ប៉ូលិសបាននិយាយនៅថ្ងៃពុធថា វត្ថុជាច្រើន ដែលរឹបអូសបាននៅក្នុងការវាយឆ្មក់លើអចលនទ្រព្យដែលទាក់ទងទៅនឹងអតីតមេដឹកនាំ ដែលរងការវាយប្រហារដោយរឿងអាស្រូវរបស់ម៉ាឡេស៊ីដែលរួមមានទាំងសាច់ប្រាក់ គ្រឿងអលង្ការនិងកាបូបប្រណីតផងដែរនោះ គឺមានតម្លៃរហូតដល់ទៅ២៧៣លានដុល្លារអាមេរិក។
ការស៊ើបអង្កេតដែលជាផ្នែកមួយនៃការស៊ើបអង្កេតទៅលើមូលនិធិ 1MDB គឺបានរកឃើញគ្រឿងអលង្ការចំនួន១២,០០០ កាបូបមានប្រាក់សុទ្ធជិត៣០លានដុល្លារ នាឡិកាជាង៤០០គ្រឿងមានតម្លៃ១៩.៣លានដុល្លារនិងទំនិញប្រ៊េនៗផ្សេងទៀត។
លោក Amar Singh ប្រធានការស៊ើបអង្កេតឧក្រិដ្ឋកម្មពាណិជ្ជកម្មបាននិយាយថា “ខ្ញុំគិតថានេះជាការរឹបអូសធំបំផុតនៅក្នុងប្រវត្តិសាស្ត្រម៉ាឡេស៊ីបន្ទាប់ពីមន្ត្រីប៉ូលិសបានបញ្ចប់ភារកិច្ចរាប់វត្ថុទាំងអស់ដែលពួកគេរកឃើញនៅក្នុងការវាយឆ្មក់ជុំវិញទីក្រុងគួឡាឡាំពួរកាលពីខែមុន”។
ប្រាក់បៀវត្សផ្លូវការរបស់អតីតនាយករដ្ឋមន្ត្រីលោក Najib Razak ខណៈពេលកំពុងកាន់តំណែងគឺ២២,៨២៧រីងហ្គីត (៥,៦៧០ដុល្លារ) ក្នុងមួយខែ។
ការចោទប្រកាន់អំពីអំពើពុករលួយដ៏ធំគឺជាកត្តាសំខាន់មួយដែលបណ្តាលឲ្យក្រុមចម្រុះកាន់តំណែងជាយូរមកហើយរបស់លោក Najib ចាញ់ឆ្នោតដ៏ភ្ញាក់ផ្អើលកាលពីខែមុនក្រោមស្នាដៃសម្ព័ន្ធភាពកំណែទម្រង់និយមដែលដឹកនាំដោយលោក Mahathir Mohamad។
ភរិយារបស់គាត់ដែលជាអ្នកស្រឡាញ់របស់ប្រណីតឈ្មោះ Rosmah Mansor បានបង្កឲ្យមានកំហឹងជាសាធារណៈដោយសារកាបូបនិងគ្រឿងអលង្ការដ៏ច្រើនលើសលុបរបស់លោកស្រីហើយសេចក្តីរាយការណ៍បានបង្ហាញថាលោកស្រីស្រឡាញ់ការដើរទិញឥវ៉ាន់នៅក្រៅប្រទេស។
វត្ថុទាំងនោះត្រូវបានរឹបអូសនៅក្នុងការវាយឆ្មក់លើទីតាំងចំនួន៦ដែលភ្ជាប់ទៅនឹងលោក Najib រួមទាំងផ្ទះល្វែងប្រណីតនៅទីក្រុងគួឡាឡាំពួរនិងទីលំនៅសំខាន់របស់គាត់នៅទីក្រុងផងដែរ។
ការប្រមូលគ្រឿងអលង្ការដ៏ធំសម្បើមរួមមានខ្សែកចំនួន១,៤០០ខ្សែនិងចិញ្ចៀន២,២០០វង់។ គ្រឿងអលង្ការថ្លៃជាងគេបំផុតគឺខ្សែកដែលត្រូវបានគេប៉ាន់ប្រមាណថាមានតម្លៃ៦.៤លានរីងហ្គីត (១.៥លានដុល្លារអាមេរិក) ។
ប៉ូលិសបាននិយាយថា កាបូបដៃចំនួន៥៦៧ក៏ត្រូវបានរឹបអូសផងដែររួមទាំងកាបូបម៉ាក Hermes ចំនួន២៧២ដែលមានតម្លៃ៥១.៣លានរីងហ្គីត។
នាឡិកាដៃសរុបចំនួន៤២៣ដែលមានតម្លៃ៧៨លានរីងហ្គីតក៏ត្រូវបានរកឃើញរួមជាមួយនឹងវ៉ែនតាចំនួន២៣៤ផងដែរ៕ AFP
Source: Kampuchea Thmey Daily
0 Comments