់ខ្លួន​ជាមួយ​រដ្ឋាភិបាល​ក្រុង​ប៉េកាំង។





សហរដ្ឋអាមេរិក​បាន​ដាក់​ក្រុមហ៊ុន
Huawei
ទៅក្នុង​បញ្ជីខ្មៅ​សម្រាប់​ការធ្វើ​ពាណិជ្ជកម្ម​កាលពី​សប្ដាហ៍​មុន
ដោយបាន​ហាមឃាត់​ក្រុមហ៊ុន​អាមេរិក​ទាំងអស់​ឈប់​ឱ្យ​រកស៊ី​ជាមួយ​ក្រុមហ៊ុន​ផលិត​ឧបករណ៍​ទូរគមនាគមន៍​ធំជាងគេ​ក្នុង​ពិភពលោក​មួយ​នេះ
និង​បង្កើន​កម្ដៅ​សង្គ្រាម​ពាណិជ្ជកម្ម​ឱ្យ​កាន់តែ​ឆេះឆួល​ឡើង​រវាង​ប្រទេស​មហាអំណាច​សេដ្ឋកិច្ច​ទាំងពីរ​។​





ក្រុមហ៊ុន
Huawei បាន​បដិសេធ​ម្ដង​ហើយ​ម្ដង​ទៀតថា
ក្រុមហ៊ុន​របស់ខ្លួន​មិនត្រូវ​បាន​គ្រប់គ្រង​ដោយ​រដ្ឋាភិបាល​ចិន
យោធា ឬ​សេវា​ស៊ើបការណ៍​សម្ងាត់​ណាមួយ​ឡើយ​។​





លោក​រដ្ឋលេខាធិការ​អា​មេ​រិ​ក
Pompeo បាន​និយាយ​កាលពី​ថ្ងៃ​ព្រហស្បតិ៍
និង​បាន​ច្រានចោល​ការអះអាង​របស់​នាយក​ប្រតិបត្តិ​ក្រុមហ៊ុន
Huawei លោក Ren Zhengfei
ថា​ក្រុមហ៊ុន​របស់លោក​នឹងមិន​ចែករំលែក​ការសម្ងាត់​របស់​អ្នកប្រើប្រាស់​ឡើយ​។
លោក Pompeo
ជឿថា​នឹងមាន​ក្រុមហ៊ុន​អាមេរិក​ជាច្រើន​ទៀត​កាត់ផ្ដាច់​ទំនាក់​ទំនងជា​មួយ​ក្រុមហ៊ុន​បច្ចេកវិទ្យា​យក្ស​មួយ​នេះ​។​





អ្នកនាំពាក្យ​ក្រសួងការបរទេស​ចិន
លោក Lu Kang បាន​ថ្លែងថា
"​ថ្មីៗ​នេះ
អ្នកនយោបាយ​អាមេរិក​មួយចំនួន​បាន​បន្ត​បង្កើត​ពាក្យ​ចចាមអារ៉ាម​ទាក់ទង​នឹង​ក្រុមហ៊ុន
Huawei
តែ​មិនដែល​បា​នរក​ភស្តុតាង​ច្បាស់លាស់​មក​បង្ហាញ​តាម​ការស្នើសុំ​របស់​បណ្ដា​ប្រទេស​នានា​ឡើយ​។​"





លោក Lu
បានបញ្ជាក់​ជាថ្មី​ថា
សហរដ្ឋអាមេរិក​គួរតែបញ្ឈប់​ការប្រើ​អំណាច​ជាតិ​របស់ខ្លួន​ដើម្បី​គាបសង្កត់
និង​បង្ខូចឈ្មោះ​ក្រុមហ៊ុន​របស់​ប្រទេស​ដទៃ
និង​បាន​បន្ថែមថា
ចិន​ចង់​ដោះស្រាយ​ជម្លោះ​រវាង​ប្រទេស​ទាំងពីរ​ដោយ​ប្រើ​វិធី​ផ្សេង
តាមរយៈ​កិច្ចចរចា​មិត្តភាព
និង​ការពិគ្រោះ​យោបល់​ទៅវិញទៅមក​៕
REUTERS





​ តរុណី








Source: Kampuchea Thmey Daily

Saturday, May 25, 2019

ទឹកប្រាក់​ជិត​៧​លាន​ដុល្លារ​ សម្រាប់​ជួយ​ដល់​កុមារកំព្រា​ និង​ជន​ងាយ​រងគ្រោះ​នៅ​កម្ពុជា​ក្រោយ​ចុះ​កិច្ចព្រមព្រៀង



ភ្នំពេញ ៖ ទឹកប្រាក់​ចំនួន​ជាង​៦, ៧២៩, ៩៨៨ ដុល្លារ​សហរដ្ឋអាមេរិក ត្រូវ​បាន​យក​មក​ប្រើ​ប្រាស់​ក្នុង​រយៈពេល​៣​ឆ្នាំ ដើម្បី​ជួយ​ក្នុង​វិស័យ​សង្គមកិច្ច ជាពិសេស​ផ្តោត​សំខាន់​លើ​ការ​ជួយ​ទៅដល់​កុមារ​កំព្រា រងគ្រោះ និង​ងាយ​រង​នៅ​ទូទាំងប្រទេស​កម្ពុជា​បន្ទា​ប់​ពី​ក្រសួង​សង្គមកិច្ច អតីតយុទ្ធជន និង​យុវ​នីតិសម្បទា បាន​ចុះហត្ថលេខា​លើ​អនុស្សារណៈ​នៃ​កិច្ចព្រមព្រៀង (MoU) ជាមួយ​អង្គការ​ចំនួន​៨​រួចមក​។



​ពិធី​ចុះហត្ថលេខា​លើ​អនុស្សរណៈ​នៃ​កិច្ចព្រមព្រៀង (MoU)​នា​ពេល​នេះ បានរៀបចំ​ឡើងជា​ផ្លូវការ នា​ថ្ងៃ​ទី​២៤​ខែឧសភា ឆ្នាំ​២០១៩ នា​ទីស្តីការក្រសួង​សង្គមកិច្ច​ហើយ​ការ​ចុះ MoU​នេះ គឺ​ធ្វើ​ឡើង​ក្នុង​គោលបំណង ជួយ​លើកកម្ពស់​លើកកម្ពស់​វិស័យ​សង្គមកិច្ច​នៅ​កម្ពុជា ជាពិសេស​ផ្តោត​សំខាន់​លើ​ការជួយ​ទៅដល់​កុមារ​រងគ្រោះ ងាយ​រងគ្រោះ និង​កុមារ​ខ្វះខាត និង​ក្រីក្រ នៅ​ទូទាំងប្រទេស​កម្ពុជា​តែម្ដង​។

