បន្ទាយមានជ័យ ៖ លោក យឹមលី ប្រធានមន្ទីរបរិស្ថានខេត្តបន្ទាយមានជ័យ បានមានប្រសាសន៍ក្នុងពិធីបើកយុទ្ធនាការអនាម័យបរិស្ថានថា ប្រជាពលរដ្ឋទាំងអស់ត្រូវនាំគ្នាសំអាតបរិស្ថាននៅជុំវិញផ្ទះព្រោះសំរាមគឺជាអាវុធមុខ២មាន ប្រយោជន៍ ក៏បង្កគ្រោះថ្នាក់ដល់មនុស្សសត្វ រុក្ខជាតិផងដែរ បើយើងមិនចាប់អារម្មណ៍ និងយកចិត្តទុកដាក់ក្នុងការសំអាត។
លោកមានប្រសាសន៍បែបនេះ នៅក្នុងពិធីបើកយុទ្ធនាការអនាម័យបរិស្ថាន ដែលប្រព្រឹត្តទៅនៅព្រឹក ថ្ងៃទី៥ ខែមិថុនា ឆ្នាំ២០១៨នៅសាលាបឋមសិក្សា និងអនុវិទ្យាល័យកំពង់ស្វាយ ស្ថិតក្នុងភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយមានការចូលរួមលោកអ៊ុំ រាត្រី អភិបាលរងខេត្តបន្ទាយមានជ័យ ប្រធានមន្ទីរបរិស្ថានខេត្ត មន្ត្រីរាជការ ការិយាល័យ អង្គភាពជុំវិញក្រុងប្រជាការពារភូមិ លោកគ្រូអ្នកគ្រូ សិស្សានុសិស្ស ប្រមាណចំនួនជិត៣០០នាក់នាក់។
លោក យឹមលីបានបញ្ជាក់ឲ្យដឹងទៀតថា គេធ្វើពិធីនេះដើម្បីដាស់សតិអារម្មណ៍ប្រជាពលរដ្ឋ យុវជន យុវនារីឲ្យបានដឹងឲ្យកាន់ច្បាស់ថា សំរាមគេសំដៅលើវត្ថុរឹង រាវ ដូចជាវត្ថុសល់ពីមនុស្សហូបមានដូចជា បន្លែបង្ការ សល់ពីម្ហូប ពិសេសសំបកស្នោ និងចង្កឹះ ដែលគេផលិតសុទ្ធតែដាក់ជាតិគីមីយកទៅដាក់នំចំណីឲ្យយើងហូបនៅពេលដែលយកវាទៅហូបអាចក្លាយទៅជាជំងឺដ៏កាចសាហាវនៅក្នុងខ្លួនយើង។
លោកយឹម លី បានបញ្ជាក់ឲ្យដឹងទៀតថា ឆ្នាំកន្លងមក ដោយសារតែមន្ត្រីបរិស្ថានចុះធ្វើការផ្សព្វផ្សាយអំពីបរិស្ថានដល់ប្រជាពលរដ្ឋ ឲ្យបោសសំអាតនៅជុំវិញផ្ទះ និងនៅជុំវិញផ្លូវសាធារណៈទើបប្រជាពលរដ្ឋនៅជុំវិញក្រុងសិរីសោភ័ណមានការយល់ដឹងច្រើន ចេះសំអាតនៅទីធ្លាផ្ទះ ចេះវេចខ្ចប់សំណល់រឹងរាវ ចែកពីគ្នាដាច់ ហើយយកទៅដាក់ក្នុងធុងសំរាមមានរបៀបរៀបរយ ទើបកន្លងមកទៅក្រុងសិរីសោភ័ណចូលរួមក្នុងចលនាប្រឡងប្រណាំងទីក្រុងស្អាតទៀតផងដែរ។
លោកយឹមលីបានបញ្ជាក់ឲ្យដឹងទៀតថា បរិស្ថាន គឺជាបញ្ហាប្រឈមដ៏ចំបងមួយ ដែលពិភពលោកកំពុងមានការព្រួយបារម្ភ និងយកចិត្តទុកដាក់យ៉ាងខ្លាំង បញ្ហាទាំងនោះរួមមាន កំណើនប្រជាជន កំណើនតម្រូវការ ការកាប់បំផ្លាញព្រៃឈើ ការបំពុលទឹក ការបំពុលខ្យល់ ការបំពុលដី ការបាត់បង់ជីវចម្រុះ និងភាពក្រីក្រជាដើម។ ក្នុងនោះលោកអ៊ុំរាត្រីក៏បានមានប្រសាសន៍ដែរថា ផលវិបាកអំពីបញ្ហាសំរាមដែលកើតឡើងកន្លងមក និងឥទ្ធិពលអាក្រក់ដែលអាចកើតឡើងនាពេលអនាគតនោះលោកក៏បានអំពាវនាវដល់ជនរួមជាតិ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស ព្រះសង្ឃ គួរចូលរួមក្នុងកិច្ចការពារបរិស្ថានតាមសមត្ថភាព លទ្ធភាព និងភារកិច្ចជំនាញរបស់ខ្លួន ហើយសូមស្វែងយល់អំពីបញ្ហាបរិស្ថាន និងគ្រប់គ្រងបញ្ហាទាំងនោះឲ្យបានសមស្របតាមគោលការណ៍គ្រប់គ្រងបរិស្ថាន ដូចជា ការកាត់បន្ថយការប្រើប្រាស់ ការប្រើប្រាស់ឡើងវិញ និងការកែច្នៃឡើងវិញជាដើម៕
Source: Kampuchea Thmey Daily
0 Comments