កាលពីថ្ងៃអាទិត្យ សហរដ្ឋអាមេរិកបានស្តីបន្ទោសប្រទេសកាណាដាចំពោះការបញ្ចប់ទៅដោយមហន្តរាយដល់កិច្ចប្រជុំកំពូល G7 ដោយនិយាយថា លោកនាយករដ្ឋមន្ត្រី Justin Trudeau បាន “ចាក់យើងពីក្រោយខ្នង” ខណៈសម្ព័ន្ធមិត្តអាមេរិកបានប្រគល់ឲ្យក្រុងវ៉ាស៊ីនតោនត្រូវទទួលខុសត្រូវចំពោះបរាជ័យនេះ។
ត្រឹមតែប៉ុន្មាននាទីប៉ុណ្ណោះបន្ទាប់ពីសេចក្តីថ្លែងការណ៍រួម G7 ត្រូវបានផ្សព្វផ្សាយកាលពីថ្ងៃសៅរ៍នៅក្នុងទីក្រុងកេប៊ិច, លោកប្រធានាធិបតី Donald Trump បានបើកការវាយប្រហារតាម Twitter ដោយដកស្រង់មតិយោបល់ដែលធ្វើឡើងដោយលោក Trudeau ក្នុងសន្និសីទសារព័ត៌មានមួយនិងបាននិយាយថា លោកបានណែនាំតំណាងរបស់អាមេរិកមិនឲ្យគាំទ្រដល់ការចេញផ្សាយសេចក្តីប្រកាសព័ត៌មានរួម។
ក្រុមរបស់លោក Trump បានបន្តការរិះគន់តាមប្រព័ន្ធផ្សព្វផ្សាយអាមេរិកកាលពីថ្ងៃអាទិត្យ។
ទីប្រឹក្សាសេដ្ឋកិច្ចកំពូលរបស់សហរដ្ឋអាមេរិកលោក Larry Kudlow បាននិយាយក្នុងកម្មវិធី “State of the Union” របស់ទូរទស្សន៍ CNN ថា លោក Trudeau “ពិតជាចាក់យើងពីក្រោយខ្នងមែន។ គាត់បានធ្វើឲ្យខូចខាតដល់កិច្ចប្រជុំ G7 ទាំងមូល”។
ចំណែកទីប្រឹក្សាពាណិជ្ជកម្មអាមេរិកលោក Peter Navarro បានថ្លែងក្នុងកម្មវិធី Fox News Sunday ដោយបានគាំទ្រចំពោះសារនេះ។ លោកបាននិយាយថា “មានកន្លែងពិសេសមួយនៅនរកសម្រាប់មេដឹកនាំបរទេសណាដែលចូលរួមក្នុងកិច្ចការការទូតមិនល្អជាមួយលោកប្រធានាធិបតី Donald J. Trump ហើយបន្ទាប់មកព្យាយាមវាយគាត់នៅពីក្រោយខ្នងតាមផ្លូវចេញ”។
លោក Trump បានទៅដល់ប្រទេសសិង្ហបុរីកាលពីថ្ងៃអាទិត្យសម្រាប់កិច្ចប្រជុំកំពូលនៅថ្ងៃអង្គារជាមួយលោកគីម។
មុនពេលគាត់ចាកចេញពីប្រទេសកាណាដានៅមួយថ្ងៃមុននោះ គាត់បានបង្ហោះ Twitter ថា “ផ្អែកលើសេចក្តីថ្លែងការណ៍មិនពិតរបស់លោក Justin នៅក្នុងសន្និសីទសារព័ត៌មានរបស់គាត់និងការពិតដែលថា កាណាដាកំពុងវាយពន្ធដ៏ធំធេងចំពោះកសិករ កម្មករ និងក្រុមហ៊ុនអាមេរិករបស់យើងនោះ ខ្ញុំបានបង្គាប់ឲ្យតំណាងអាមេរិកកុំគាំទ្រដល់សេចក្តីថ្លែងការណ៍នោះ”។
អធិការបតីអាល្លឺម៉ង់លោកស្រី Angela Merkel បាននិយាយកាលពីថ្ងៃអាទិត្យថា ការលុបចោលការគាំទ្ររបស់លោក Trump សម្រាប់សេចក្តីថ្លែងការណ៍រួមរបស់ G7 “គឺគួរឲ្យព្រួយបារម្ភនិងខកចិត្តបន្តិចបន្តួច” ប៉ុន្តែវាមិនមែនជាទីបញ្ចប់នៃក្រុម G7 នោះទេ។
លោក Trump បាននិយាយថា លោក Trudeau ធ្វើជាស្លូតបូតនិងចាស់ទុំក្នុងអំឡុងកិច្ចប្រជុំ G7 ដើម្បីផ្តល់នូវសន្និសីទព័ត៌មានតែប៉ុណ្ណោះ។ តាមពិតគាត់មិនស្មោះត្រង់ទេនិងខ្សោយបំផុត ។
បន្ទាប់ពីលោក Trump បានបង្ហោះ Twitter ទាំងខឹងសម្បា, ការិយាល័យរបស់លោក Trudeau បានបញ្ចេញនូវការឆ្លើយតបខ្លីមួយថា “យើងផ្តោតទៅលើអ្វីទាំងអស់ដែលយើងបានធ្វើនៅទីនេះនៅឯកិច្ចប្រជុំកំពូល G7 ”។
កាលពីថ្ងៃអាទិត្យលោក Trudeau មិនអើពើនឹងពាក្យស៊កសៀតពីទីប្រឹក្សារបស់លោក Trump ដែលភ្ជាប់ទំនាក់ទំនងទៅនឹងសេចក្តីថ្លែងការណ៍ G7 ទេហើយបានសរសើរដល់កិច្ចព្រមព្រៀងជាប្រវត្តិសាស្ត្រនិងមានសារសំខាន់ដែលពួកគេទាំងអស់គ្នាបានឈានដល់៕ AFP
Source: Kampuchea Thmey Daily
0 Comments