នៅ​ក្នុង​ពិធី​ចុះហត្ថលេខា​លើ អនុស្សរណៈ​នៃ​កិច្ចព្រមព្រៀង​ខាងលើ​ក្រោម​វត្តមាន​លោក​តូច ចាន់នី អគ្គនាយក នៃ​អគ្គនាយកដ្ឋាន​បច្ចេកទេស ក្រសួង​សង្គមកិច្ច អតីត​យុទ្ធជន និង​យុវ​នីតិសម្បទា និង​ថ្នាក់ដឹកនាំ​អង្គការ​ទាំង​៨ រួម​នឹង​មន្ត្រីរាជការ​ពាក់ព័ន្ធ របស់​ក្រសួង​សង្គមកិច្ច​ជា​ច្រើន​រូប​ទៀត​ចូលរួម​ផងដែរ​។

​មន្ត្រី​ក្រសួង​សង្គមកិច្ច​អតីតយុទ្ធជន​និង​យុវនីតិសម្បទា​បាន​បញ្ចា​ក់ថា អង្គការ​ដែល​បាន​ចូលរួម​ក្នុង​កិច្ចការ​មនុស្ស​ធ​ម៏​នេះ​មាន​សរុប​ទាំងអស់​៨​រួមមាន ទី​១. អង្គការ​មូ​និ​ធិ​ហ្សា​នី​ញេ ហូ​លី​បេ​ប៊ី​(​រាជធានី​ភ្នំពេញ និង​ខេត្តកណ្តាល​) ទី​២៖ អង្គការ MRRCY Ministries Foundation ( បន្ទាយមានជ័យ​) ទី​៣៖ អង្គការ​ជំនួយ​ស្ម័គ្រចិត្ត​ដល់​កុមារ​កម្ពុជា (​ខេត្តបាត់ដំបង​) ទី​៤៖ អង្គការ​សាលា​សាធារណៈ និង​សង្គមកិច្ច​អេ​លីហ្សា​ប៊េ​ត​(​ខេត្ត​ព្រះសីហនុ និង​ភ្នំពេញ​) ទី​៥៖ អង្គការ​មូលនិធិ​អូស្ត្រាលី​កម្ពុជា​(​ខេត្តកណ្តាល​) ទី​៦៖ អង្គការ​តានី​- ទស្សនៈវិស័យ​សំរាប់​កុមារ​កម្ពុជា (​ខេត្តកំពត​) ទី​៧៖ អង្គការ​សង្គ្រោះ​ជោគវាសនា​កម្ពុជា (​រាជធានី​ភ្នំពេញ​) ​ទី​៨៖ អង្គការ​សួន​នៃ​ក្តីសង្ឃឹម​នៅ​កម្ពុជា (​រាជធានី​ភ្នំពេញ​) ។



លោក​តូច ចាន់នី អគ្គនាយក នៃ​អគ្គនាយកដ្ឋាន​បច្ចេកទេស តំណាង​លោក វង សូត រដ្ឋមន្ត្រីក្រសួង​សង្គមកិច្ច អតីតយុទ្ធជន និង​យុវនីតិសម្បទា បាន​លើកឡើងថា ការចូល​រួមសហការ​របស់​អង្គការ​ដៃគូ ពិតជា​សំខាន់​ណាស់ ក្នុងការ​លើកកម្ពស់​វិស័យ​សង្គមកិច្ច​នៅ​កម្ពុជា ។

ជាមួយគ្នា​នោះ លោក តូច ចាន់នី បានស្នើ​ឲ្យ​ក្រុមការងារ​ក្រសួង និង​អង្គការ ដែល​សហការ នា​ពេល​នេះ​រួមគ្នា ដើម្បី​ធ្វើ​ការងារ ដោយ​យកចិត្តទុកដាក់​ឲ្យ​ខ្លាំង​បំផុត តាម​ដែល​អាចធ្វើ បាន​។ សម្រាប់​ក្រសួង​សង្គមកិច្ច​វិញ នៅតែ​ស្វាគមន៍​ជានិច្ច​ជាមួយ ដៃគូ​ពាក់ព័ន្ធ និង​អង្គការ​នានា ដើម្បី​ជួយ​ដល់​ជនរងគ្រោះ​នៅ​កម្ពុជា ឲ្យ​មាន​ជីវភាព និង​ជីវិត​រស់នៅ ល្អប្រសើរ​ថែម​មួយកម្រិត​ទៀត​។

សូម​បញ្ជាក់​ថា អង្គការ​ទាំង​៨ ដែល​បាន​ចុះហត្ថលេខា លើ​កិច្ចព្រមព្រៀង ជាមួយ​ក្រសួង​សង្គមកិច្ច សុទ្ធសឹងតែ​ជា​អង្គការ ដែល​បាន​ចូលរួម​ចំណែក និង​ធ្វើ​សកម្មភាព​មនុស្ស​ធម៌​ជួយ​ដល់​កុមារ ជន​ងាយ​រងគ្រោះ​និង​យុវជន​ក្រីក្រ​នៅ​កម្ពុជា​គោលបំណង​សំខាន់​ដើម្បី​លើកកម្ពស់​ការរស់នៅរ​បស់​កុមារ​នៅ​កម្ពុជា​តែម្ដង​ជា​កត្តា​សំខាន់បំផុត​៕



Source: Kampuchea Thmey Daily

សរុប​ព្រឹ​ត្តិ​ការណ៍​ ៖ ដំណើរការ​ឃោសនាបោះឆ្នោត​ជ្រើសរើស​ក្រុមប្រឹក្សា ប្រព្រឹត្ត​ទៅក្នុង​បរិយាកាស​ល្អ គ្មាន​អំពើ​ហិង្សា គ្មាន​ការគំរាមកំហែង មាន​សន្តិសុខ​ល្អ និង​សណ្តាប់ធ្នាប់​ល្អ



​**គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) អំពាវនាវ​ឲ្យ​គ្រប់​ភាគី​ពាក់ព័ន្ធ​ទាំងអស់ ត្រូវគោរព និង​អនុវត្តតាម​ច្បាប់បោះឆ្នោត គោលការណ៍​ណែនាំ របស់ គ​.​ជ​.​ប និង​ក្រមសីលធម៌​នានា​សម្រាប់​ភាគី​ពាក់ព័ន្ធ ដើម្បី​ធានា​ឱ្យ​ដំណើរការ​នៃ​ការបោះឆ្នោត​ជ្រើសរើស ក្រុមប្រឹក្សា អាណត្តិ​ទី​៣ ឆ្នាំ​២០១៩ នេះ ប្រព្រឹត្ត​ទៅដោយ​រលូន មាន​សន្តិសុខ សុវត្ថិភាព គ្មាន​ការគំរាមកំហែង និង​គ្មាន​អំពើហិង្សា !

