ភ្នំពេញ ៖ សាលាដំបូងរាជធានីភ្នំពេញបានកោះហៅលោក សួន សេរីរដ្ឋា ប្រធានគណបក្សអំណាចខ្មែរឲ្យចូលបំភ្លឺបណ្តឹងរបស់ខ្លួន ដែលបានប្តឹងលោកឧបនាយករដ្ឋមន្ត្រី ហោ ណាំហុង ពីបទបរិហារកេរ្តិ៍ និងញុះញង់ឲ្យមានការរើសអើង នៅថ្ងៃទី១៣ ខែមករា ឆ្នាំ២០១៦ ខាងមុខ នេះបើយោងតាមដីកា ដែលទើបទទួលបាន។
កាលពីព្រឹកថ្ងៃទី២១ ខែធ្នូ ឆ្នាំ២០១៥ លោក សួន សេរីរដ្ឋា ប្រធានគណបក្សអំណាចខ្មែរ បានយកពាក្យបណ្តឹងព្រហ្មទណ្ឌ ដែលមានកម្មវត្ថុប្តឹងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ពីបទបរិហារកេរ្តិ៍សាធារណៈ និងញុះញង់ឲ្យមានការរើសអើង ទៅដាក់នៅអយ្យការអមសាលាដំបូងរាជធានីភ្នំពេញ ហើយនៅក្នុងបណ្តឹងនេះ បានទាមទារឲ្យមានសំណងជម្ងឺចិត្តចំនួន៥០០ លានរៀល។
តាមដីកាកោះហៅ ចុះហត្ថលេខាដោយលោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ ហើយដែលទើបទទួលបាននៅថ្ងៃទី០៤ ខែមករា ឆ្នាំ២០១៦ បានឲ្យដឹងថា “អញ្ជើញឈ្មោះ សួន សេរីរដ្ឋា ជាដើមបណ្តឹងរដ្ឋប្បវេណី មានអាស័យដ្ឋានផ្ទះលេខ២៤៤ ផ្លូវលេខ១៥៦ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ឲ្យចូលទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី១៣ ខែមករា ឆ្នាំ២០១៦ វេលាម៉ោង៩ ព្រឹក ដើម្បីសាកសួរពីដំណើររឿងបណ្តឹងរបស់ខ្លួន ហើយសាមីខ្លួនត្រូវអញ្ជើញតាមដីកានេះឲ្យបានទាន់ពេលវេលា និងយកលិខិតផ្សេងៗ ដែលទាក់ទង និង រឿងខាងលើមកជាមួយផងប្រសិនបើមាន”។
ចំណែកប្រធានគណបក្សអំណាចខ្មែរ លោក សួន សេរីរដ្ឋា បានថ្លែងប្រាប់កម្ពុជាថ្មី កាលពីរសៀលថ្ងៃទី០៤ ខែមករា ថា “នៅថ្ងៃទី៤ ខែមករា ឆ្នាំ២០១៦ នេះ ខ្ញុំទទួលលិខិតកោះហៅ របស់លោក មាស ច័ន្ទពិសិដ្ឋ ហៅឲ្យខ្ញុំចូលបំភ្លឺនៅតុលាការសាលាដំបូងនៅថ្ងៃទី១៣ ខែមករា ឆ្នាំ២០១៦ (ដីកាសរសេរ២០១៥) ករណីខ្ញុំប្តឹងលោក ហោ ណាំហុង”។ តាមលោក សួន សេរីរដ្ឋា អះអាងថា លោកនឹងឡើងទៅតុលាការតាមការកោះហៅនោះ។ តែលោក សួន សេរីរដ្ឋា ឡកឡឺយឲ្យលោក មាស ច័ន្ទពិសិដ្ឋថា “តែមិនដឹងថា ព្រះរាជអាជ្ញារង មាស ច័ន្ទពិសិដ្ឋ អាចបង្វិលពេលវេលាថយក្រោយយ៉ាងម៉េចបានឲ្យមានថ្ងៃទី១៣ មករា ២០១៥ ?”។
ទាក់ទងនិងការកោះហៅនេះ កម្ពុជាថ្មីមិនអាចសុំការបញ្ជាក់ពីលោក ការ សាវុត្ថ មេធាវីការពារក្តីឲ្យលោកឧបនាយករដ្ឋមន្ត្រី ហោ ណាំហុង បានទេ ប៉ុន្តែលោកមេធាវីធ្លាប់បានថ្លែងប្រាប់អ្នកសារព័ត៌មានថា លោកស្វាគមន៍បណ្តឹងប្រធានគណបក្សអំណាចខ្មែរ លោក សួន សេរីរដ្ឋា ប្តឹងចោទប្រកាន់ពីបទបរិហារកេរ្តិ៍ និងញុះញង់ឲ្យមានការរើសអើង។ លោកមេធាវី ការ សាវុត្ថ បញ្ជាក់ថា លោកឧបនាយករដ្ឋមន្ត្រី ហោ ណាំហុង គ្មានតម្រុយពិរុទ្ធភាពពីបទបរិហារកេរ្តិ៍ និង ញុះញង់ឲ្យមានការរើសអើងនោះទេ ពីព្រោះលោកឧបនាយករដ្ឋមន្ត្រីនិយាយតាមសាលក្រមរបស់តុលាការប៉ុណ្ណោះ៕
សាលាដំបូងរាជធានីភ្នំពេញកោះហៅលោក សួន សេរីរដ្ឋា ឲ្យចូលបំភ្លឺបណ្តឹងនៅថ្ងៃទី១៣មករាខាងមុខ
0 Comments