អាជីវករផ្សារដើមគ នៅតែរំលោភបំពានយកចំណីផ្លូវសាធារណៈធ្វើជាកន្លែងលក់បន្លែ ផ្លែឈើដដែល

ភ្នំពេញ ៖ សាលារាជធានីភ្នំពេញជារឿយៗតែងជំរុញអោយអាជ្ញាធរ តាមបណ្តាខណ្ឌទាំង ១២ នៅក្នុងរាជធានីភ្នំពេញ ត្រូវពង្រឹងការងារអោយបានម៉ឺងម៉ាត់បំផុត ដូចជា ត្រូវចុះរៀបចំសណ្តាប់ធ្នាប់តាមដងផ្លូវសាធារណៈ ដោយពិនិត្យមើលទាំង ការដាក់តាំងទំនិញ ប្រកបមុខរបរ អាជីវកម្ម គ្រប់ប្រភេទ រំលោភនៅលើផ្លូវសាធារណៈ។

បញ្ហានេះ នៅតែសង្កេតឃើញថា ផ្លូវសាធារណៈមួយ ចំនួននៅក្នុងរាជធានីភ្នំពេញ ត្រូវបានប្រជាពលរដ្ឋខ្លះ កំពុងរំលោភយកធ្វើជាកន្លែងដាក់តាំងទំនិញលក់ ឬ ប្រកបរបរផ្សេងៗ ក៏ដូចជា រំលោភយកធ្វើជាកន្លែងចតយានយន្តយ៉ាងរំភើយ ដែលនាំអោយបាត់បង់សណ្ដាប់ធ្នាប់ របៀបរាបរយ សាធារណៈ។

ជាក់ស្តែងបើយើងក្រឡេកទៅមើលនៅលើមហាវិថី ព្រះមុន្នីរ៉េត ដែលមានព្រំប្រទល់រវាងខណ្ឌទួលគោក និងខណ្ឌចំការមន បច្ចុប្បន្ននេះកំពុងត្រូវបាន ក្រុមអាជីវករផ្សារដើមគ រំលោភយកចំណីផ្លូវសាធារណៈ ធ្វើជាកន្លែងដាក់លក់បន្លែ ផ្លែឈើគ្រប់ប្រភេទ រាប់សិបឆ្នាំមកហើយ ដែលធ្វើឲ្យត្រង់ចំណុចនេះ បាត់បង់របៀបរាបរយ សណ្ដាប់ធ្នាប់ សាធារណ បង្កការកកស្ទះចរាចរណ៍ស្ទើរជារៀងរាល់ថ្ងៃ។

នៅត្រង់ចំណុចនេះ ក៏ត្រូវបានអាជ្ញាធរចុះរៀបចំសណ្តាប់ធ្នាប់ជាញឹកញាប់ផងដែរ ប៉ុន្តែហាក់ដូចជាគ្មានប្រសិទ្ធភាពសោះ ដោយសារក្រុមអាជីវករទាំងអស់នោះ នៅតែបន្តដាក់តាំងបន្លែ ផ្លែឈើ លក់យ៉ាងរំភើ ។

សម្រាប់ព័ត៌មាននេះក៏ធ្លាប់បានធ្វើការផ្សព្វផ្សាយ ជាច្រើនលើកច្រើនសារួចទៅហើយផងដែរ ដើម្បីសុំអោយអាជ្ញាធរខណ្ឌទាំង ២ គឺខណ្ឌទួលគោក និងខណ្ឌចំការមន បន្តចុះរៀបចំសណ្តាប់ធ្នាប់ អោយបានល្អប្រសើរឡើងវិញ ផ្ទុយទៅវិញ នៅលើកំណាត់មហាវិថី ព្រះមុន្នីរ៉េត ដែលមានព្រំប្រទល់រវាងខណ្ឌទួលគោក និងខណ្ឌចំការមន នៅតែមានបញ្ហាដដែលជាដដែល បើទោះបីអាជ្ញាធរបានចុះរៀបចំសណ្តាប់ធ្នាប់ជាញឹកញាប់ ប៉ុន្តែហាក់ដូចជាគ្មានប្រសិទ្ធភាពសោះ។

ប្រជាពលរដ្ឋបានលើកឡើងថា បច្ចុប្បន្ននេះមហាវិថី ព្រះមុន្នីរ៉េត ត្រង់ចំណុចម្តុំ ផ្សារ ដើមគ កំពុងតែធ្វើអោយបាត់បង់សណ្តាប់ធ្នាប់ របៀបរៀបរយ សាធារណៈយ៉ាងខ្លាំង ដោយសារតែក្រុមអាជីវកររំលោភយកផ្លូវនេះធ្វើជាកន្លែងដាក់លក់បន្លែ ផ្លែ ឈើគ្រប់ប្រភេទ ជាហេតុធ្វើឲ្យផ្លូវមានសភាពតូចចង្អៀត ពិបាកដល់ការធ្វើដំណើរមិនថា ពេលយប់ ឬ ពេលថ្ងៃនោះទេ គឺការកកស្ទះចរាចរណ៍នៅត្រង់ចំណុចនេះ តែងតែកើតឡើងជាញឹកញាប់។

ដោយភាពអនាធិបតេយ្យទាំង នេះហើយ អ្នកដំណើរ ក៏ដូចជាប្រជាពលរដ្ឋទូទៅ សូមសំណូមពរយ៉ាងទទូចទៅដល់អាជ្ញាធរខណ្ឌទួលគោក ក៏ដូចជា អាជ្ញាធរខណ្ឌចំការមន មេត្តាបន្តចុះពិនិត្យមើល កុំបណ្តែតបណ្តោយឲ្យក្រុមអាជីវករទាំងនេះទន្ទ្រានយកចំណីផ្លូវសាធារណធ្វើជាកន្លែងលក់បន្លែ ផ្លែឈើបន្តទៅទៀត៕