​ភ្នំពេញ​៖ មន្ត្រីជាន់ខ្ពស់ គ​.​ជ​.​ប បាន​ឲ្យ​ដឹងថា ដំណើរការ​ឃោសនាបោះឆ្នោត​ជ្រើសរើស​ក្រុមប្រឹក្សា អាណត្តិ​ទី​៣ ដែល​បាន​ប្រព្រឹត្តទៅ​រយៈពេល​៨ថ្ងៃ​កន្លង​មក​នេះ គ្រប់​សកម្មភាព​ឃោសនា​របស់​គណបក្ស នៅ​តាម​មណ្ឌល​រាជធានី ខេត្ត និង​មណ្ឌល​ក្រុង ស្រុក ខណ្ឌ បាន​ប្រព្រឹត្ត​ទៅ​ក្នុង​បរិយាកាស​ល្អ គ្មាន​អំពើ​ហិង្សា គ្មាន​ការ​គំរាមកំហែង មាន​សន្តិសុខ​ល្អ សណ្តាប់ធ្នាប់​ល្អ និង​មានការ​អធ្យាស្រ័យ​គ្នា​ទៅវិញទៅមក ជាមួយគ្នា​នោះ ក៏បាន​អំពាវនាវ​ឲ្យ​គ្រប់​ភាគី​ពាក់ព័ន្ធ​ទាំងអស់ ត្រូវអនុវត្ត​ច្បាប់ និង​គោលការណ៍​ណែនាំ​នានា ដើម្បីឱ្យ​ដំណើរការ​នៃ​ការបោះឆ្នោត​នេះ ទទួលបាន​ជោគជ័យ​។



នេះ​ជាការ​បញ្ជាក់​របស់លោក ឯម សូផាត សមាជិក គ​.​ជ​.​ប នៅក្នុង​កិច្ចប្រជុំ​ជាមួយ​ភាគី​ពាក់ព័ន្ធ ដើម្បី​ផ្សព្វផ្សាយ ”​ការសរុប​ព្រឹ​ត្តិ​ការណ៍​ទូទៅ​នៃ​ដំណើរការ​ឃោសនាបោះឆ្នោត និង​នីតិវិធី​នៃ​ការបោះឆ្នោត ការរាប់​សន្លឹកឆ្នោត ការគ្រោង​បិទ​ផ្សាយ​លទ្ធផល​នៃ​ការបោះឆ្នោត​ជ្រើសរើស​ក្រុមប្រឹក្សា អាណត្តិ​ទី​៣” កាលពី​រសៀល​ថ្ងៃ​សុក្រ ទី​២៤ ខែឧសភា ឆ្នាំ​២០១៩ ។



លោក ឯម សូផាត បាន​ថ្លែងថា ដំណើរការ​ឃោសនាបោះឆ្នោត​ជ្រើសរើស​ក្រុមប្រឹក្សា អាណត្តិ​ទី​៣ ដែល​បាន​ប្រព្រឹត្តទៅ​រយៈពេល​៨ ថ្ងៃ​កន្លងមកនេះ គ្រប់​សកម្មភាព​ឃោសនា​របស់​គណបក្ស​នៅតាម​មណ្ឌល​រាជធានី ខេត្ត និង​មណ្ឌល​ក្រុង ស្រុក ខណ្ឌ បាន​ប្រព្រឹត្ត​ទៅក្នុង​បរិយាកាស​ល្អ គ្មាន​អំពើហិង្សា គ្មាន​ការគំរាមកំហែង មាន​សន្តិសុខ​ល្អ សណ្តាប់ធ្នាប់​ល្អ និង​មានការ​អធ្យាស្រ័យ​គ្នា​ទៅវិញទៅមក​។ លោក​បន្តថា នៅ​ថ្ងៃទី​២៥ ខែឧសភា ឆ្នាំ​២០១៩ ដែលជា​ថ្ងៃ​ស និង​ថ្ងៃទី​២៦ ខែឧសភា ឆ្នាំ​២០១៩ ជា​ថ្ងៃ បោះឆ្នោត គ្រប់​គណបក្សនយោបាយ និង​ភាគី​ពាក់ព័ន្ធ​មិនអាច​ធ្វើ​សកម្មភាព​ឃោសនាបោះឆ្នោត​បានឡើយ ប្រសិន​ប្រព្រឹត្តល្មើស នឹងត្រូវ​ទទួលខុសត្រូវ​ចំពោះមុខ​ច្បាប់​។



នៅក្នុង​កិច្ចប្រជុំ​នេះដែរ លោក ឯម សូផាត ក៏បាន​លើកឡើង​នូវ​ចំណុច​មួយចំនួន ដែល​អ្នកបោះឆ្នោត ភ្នាក់ងារ​គណបក្សនយោបាយ និង​អ្នកសង្កេតការណ៍​ត្រូវធ្វើ និង​មិន​ត្រូវធ្វើ​នៅមុន​ថ្ងៃ​បោះឆ្នោត និង​ថ្ងៃ​បោះឆ្នោត​។



ទាក់ទង​នឹង​ប្រធានបទ នីតិវិធី​នៃ​ការបោះឆ្នោត ការ​រាប់​សន្លឹកឆ្នោត និង​ការប្រកាស​លទ្ធផល​នៃ​ការបោះឆ្នោត លោក ឯម សូផាត បាន​លើក​ឡើង​ថា ទី​១- ការ​ត្រួតពិនិត្យ​វត្តមាន​សមាសភាព​គណៈ​កម្ម​ការ​ការិយាល័យ​បោះឆ្នោត (​គ​.​ក​.​ប​) និង​គណៈកម្មការ​ការិយាល័យ​រាប់​សន្លឹកឆ្នោត (​គ​.​ក​.​រ​) សម្ភារ ឯកសារ និង​ទីតាំង​ការិយាល័យ​បោះឆ្នោត​នៅ​មួយ​ថ្ងៃមុន​ថ្ងៃ​បោះឆ្នោត ទី​២- សង្ខេប​នីតិវិធី​សំខាន់ៗ​ទាក់ទង​នឹង​ការបោះឆ្នោត​ជ្រើសរើស​ក្រុមប្រឹក្សា ទី​៣- ការបិទ​ការបោះឆ្នោត និង​ការងារ​ត្រូវធ្វើ​នៅមុន​ពេល​រាប់​សន្លឹកឆ្នោត ទី​៤- ការ​រាប់​សន្លឹកឆ្នោត ទី​៥- ការរៀបចំ និង​ការ​វេច​ខ្ចប់​កញ្ចប់​សុវត្ថិភាព “​ក​” ស្បោង “​ខ​” និង​សម្ភារ ឯកសារ​នៅសល់ និង​ការ​បញ្ជូន​ទៅ គ​ធ​.​ខ​ប ទី​៦- ការប្រកាស​លទ្ធផល​នៃ​ការបោះឆ្នោត ទី​៧- ការ​ដាក់​ពាក្យ​បណ្តឹង​តវ៉ា និង​ពាក្យ​បណ្តឹង​ជំទាស់​ពាក់ព័ន្ធ​នឹង​ការបោះឆ្នោត ការ​រាប់​សន្លឹកឆ្នោត និង​លទ្ធផល​បណ្តោះ​អាសន្ន​នៃ​ការបោះឆ្នោត។



មុននឹង​បិទ​កិច្ចប្រជុំ​នេះ លោក ឯម សូផាត បាន​សង្កត់ធ្ងន់​ថា ដើម្បី​ធានា​ឲ្យ​ដំណើរការ​នៃ​ការបោះឆ្នោត​ជ្រើសរើស ក្រុមប្រឹក្សា អាណត្តិ​ទី​៣ ឆ្នាំ​២០១៩ នេះ ប្រព្រឹត្ត​ទៅដោយ​រលូន មាន​សន្តិសុខ សុវត្ថិភាព គ្មាន​ការ​គំរាមកំហែង និង​គ្មាន​អំពើហិង្សា គ្រប់​ភាគី​ពាក់ព័ន្ធ​ទាំងអស់​ត្រូវ​គោរព និង​អនុវត្ត​តាម​ច្បាប់បោះឆ្នោត គោលការណ៍​ណែនាំ របស់ គ​.​ជ​.​ប និង​ក្រមសីលធម៌​នានា​សម្រាប់​ភាគី​ពាក់ព័ន្ធ​៕




Source: Kampuchea Thmey Daily

ផល សោ​ភ័​ណ្ឌ ឈ្នះ កូ​លាប ដាំ ខណៈ​យ៉េន ឌី​ណា​ ស្មើ​យុគ​ ផេ​ត​



អ្នក​ប្រដាល់ ផល សោ​ភ័​ណ្ឌ ក្លិប​តា​ឡី​ដំរី​មាន​រិ​ទ្ធ បាន​វាយ​ឈ្នះ​អ្នក​ប្រដាល់​ថៃ​កូ​លាប ដាំ​(Ko labdam Phran26 ) ក្នុង​ការជួប​ប្រកួត​គ្នា កាលពី​យប់​ថ្ងៃ​សុក្រ ​ទី​២៤ ខែ​​ឧសភា ឆ្នាំ​២០១៩ នៅ​លើ​សង្វៀន​បាយ័ន​ស្ទឹងមានជ័យ។

ផល សោ​ភ័​ណ្ឌ ឈ្នះ​កូ​លាប ដាំ ដោយ​ប្រផុតប្រផើយ​ប៉ុណ្ណោះ។ ក្នុងការ​ប្រកួត​គ្នា​៥​ទឹក​នោះ បើតាម​ការ​កត់សម្គាល់​នោះ ពួកគេ​ទាំងពីរ​ឈ្នះ​ពីរ​ទឹក​ម្នាក់ ដែល​តម្រូវ​កាត់ក្តី​ឈ្នះ​ចាញ់​ក្នុង​ទឹក​ទី​៥ ​ដែលជា​ទឹក​ចុងក្រោយ​នោះ។ នៅក្នុង​ការប្រកួត​ទឹក​ទី​៥ ដែលជា​ទឹក​ចុងក្រោយ​នោះ សោ​ភ័​ណ្ឌ បាន​យក​ប្រៀប​ឈ្នះ​លើ​កូ​លាប ដាំ ធ្វើ​ឲ្យ​ចប់​ការប្រកួត​ផល សោ​ភ័​ណ្ឌ ​ឈ្នះ​ដោយ​ពិន្ទុ។​

កូ​លាប ដាំ ប្រាន​២៦ នេះ ធ្លាប់​វាយ​ឈ្នះ​ផល សោ​ភ័​ណ្ឌ ដោយ​ពិន្ទុ​ម្តង​ហើយ តែ​ពេលនេះ​ត្រូវ​ចាញ់​សោ​ភ័​ណ្ឌ​ ដោយ​ពិន្ទុ​វិញ ដែល​អាច​ថា សោ​ភ័​ណ្ឌ​ គេ​សងសឹក​កូ​លាប​ដាំ​បាន​វិញ​ហើយ​។​

សូម​បញ្ជាក់​ថា អ្នក​ប្រដាល់​ថៃ​កូ​លាប ដាំ​នេះ គេ​ធ្លាប់​មក​ស្រុក​ខ្មែរ​ច្រើន​លើក​ហើយ​កន្លងមក ដែល​ក្នុង​នោះគេ​ធ្លាប់​ឈ្នះ​ពិន្ទុ ធន ចាន់​តាក់ , ឈ្នះ​ផាន់ គ្រាន់ ដោយ​ពិន្ទុ , ឈ្នះ​សេក គឹម​រួន អ្នក​ប្រដាល់​ក្លិប​អង្គរ​មានជ័យ​ដោយ​ពិន្ទុ​, គេ​បាន​វាយ​ឈ្នះ​សូត្រ ប៊ុន​ធី ជើង​ខ្លាំង​ក្លិប​បក្សី​ស្លាប​ដែក​ដោយ​ពិន្ទុ ហើយ​ថ្មីៗ​កន្លងទៅនេះ គេ​បាន​វាយ​ឈ្នះ​សេង ស្រឿ​ន ក្លិប​ម​ហិ​ទ្ធ​រិ​ទ្ធ​មាសរ​ថ្ង​ក​ខេត្ត​ស្វាយរៀង​ក្នុង​ទឹក​ទី​៤ ឈ្នះ​ចាន់ ប៊ុន​លាភ ក្លិប​និរោធ​មានជ័យ​ដោយ​ពិន្ទុ។​

ចំពោះ​អ្នក​ប្រដាល់​យ៉េន ឌី​ណា សមាគម​កីឡាប្រដាល់​ក្រសួងកសិកម្ម​បាន​ប្រកួត​ស្មើ​ពិន្ទុ​ជាមួយ​អ្នក​ប្រដាល់​ថៃ យុគ​ផេ​ត ផេ​ត​កា​សាម (Yokpetch Petchkarsam) បន្ទាប់ពី​វាយ​គ្នា​៥ ​ទឹក​ពេញ​នោះ។
​ ​
យ៉ាងណា ការផ្តល់​ពិន្ទុ​អោយ​យ៉េន ឌី​ណា ​ស្មើ​ជាមួយ​យុគ​ផេ​ត​នេះ មិន​ត្រូវ​បាន​អ្នកទស្សនា​គាំទ្រ​នោះ​ទេ។

យ៉េន ឌី​ណា ក្នុងការ​ប្រកួត​ទឹក​ទី​៣ ត្រូវ​យុគ ផេ​ត ផេ​ត​កា​សាម វាយ​មួយ​កែង​ស្តាំ ចំ​ថ្គាម​ខាងឆ្វេង​របស់​ឌី​ណា ធ្វើ​ឲ្យ​យ៉េន ឌី​ណា ដួល​វង្វេងស្មារតី ប៉ុន្តែ​ក្រោយពី​អាជ្ញាកណ្ដាល​រាប់​ដល់​៨ និង​ស្នូរ​ជួង​បញ្ចប់​ទឹក​បន្លឺ​ឡើង​ផង​នោះ ក៏​ធ្វើឲ្យ ​ឌី​ណា ​រួច​ផុត​ពី​បរាជ័យ។

តែ​យ៉ាងណា យ៉េន ឌី​ណា មិន​ត្រឹមតែ​មិន​ចាញ់​ទេ ថែមទាំង​បាន​ស្មើ​ពិន្ទុ​ជាមួយ​យុគ ផេ​ត ផេ​ត​កា​សាម ក្រោយពេល​បញ្ចប់​ការប្រកួត​នោះ។
សូម​បញ្ជាក់​ថា យុគ ផេ​ត ផេ​ត​កា​សាម​នេះ គេ​ធ្លាប់​ផ្ដួល​យ៉េន ឌី​ណា ឲ្យ​សន្លប់​ក្នុង​ទឹក​ទី​៣ ម្តង​រួចមក​ហើយ​កាលពី​ជួបគ្នា​កន្លងមក។​ ហើយ​អ្នក​ប្រដាល់​ថៃ​រូបនេះ ក៏​ធ្លាប់​វាយ​ឈ្នះ​ផល សោ​ភ័​ណ្ឌ ​ដោយ​ពិន្ទុ​ផងដែរ។​

ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ ជ័យ ស៊ី​នេ​ត អ្នក​ប្រដាល់​ក្លិប​ឃ្លាំងមឿង​កីឡា ខេត្ត​ពោធិ៍សាត់ បាន​វាយ​ឈ្នះ មាស សារ៉ាក់ អ្នក​ប្រដាល់​ក្លិប​អាណាចក្រ​គុន​ខ្មែរ​ដោយ​ពិន្ទុ ក្នុង​ការ​ជួប​ប្រកួត​គ្នា​ក្នុង​ទម្ងន់​៦០​គីឡូក្រាម។

ឡុង ហាក់ អ្នក​ប្រដាល់​ក្លិប​មជ្ឈមណ្ឌល​កីឡា ខ​.​ភ​.​ម បាន​វាយ​ឈ្នះ បាង បិទ អ្នក​ប្រដាល់​ក្លិប​អា​ណា​ចក្រ​គុន​ខ្មែរ​ដោយ​ពិន្ទុ​ដែរ ក្នុង​ការ​ជួប​ប្រកួត​គ្នា​ទម្ងន់​៤៨​គីឡូក្រាម​នោះ៕





Source: Kampuchea Thmey Daily

សហគមន៍​ពិភពលោក​ សន្យា​ផ្តល់ប្រាក់​៣៦៣​លាន​ដុល្លារ​ដើម្បី​ប្រយុទ្ធ​ប្រឆាំង​អំពើ​ហិង្សា​ផ្លូវភេទ



សហគមន៍​អន្តរជាតិ​កាលពី​ថ្ងៃ​សុក្រ ​បាន​សន្យា​ផ្តល់​ទឹកប្រាក់​ចំនួន​៣៦៣​លាន​ដុល្លារ​អាមេរិក​ដើម្បី​ប្រយុទ្ធ​ប្រឆាំង​នឹង​អំពើ​ហិង្សា​ផ្លូវ​ភេទ ​និង​យេនឌ័រ​នៅ​ក្នុង​វិបត្តិ​មនុស្សធម៌​នៅ​ទូទាំង​ពិភពលោក ​ដែល​កំពុង​ប៉ះពាល់​ដល់​មនុស្ស​រាប់លាន​នាក់​។​

អង្គការសហប្រជាជាតិ​បាន​និយាយថា នៅពេល​បញ្ចប់​សន្និសីទ​មួយ​ស្តីពី​ប្រធានបទ​នេះ​នៅក្នុង​រដ្ឋធានី​របស់​ប្រទេស​ន័​រ​វែ​ស​, ម្ចាស់ជំនួយ​ចំនួន​២១​ប្រទេស​បាន​ប្តេជ្ញា​ផ្តល់​វិភាគទាន​របស់​ពួកគេ​នៅក្នុង​ឆ្នាំ​២០១៩, ២០២០​និង​លើសពីនេះ​ទៀត​។​

យោងតាម​អគ្គលេខាធិការរង​អង្គការសហប្រជាជាតិ​ទទួលបន្ទុក​កិច្ចការ​មនុស្សធម៌​លោក Mark Lowcock បាន​ឲ្យ​ដឹងថា ទឹកប្រាក់​ប្រមាណ​៦៦០​លាន​ដុល្លារ​គឺ​ត្រូវការ​ជា​ចាំបាច់​ក្នុងឆ្នាំនេះ​ដើម្បី​ផ្តល់​មូលនិធិ​ដល់​កម្មវិធី​ប្រយុទ្ធ​ប្រឆាំងនឹង​អំពើហិង្សា​ផ្លូវភេទ​។​

ស្របពេល​ជាមួយគ្នា​នោះដែរ រដ្ឋមន្ត្រី​ក្រសួងការបរទេស​ន័​រ​វែ​ស​លោកស្រី Ine Eriksen Soreide បាន​និយាយថា “​អំពើហិង្សា​ផ្លូវភេទ​និង​យេនឌ័រ​បាន​បំផ្លាញ​ប្រជាពលរដ្ឋ វា​បំផ្លាញ​សហគមន៍​មូលដ្ឋាន​ហើយ​វា​ជាការ​លំបាក​ខ្លាំងណាស់​ក្នុងការ​ជួសជុល​ការខូចខាត​។ នោះ​ហើយ​ជា​មូល​ហេតុដែល​យើង​ត្រូវធ្វើ​បន្ថែមទៀត​ដើម្បី​ទប់ស្កាត់​វា​”​។​

ប្រទេស​ស្កេ​ន​ឌី​ណាវី​ដែលមាន​ទ្រព្យសម្បត្តិ​ស្តុកស្តម្ភ​មួយ​នេះ​បាន​សន្យា​ផ្តល់​ថវិកា​ចំនួន​១​ពាន់​លាន​ក្រូ​ណា (១១៥​លាន​ដុល្លារ​អាមេរិក​) នៅ​ចន្លោះ​ឆ្នាំ​២០១៩​ដល់​ឆ្នាំ​២០២១​។​

វេជ្ជបណ្ឌិត​សញ្ជាតិ​កុង​ហ្គោ​និង​ជា​អ្នកឈ្នះ​ពានរង្វាន់​ណូបែល​សន្តិភាព​ឆ្នាំ​២០១៨​លោក Denis Mukwege បាន​និយាយថា “​នៅ​ទីបំផុត អំពើហិង្សា​លើ​ស្ត្រី​និង​ក្មេងស្រី​ត្រូវបានគេទទួលស្គាល់​ថា​មិន​ត្រឹមតែ​ជាការ​រំលោភបំពាន​យ៉ាងធ្ងន់ធ្ងរ​លើ​សិទ្ធិនារី​ប៉ុណ្ណោះ​ទេ​ប៉ុន្តែ​ក៏​ជា​ការរីក​រាលដាល​នៃ​សុខភាព​សាធារណៈ​ហើយក៏​ជា​ឧបសគ្គ​មួយ​ក្នុងការ​ដោះស្រាយ​បញ្ហា​សកល​នានា​ដូចជា​ភាពក្រីក្រ​ធ្ងន់ធ្ងរ មេរោគ​អេដស៍​និង​ការគ្រប់គ្រង​ជម្លោះ​ផងដែរ​”​។​

យោងតាម​អង្គការសហប្រជាជាតិ​បាន​បង្ហាញថា ស្ត្រី​មួយ​ភាគបី​នៅក្នុង​ពិភពលោក​បានទទួលរ​ង​អំពើហិង្សា​ខាង​ផ្លូវភេទ​ឬ​យេនឌ័រ​ក្នុងអំឡុង​ពេលខ្លះ​នៃ​ជីវិត​របស់​ពួកគេ​៕ AFP



Source: Kampuchea Thmey Daily

សិស្ស​វិទ្យាល័យ ជាស៊ីម សាមគ្គី​ម្នាក់​ ក្លាយ​ខ្លួន​ជា​ឆក់​ទូរស័ព្ទ​ដៃ ប៉ូលិស​ចាប់​វាយ​ខ្នោះ​​ភ្លាមៗ​ជាមួយ​​ជនសង្ស័យ​ម្នាក់​ទៀត



ភ្នំពេញ ​៖ ជនសង្ស័យ​២​នាក់ ត្រូវបាន​ប្រជាពលរដ្ឋ​ចាប់​ប្រគល់​ឲ្យ​សមត្ថកិច្ច ដើម្បី​ចាត់ការ​ទៅតាម​ផ្លូវ​ច្បាប់ ខណៈ​ដែល​ជនសង្ស័យ​២​នាក់​នេះ ​ធ្វើ​សកម្មភាព​ឆក់​យក​ទូរស័ព្ទ​ដៃ​មួយ​គ្រឿង​ពី​បុរស​ម្នាក់​បាន​សម្រេច ហើយ​នៅពេល​ជិះ​ម៉ូតូ​គេចខ្លួន​ទៅបុក​រថយន្ត​អ្នកដំណើរ ទើប​ប៉ូលិស​ចាប់វាយ​ខ្នោះ​តែម្តង​។​

ហេតុការណ៍​នេះ បាន​បង្ក​ឲ្យ​មានការ ភ្ញាក់ផ្អើល​ឡើង​កាលពី​វេលា​ម៉ោង​១២​និង​១៥​នាទី​រំលង​អធ្រាត្រ ឈានចូល​ថ្ងៃ​សៅរ៍ ទី​២៥ ខែ​ឧសភា ឆ្នាំ​២០១៩ ចំណុច​ក្បែរ​ភោជនីយដ្ឋាន​យីហោ ស៊ីត​ធី ហ្គោល ផ្លូវ​២០២ ក្នុង​សង្កាត់​ទឹកល្អក់​ទី​៣ ខណ្ឌ​ទួលគោក។​

ជនសង្ស័យ ទី​១.ឈ្មោះ ពេជ្រ សូ​ណា​រ៉ុង ភេទ​ប្រុស អាយុ​១៧​ឆ្នាំ មុខរបរ​មិន​ពិតប្រាកដ ស្នាក់នៅ​សង្កាត់​ជ្រោយចង្វារ ខណ្ឌ​ជ្រោយចង្វារ​។ ទី​២.ឈ្មោះ ទូច ណា​រាជ ភេទ​ប្រុស អាយុ​១៧​ឆ្នាំ ជា​សិស្ស ថ្នាក់​ទី​១២ នៅ​វិទ្យាល័យ​ជាស៊ីម សាមគ្គី ស្នាក់នៅ​សង្កាត់​ច្បារអំពៅ ខណ្ឌ​ច្បារអំពៅ។​

ជនរងគ្រោះ​ឈ្មោះ រ៉ា រី​ណា ភេទ​ប្រុស អាយុ​៣០​ឆ្នាំ មុខរបរ​បុគ្គលិក​ក្រុមហ៊ុន​សំណង់​ស៊ីវិល ស្នាក់​នៅ​ក្នុង សង្កាត់​កា​កាប​ទី​១ ខណ្ឌ​ពោធិ៍​សែន​ជ័យ​។​

បើតាម​សម្តី​ជនរងគ្រោះ បាន​ឲ្យ​ដឹងថា នៅ​មុនពេល​កើតហេតុ ជនរងគ្រោះ​បាន​ជិះ​ម៉ូតូ​មួយគ្រឿង​ម៉ាក​ស៊ុយ​ស័​រ​ស្មាស​វី (Suzuki Smash-V) ពណ៌​ស ពាក់​ស្លាក​លេខ​បាត់ដំបង 1S-4391 ចេញ​មកពី​ផឹក​ស៊ី​ជាមួយ​មិត្តភ័ក្ដិ នៅ​ហាង​ស៊ីត​ធី ហ្គោល បំណង​ត្រឡប់ទៅផ្ទះ​វិញ ដោយ​ធ្វើដំណើរ​តាម​បណ្ដោយ​ផ្លូវ​២០២ ទិសដៅ​ពី​កើ​តទៅ​លិច​។ លុះ​មកដល់​ចំណុចកើតហេតុ ជនរងគ្រោះ​ក៏បាន​យក​ទូរស័ព្ទដៃ​មួយគ្រឿង​ម៉ាក​អាយ​ហ្វូ​ន អ៊ិ​ច​ម៉េ​ក (Iphone X Max) បម្រុង ដាក់ចូល​ក្នុង​ហោប៉ៅ​ខោ ខណៈនោះ ស្រាប់​តែ​លេចមុខ​ជនសង្ស័យ​ទាំង​២​នាក់ ជិះ​ម៉ូតូ​មួយគ្រឿង​ម៉ាក ហុងដា​ឌ្រី​ម​ ស៊េរី​០១៩ ពណ៌​ទឹកមាស ពាក់​ស្លាក​លេខ ភ្នំពេញ 1HO-3378 ដោយ​ជិះ​មកពី​ក្រោយ រួច​ក៏បាន​ធ្វើ​សកម្មភាព ឆក់​ទូរស័ព្ទដៃ​ពី​ជនរងគ្រោះ​បានសម្រេច ហើយក៏​ព្យាយាម​បើក​ម៉ូតូ​រត់គេចខ្លួន​។​ ភ្លាមៗ នោះ​ជនរងគ្រោះ ក៏​ស្រែក​ចោរៗ​ជិះ​ដេញតាម​រ​ហូត​ទៅដល់​ខាងមុខ​ចំណុច​ផ្សារ​សំណង់​១២ ក៏​បណ្ដាល​ឲ្យ​ជនសង្ស័យ​ភ័យ​ស្លន់ស្លោ បោះចោល​ទូរស័ព្ទដៃ ដែល​ធ្វើ​សកម្មភាព​ឆក់​បាន​ពី​ជនរងគ្រោះ រួច​ក៏​ជ្រុល​ទៅបុក​រថយន្ត​មិន​ស្គាល់​ម៉ាក បណ្ដាល​ឲ្យ​ដួល​ម៉ូតូ ហើយក៏​ត្រូវបាន​ប្រជាពលរដ្ឋ​នៅក្បែរនោះ នាំ​គ្នា​ជួយ​ចាប់​ឃាត់​បាន និង​ស្វាគមន៍​ម្នាក់​មួយ​ដៃ មួយ​ជើង​ឡើង​ទ្រោម​ខ្លួន រួច​ក៏​ប្រគល់​ទៅ​ឲ្យ​សមត្ថកិច្ច​មូលដ្ឋាន​នាំយកទៅ​សាកសួរ​។ ចំណែក ទូរស័ព្ទដៃ ដែល​ក្រុម​ជនសង្ស័យ​ខាងលើ ធ្វើ​សកម្មភាព​ឆក់​ពី​ជនរងគ្រោះ​បានសម្រេច​ហើយ ក្នុងអំឡុងពេល​ជិះ​រត់​ទាំង​ភ័យ​ស្លន់ស្លោ​នោះ បាន​យក​ទៅ​បោះចោល​ហើយ​រក​មិនឃើញ​នោះទេ​។​

ក្រោយ​កើតហេតុ ជនសង្ស័យ​ទាំង​២​នាក់​ខាងលើ រួមទាំង​វត្ថុតាង ត្រូវ​បាន​សមត្ថកិច្ច​មូល​ដ្ឋា​ន នាំមក​ប៉ុស្តិ៍​នគរបាល រដ្ឋបាល​ទឹកល្អក់​ទី​៣ កសាង​សំណុំរឿង​បញ្ជូនទៅ អធិការដ្ឋាន​នគរបាល ខណ្ឌ​ទួល​គោក ដើម្បី​ចាត់ការ​ទៅតាម​នីតិវិធី​វិញ​ច្បាប់​៕​





Source: Kampuchea Thmey Daily

ផាន់ គ្រាន់ ជួប ណាត ថា​ភុ​ន ខណៈ​ឌុ​ម កែវ​ដា ជួប ផេ​ត ភូ​លូ​ង ​នៅ​SEATV



អ្នក​ប្រដាល់​ជើង​ខ្លាំង​របស់​កម្ពុជា ផាន់ គ្រាន់ អ្នក​ប្រដាល់​ក្លិប​ពុទ្ធ​សេរី​វង្ស​កីឡា ​និង​ជា​ម្ចាស់​ខ្សែក្រវាត់​Barrley Black ទម្ងន់​៦៣,៥០០​គីឡូក្រាម ត្រូវ​គេ​ផ្គូ​ឲ្យ​ជួប​ប្រកួត​ជាមួយ​ថៃ​ណាត ថា​ភុ​ន​(Nart Thaphun) នៅ​រសៀល​ថ្ងៃអាទិត្យ​ ទី​២៦ ខែ​ឧសភា ឆ្នាំ​២០១៩​នេះ នៅ​សង្វៀន​Wurkz​ របស់​អាស៊ីអាគ្នេយ៍។​

ផាន់ គ្រាន់ និង ណាត ថា​ភុ​ន ជួប​ប្រកួត​គ្នា​ក្នុង​ប្រភេទ​ទម្ងន់​៦៣,៥០០​គីឡូក្រាម​។ ​ផាន់ គ្រាន់ មិន​ដឹង​ថា អាច​យកឈ្នះ​ណាត ថា​ភុ​ន បាន​ឬ​អត់​នោះទេ? ព្រោះថា អ្នក​ប្រដាល់​ថៃ​រូបនេះ គេ​មាន​ផ្លែ​ល្អ និង​រឹងមាំ​ណាស់។ នេះ​បើតាម​ លោក​ញាណ សុធី អ្នកចាត់ចែង​កម្មវិធី​ប្រដាល់​ប្រចាំ​SEATV​ឲ្យ​ដឹង។​

លោក ញាណ សុធី ឲ្យ​ដឹង​ទៀតថា ណាត ថា​ភុ​ន គេ​ទើបតែ​មក​ប្រកួត​នៅ​ស្រុក​ខ្មែរ​ជា​លើកដំបូង​ប៉ុណ្ណោះ។ អ្នក​ប្រដាល់​ថៃ​រូបនេះ គឺមាន​ស្នៀត​ប្រដាល់ ​និង​បច្ចេកទេស​មិន​ជា​អន់​នោះ​ឡើយ។ គេ​មាន​ប្រវត្តិ​ប្រកួត​ចំនួន​៧៨​ដង ឈ្នះ​៦២​ដង ចាញ់​១៦​ដង។​

យ៉ាងណា ផាន់ គ្រាន់ មិនអាច​មើលស្រាល ឬ ធ្វេសប្រហែស​ចំពោះ​ណាត ថា​ភុ​ន​នោះទេ​?។ ផាន់ គ្រាន់ គេ​ជា​អ្នក​ប្រដាល់​ល្អ តែ​ដោយសារ​ប្រកួត​គ្មាន​ពេល​សម្រាក​នោះ គេ​ស្ទើរតែ​ក្លាយ​ខ្លួន​ទៅជា​អន់​វិញ​ទៅ​ហើយ។ ផាន់ គ្រាន់ កាលពី​ចុងខែ​មេសា​កន្លងទៅ គេ​បាន​ជួប​ប្រកួត​ជាមួយ​ថៃ សេន ឃុ​ម ហើយ​បាន​វាយ​ចាញ់​សេន ឃុ​ម ដោយ​ពិន្ទុ។ ផាន់ គ្រាន់ គេ​មាន​ប្រវត្តិ​ប្រកួត​ចំនួន​១២៣​ដង ឈ្នះ ១០១​ដង ចាញ់​១៩​ដង និង​ស្មើ​ពិន្ទុ​៣​ដង។​

ចំពោះ អ្នក​ប្រដាល់​ឌុ​ម កែវ​ដា ក្លិប​ម្កុដ​រាជ​សីហ៍ ដែល​ទើប​ត្រឡប់​មកពី​ព្យាបាល​ឆ្អឹងស្មង​នៅ​ឯ​ស្រុក​កំណើត​នោះ បាន​វិលត្រឡប់​មកវិញហើយ ហើយ​ពេលនេះ​គេ​ត្រៀមខ្លួន​ប្រកួត​ជាមួយ​អ្នក​ប្រដាល់​ថៃ ផេ​ត ភូ​លូ​ង ​(Phat Phuluong) លើស​ង្វៀន​Wurkz​ របស់​អាស៊ីអាគ្នេយ៍​រសៀល​ថ្ងៃទី​២៦​ឧសភា​នេះ​ដែរ។​

ឌុ​ម កែវ​ដា ជា​អ្នក​ប្រដាល់​មួយរូប​ដែល​វាយ​មាន​ផ្លែ​ល្អ​គ្រាន់បើ ទោះបី​ចិត្ត​របស់​គេ​មិនសូវ​ធំ​ក៏ដោយ តែ​កែង ​និង​ជង្គង់​របស់​គេ មិន​ជា​ស្រួល​ទប់ទល់​ប៉ុន្មាន​ឡើយ។ ការ​វិល​ត្រឡប់មកវិញ​លើក​នេះ មិន​ដឹង​ថា​គេ​វាយ​នៅ​ល្អ​ដូច​មុន​ ឬក៏​យ៉ាងណា​នោះ​ទេ តែ​មុនគេ​ទៅ​ព្យាបាល​ជើង ការប្រកួត​របស់​គេ​ភាគ​ច្រើន​ទទួល​បរាជ័យ។​

ចំពោះ​ភេត ភូ​លូ​ង​ វិញ នេះ​ជា​លើកដំបូង​ហើយ ដែល​គេ​មក​ប្រកួត​នៅ​ស្រុក​ខ្មែរ។ ​មន្ត្រី​ផ្គូផ្គង​និយាយ​ថា មិន​មាន​នរណា​ដឹង​ថា អ្នក​ប្រដាល់​រូបនេះ​ខ្លាំង ​ឬ​ខ្សោយ​នោះឡើយ។ ចំពោះ ​លោក​ថៃ អ៊ូ​ ដែល​ជា​ប្រតិភូ​ដឹកនាំ​អ្នក​ប្រដាល់​បរទេស​មក​ប្រកួត​នៅ​សង្វៀន​អាស៊ីអាគ្នេយ៍​នោះ​ថា លោក​ក៏​មិន​ធ្លាប់​ឃើញ​គេ​ប្រកួត​ដែរ តែ​គ្រូបង្វឹក​របស់​គេ​ប្រាប់​លោក​ថា គេ​មិន​អន់​ឡើយ។​

កែវ​ដា មាន​ប្រវត្តិ​ប្រកួត​ចំនួន​១០៦​ដង ឈ្នះ​៨៨​ដង ចាញ់​១៥​ដង និង​ស្មើ​ពិន្ទុ​៣​ដង។ ចំពោះ​ផេ​ត ភូ​លូ​ង​ វិញ​ គេ​មាន​ប្រវត្តិ​ប្រកួត​ចំនួន​៦៩​ដង ឈ្នះ​៥៨​ដង ចាញ់​១១​ដង។ ​ដោយ​ពុំ​ធ្លាប់​ជួប​ប្រកួត​គ្នា​ពី​មុន​មក​នោះ នរណា​ឈ្នះ​ក្នុង​ជំនួប​នេះ គេ​ពុំ​អាច​ទស្សន៍ទាយ​បាន​ឡើយ។​

ដោយឡែក ការប្រកួត​រវាង​អ្នក​ប្រដាល់​រួម​ជាតិ​វិញ អាំង សំអាត អ្នក​ប្រដាល់​ក្លិប​តា​ព្រហ្ម​មានជ័យ ដែល​បាត់​មុខ​ពីស​ង្វៀន​យូរហើយ​នោះ ត្រូវគេ​ផ្គូ​ឲ្យ​ជួប​ប្រកួត​ជាមួយ​ម៉ន វ៉ា​ន្នី អ្នក​ប្រដាល់​ក្លិប​ការិ​យាល័យ​ទី​៥ កងទ័ពជើងគោក ដោយ​ប្រកួត​គ្នា​ក្នុង​ទម្ងន់​៥៤​គីឡូក្រាម។​

សំអាត ពីមុន​គេ​វាយ​ខ្លាំង​ និង​ល្អ តែ​ក្រោយ​បាត់​មុខ​មួយរយៈ​នោះ មិនដឹងថា​ គេ​នៅ​វាយ​ល្អ​ដូច​មុន ឬ​យ៉ាងណា​នោះទេ?។​ ចាំមើល តើ​ក្នុងជំនួប​លើកដំបូង​នេះ អាំង សំអាត អាច​យកឈ្នះ​លើ ម៉ន វ៉ា​ន្នី បាន​ឬ​អត់?។​

អេ​លី​ត ភក្តី អ្នក​ប្រដាល់​ស្រករ​ក្រោយ ​នៃ​ក្លិប​ឆ្មា​ស​សែន​សុខ​គុន​ខ្មែរ ត្រូវគេ​ផ្គូ​ឲ្យ​ជួប​ប្រកួត ជាមួយ​អ្នក​ប្រដាល់​ជើងចាស់ ណា​ម ម៉ូ​រ៉ា​ក់ ក្លិប​ពន្លឺ​សាមគ្គី​ខេត្ត​បាត់ដំបង ដោយ​ប្រកួត​គ្នា​ក្នុង​ទម្ងន់​៦៣,៥០០​គីឡូក្រាម។​ សម្រាប់​ការ​ជួបគ្នា​រវាង​អេ​លី​ត ភក្តី និង ណា​ម ម៉ូ​រ៉ា​ក់ នេះ ពុំ​ដឹង​ថា​នរណា​ឈ្នះ​នោះទេ​?៕


Source: Kampuchea Thmey Daily